1A SA tiko vakailoa maikea e dua na tamata ca, na yacana ko Sepa, na luve i Pikiri, na Penijamini: a sa uvuca ko koya e dua na davui, ka kaya, Sa sega na noda tikina kei Tavita, ka sega na nodai votavota mai vua na luve i Isei: oi kemudou na Isireli, na tamata yadua ki na nona vale.
2A sa lako cake ko ira kecega na tamata Isireli maivei Tavita, me muri Sepa na luve i Pikiri: ia ko ira na tamata Juta era kabita na nodra tui, mai na Joritani ka yacovi Jerusalemi.
3A sa lako ko Tavita ki na nona vale mai Jerusalemi; a sa kauta ko na tui na lewe tini na alewa na watina lalai, o iratou ka laiva ko koya me vakatawa na vale, ka kauti iratou ki na dua na vale me ratou vakaraici, ka sa vakani iratou, ka sega ni curu vei iratou: a ratou sa sogoti tiko, ka yacova na siga eratou sa mate kina, ni ratou sa bula vakadawai ga.
4A sa kaya na tui vei Amasa, Mo soqoni ira vata vei au na tamata Juta e na siga e tolu, ia mo mai tiko kike.
5A sa lako ko Amasa me soqoni ira vata na Juta; a sa berabera ko koya ka sa oti na siga ka lokuca vua ko koya.
6A sa kaya vei Episai ko Tavita, O qo, e levu cake na ka ca ena kitaka ko Sepa na luve i Pikiri vei keda, e na ka maivei Episalomi: mo kauti ira na nona tamata na nomu turaga, ka cicimuri koya, de curuma e so na koro vakabai, ka vuni vei keda.
7A ra sa muri koya yani na tamata nei Yoapi, kei ira na Kireci, kei ira na Pileci, kei ira na tamata qaqa kecega: a ra sa lako tani mai Jerusalemi me cicivi Sepa na luve i Pikiri.
8Ia ni ra sa voleka ki na vatu levu mai Kipioni, sa liutaki ira ko Amasa. Ia sa vauci vei Yoapi na nonai sulu ka vakasuluma, a sa vauci etaudaku e dua nai vau, a sa dua nai seleiwau e na kena taga sa vauci ki tolona; ia ni sa lako yani ko koya, sa lutu o qori.
9A sa kaya vei Amasa ko Yoapi, O sa bula vinaka, na wekaqu, ne? A sa taura na kumi i Amasa ko Yoapi e na ligana i matau me reguci koya.
10A sa sega ni nanuma ko Amasa nai seleiwau e na liga i Yoapi: a sa cokai koya kina e na ketena, ka sovara na nona wawa ki na qele, ka sega ni vakaruataka vei koya: a sa mate ko koya. Ia erau sa cicimuri Sepa na luve i Pikiri ko Yoapi kei Episai na tacina.
11A sa tu vakadua maikea e dua na tamata nei Yoapi, ka kaya, O koya sa vinakati Yoapi, kei koya sa totaki Tavita, me muri Yoapi.
12A sa koto tiko e na dra ko Amasa e na loma ni salatu. Ia ni sa raica ko na tamata ko ya ni ra sa tu vakadua na tamata kecega, sa qai kauti Amasa tani mai na salatu ki na were, a sa viria ki delana e dua nai sulu, ni sa raica ko koya era sa tu vakadua ko ira kece ka yaco kina.
13Ni sa kauti tani mai na salatu, era sa qai lako yani na tamata kecega me muri Yoapi, me cicimuri Sepa na luve i Pikiri.
14A sa lako yani ko koya me basika na nodra yavusa kecega na Isireli, ka yaco ki Epeli, kei Peci-maka, kei ira kecega na Peri: a ra sa soqoni vata, ka laʼki muri koya.
15A ra sa lako ka buku na druadrua mai Epeli ni Peci-maka vei koya o qori: a ra sa viribai qele ki na koro, a sa tu e na rara: ia ko ira na tamata kecega era vata kei Yoapi, era sa tukitukia na bai, me vakabalea.
16A sa kaci mai na koro e dua na alewa vuku, Dou rogoca! dou rogoca! dou kaya mada vei Yoapi, Mo toro mada mai kike, meʼu vosa vei iko.
17A sa toro vua ko koya, a sa kaya na alewa, O iko ko Yoapi, se segai? A sa kaya ko koya, Oi au ga. A sa kaya vua ko koya, Mo rogoca na vosa ni nomu vada. A sa kaya ko koya, Au sa rogoca.
18A sa vosa ko koya, ka kaya, Era a vosa vakaidina eliu, ka kaya, Me ra tarogi Epeli ga, a ra sa dautinitini vakaoqo.
19Oi au e dua vei ira na Isireli sa cata nai valu, a sa yalodina: ko iko, ko sa qara me vakaotia e dua na koro ka dua na tinadra na Isireli: a cava ko na tiloma kina nai votavota i Jiova?
20A sa vosa ko Yoapi, ka kaya, Me yawa sara, me yawa sara vei au, meʼu tiloma se vakarusa:
21sa sega ni vakaoqo: a sa dua ga na tamata mai na ulu-ni-vanua nei Ifireimi, ko Sepa na yacana, na luve i Pikiri, sa laveta cake na ligana vua na tui, io vei Tavita: dou soli koya duaduaga mai, kaʼu na qai lako tani mai na koro. A sa kaya na alewa vei Yoapi, Raica, ena viritaki na uluna vei iko ki daku ni bai.
22A sa lako na alewa e na nona vuku vei ira kecega na tamata. A ra sa tamusuka na ulu i Sepa na luve i Pikiri, ka viritaka vei Yoapi. A sa uvuca na davui ko koya, a ra sa lesu yani mai na koro, na tamata yadua ki na nona vale. A sa lesu ki Jerusalemi ko Yoapi vei koya na tui.
23A sa nodra turaga na tamatai valu kecega i Isireli ko Yoapi; a sa nodra turaga na Kireci kei ira na Pileci ko Pinaya, na luve i Yioyata:
24a sa turaga ni vakacavacava ko Etorami: a sa vola nai valavala ni matanitu ko Yiosafati na luve i Eiiluti:
25ia sa vu-ni-vola ko Si va: a rau sa bete ko Satoki kei Epiyacari:
26ia na turaga sa rau dautiko kei Tavita ko Ira na luve i Yairi.
Who We AreWhat We EelieveWhat We Do
2025 by iamachristian.org,Inc All rights reserved.
