1A SA tukuni vei Yoapi, Raica, sa tagi ka yaso na tui e na vuku i Episalomi.
2Ia sa yaco na veivakabulai e na siga ko ya me ka era tagi kina ko ira kecega na tamata: ni sa rogoca ko ira na tamata e na siga ko ya, ka vaka, Sa rarawa na tui e na vuku ni luvena.
3A ra sa lako lo ki na koro na tamata e na siga ko ya, me vaka na nodra lako lo na tamata era sa madua ni ra sa dro e nai valu.
4A sa ubia na matana na tui, a sa qoqolou vakadomoilevu na tui, Ule, Episalomi na luvequ! ule, Episalomi! ule, na luvequ, na luvequ!
5A sa lako mai ki vale vei koya na tui ko Yoapi, a sa kaya, O ni sa vakamaduataka edaidai na matadra kecega na nomu tamata, o ira ka vakabulai iko, kei iratou na luvemu tagane, kei iratou na luvemu alewa, kei iratou na watimu, kei iratou na watimu lalai:
6ni ko sa lomani ira era sa cati iko, ka sa cati ira era sa lomani iko: ni ko sa tukuna edaidai, ni sa ka walega vei iko ko ira na turaga kei ira na kaisi: niʼu sa qai kila edaidai ke sa bula ko Episalomi, ka mate edaidai koi keitou kecega, ke sa vinaka vei iko:
7ia o qo, mo tu cake, mo curu yani, ka vosa vakayalololoma vei ira na nomu tamata: niʼu sa vosavavakini vei Jiova, kevaka ko sa sega ni curu yani, ena sega ni tiko kei iko e dua na tamata e na bogi edaidai: ia ena ca vakalevu vei iko na ka o qo, ka vakalailai na ka ca kecega sa yacovi iko ni ko a cauravou, ka yacova na gauna o qo.
8A sa tu cake na tui, ka laʼki tiko mai na matamata-ni-koro. A sa tukuni vei ira kecega na tamata, ka vaka, Raica, sa tiko na tui e na matamata-ni-koro. A ra sa lako kece mai na tamata ki na mata ni tui: a ra sa dro oti ko ira na Isireli, na tamata yadua ki na nona vale.
9A RA sa veileti na tamata kecega e na veiyavusa kecega i Isireli, ka kaya, Ka vakabulai keda na tui mai na ligadra na noda meca kecega, ka vakabulai keda mai na ligadra na kai Filisitia, ia ka sa qai dro mai na vanua e na vuku i Episalomi:
10ia ko Episalomi, o koya eda a lumuta vei keda, sa mate e nai valu: ia o qo, a cava dou sa sega ni vosa kina me kauti tale mai na tui?
11A sa talaki na tui ko Tavita kivei rau na bete, ko Satoki kei Epiyacari, ka kaya, Drau vosa vei ira na qase ni Juta, ka kaya, A cava dou sa berabera sara kina ni kauta tale mai na tui ki na nona vale? (ni sa lako mai vua na tui, io ki nona vale, na nodra vosa kecega na Isireli:)
12oi kemudou na wekaqu; na suiqu kei na lewequ koi kemudou: ia ka cava dou sa berabera sara kina ni kauta tale mai na tui?
13Ia drau kaya vei Amasa, Sa sega li ni suiqu kei na lewequ ko iko? me cakacaka vakaoqo vei au ko Jiova, ka vakaikuritaka, kevaka ko na sega ni turaga ni valu tikoga e na mataqu, mei sosomi kei Yoapi.
14A sa vakalakalataka ko koya na lomadra kecega na tamata nei Juta, me vaka era tamata lewe dua; a ra sa talaki kina vua na tui, ka vaka, Mo lesu mai ko iko, kei ira kecega na nomu tamata.
15A sa lesu na tui, ka yaco ki na Joritani. A ra sa lako ki Kilikali ko ira na Juta, me laʼki tavaki koya na tui, me kauti koya na tui ki tai kadua ni Joritani.
16Ia sa kusarawa ko Simi na luve i Kera, na Penijamini, o koya mai Peurimi, ka lako sobu kei ira na Juta, me tavaki Tavita na tui.
17A ra sa vata kaya e dua na udolu na tamata vei ira na Penijamini, kei Sipa e dua na cauravou vei ira na lewe-ni-vale i Saula, kei iratou na luvena tagane e tinikalima, kei na nona tamata e ruasagavulu eratou sa lako kaya; a ra sa liutaka na tui ki tai kadua ni Joritani.
18A sa lele yani ki tai kadua nai lelele me leletaki kina na nona lewe-ni-vale na tui, me kitaka talega na ka sa vinaka vua. Ia sa bale sobu ko Simi na luve i Kera e na mata ni tui, ni sa yaco ko koya ki tai kadua ni Joritani;
19a sa kaya vua na tui, Me kakua ni nanuma vei au nai valavala ca na noqu turaga, ia mo kakua ni nanuma, me rarawa kina na lomana na tui, na ka sa cakava vakayaloca na nomu tamata e na siga ka lako tani kina mai Jerusalemi na noqu turaga na tui.
20Ni sa kila na nomu tamata niʼu a kitaka nai valavala ca: ia, raica, au sa liu edaidai vei ira kecega na mataqali i Josefa ni lako sobu mai me tavaki iko na noqu turaga na tui.
21A sa vosa mai ko Episai na luve i Siruya, ka kaya, Me kakua li ni vakamatei ko Simi e na vuku ni ka o qo, ni sa vosavakacacataki koya ka lumuta ko Jiova?
22A sa kaya ko Tavita, A cava vei kedatou, oi kemudrau na luve i Siruya, ni drau sa noqu meca edaidai? me dua li na tamata vei ira na Isireli me vakamatei edaidai? au sa sega beka ni kila niʼu sa nodra tui na Isireli edaidai?
23Sa kaya talega na tui vei Simi, O na sega ni mate. A sa vosavavakini vua ko koya na tui.
24A sa lako sobu ko Mifiposeci na luve i Saula me tavaki koya na tui, a sa sega ni kitaka oti na yavana, se kitaka na kumina, se sava nona veisulu, mai na siga ka lako tani kina na tui, ka yacova na siga ka tale vakacegu mai kina.
25A sa yaco ni sa lako yani e Jerusalemi me tavaki koya na tui, sa kaya na tui vei koya, A cava ko a; sega ni lako yani kina kei au, Mifiposeci?
26A sa kaya ko koya, Noqu turaga na tui, sa cakacaka vakailasu vei au na noqu tamata; ni sa kaya na nomu tamata, Au na vauca na vodovodo ki na asa, meʼu vodo lako kina, ka lako kaya na tui; e na vuku ni sa lokiloki na nomu tamata.
27A sa beitaka vakailasu na nomu tamata ko koya vei iko na noqu turaga na tui; ia sa vaka e dua na agilose ni Kalou na noqu turaga na tui: ia mo qai cakava na ka e vinaka vei iko.
28Ni sa tamata era kolai mate e matana na noqu turaga na tui ko ira kece na mataqali i tamaqu; ia ko a vakatikora vata ga na nomu tamata kei ira era kana mai na nomui kanakana. Ia e dodonu vakaevei meʼu tagi tale vua na tui?
29A sa kaya na tui vei koya, A cava ko sa vosa tiko kina e na vuku ni nomu ka? au sa kaya oti, Drau wasea na vanua kei Sipa.
30A sa kaya ki na tui ko Mifiposeci, Me kauta kecega ko koya, e na vuku ni sa lako vakacegu tale mai ki na nona vale na noqu turaga na tui.
31A sa lako sobu mai Rokilimi ko Parisilai na kai Kiliati, ka lako kaya na tui ki tai kadua ni Joritani, ka me kauti koya ki tai kadua ni Joritani.
32Ia sa tamata qase sara ko Parisilai, e walusagavulu na nona yabaki: a sa vakania na tui ni sa tiko mai Meeneimi; ni sa tamata vutuniyau sara ko koya.
33A sa kaya na tui vei Parisilai, Daru lako vata yani, kaʼu na vakani iko ni daru sa tiko mai Jerusalemi.
34A sa kaya ko Parisilai vua na tui, Ena bogi vica tale na noqu bula, meʼu lako cake kina kei na tui ki Jerusalemi?
35sa walusagavulu na noqu yabaki e na siga o qo: au sa kunea rawa beka na ka vinaka kei na ka ca? sa kamikamica rawa beka ki na nomu tamata na ka kaʼu sa kania se na ka kaʼu sa gunuva? au sa rogoca rawa tiko li na domodra na tagane daumeke se na alewa daumeke? ia me bibi e na vuku ni cava na nomu tamata vei iko na noqu turaga na tui?
36ena lako vakalailai ga na nomu tamata kei na tui ki tai kadua ni Joritani: ia me sauma vei au na tui e na ka levu vakaoqo e na vuku ni cava?
37me lesu madani na nomu tamata, meʼu mate e na noqu koro, voleka ki nai bulubulu i tamaqu kei tinaqu: ia, raica na nomu tamata ko Kimami; me lako yani ko koya kei na noqu turaga na tui; ia mo cakava vua na ka e vinaka e matamu.
38A sa kaya na tui, Ena lako yani kei au ko Kimami, au na cakava talega vua na ka e vinaka vei iko: ia na ka kece talega ko na kerea vei au, kaʼu na kitaka vei iko.
39A ra sa lako kece na tamata ki tai kadua ni Joritani. Ia ni sa yaco ki tai kadua na tui, sa reguci Parisilai ko na tui, ka vosavakalougatataki koya; a sa lesu yani ko koya ki na nona tikina.
40A sa lako yani ki Kilikali na tui, a sa lako yani kaya ko Kimami: a ra sa kauta na tui ko ira kecega na tamata Juta, kei na dua na wase vei ira na tamata Isireli.
41Ka, raica, era lako mai vua na tui ko ira kecega na tamata Isireli, a ra sa kaya vua na tui, A cava era sa butakoci iko kina ko ira na weka i keimami, na tamata Juta, a ra sa kauti iko na tui kei ira na nona lewe-ni-vale, kei ira vata kaya na tamata kecega i Tavita, ki tai kadua ni Joritani?
42A sa kaya ko ira kecega na tamata Juta vei ira na tamata Isireli, E na vuku ni sa weka i keimami dina na tui: ia ka cava ko ni sa cudru kina e na vuku ni ka o qo? keimami sa kana li vakalailai mai vua na tui? se sa solia beka ko koya e dua nai solisoli vei keimami?
43A ra sa vosa na tamata Isireli vei ira na tamata Juta, ka kaya, Sa neimami e tini na tikina na tui, a sa neimami vakalevu ko Tavita, ka sa nomudou vakalailai: ka cava dou a vakaisini keimami kina, ni sega ni liu mada na neimami vosa me kau tale mai na neimami tui? A sa kaukauwa na nodra vosa na tamata Juta, ka malumalumu na nodra vosa na tamata Isireli.
Who We AreWhat We EelieveWhat We Do
2025 by iamachristian.org,Inc All rights reserved.
