1A SA wilika na tamata era vata kaya ko Tavita, ka lesia e so me nodra turaga na veiudolu, ka so na nodra turaga na veidrau.
2A sa talai ira na tamata ko Tavita, e dua na wase me lewai ira ko Yoapi, kei na kenai karua na wase me lewai ira ko na luve i Siruya, ko Episai na taci i Yoapi, kei na kenai katolu ni wase me lewai ira ko Itei na kai Kaca. A sa kaya na tui vei ira na tamata, Au na lako yani vakaidina kei kemudou koi au talega.
3A ra sa kaya na tamata, Mo kakua ni lako yani; ni ra na sega ni marautaki keitou, kevaka keitou sa dro; ia era na sega ni marautaki keitou, kevaka sa mate e dua na wase vei keitou ni keitou wase rua; ia ko iko, ko sa tautauvata kei na udolu vakatini vei keitou; a sa vinaka ga mo vukei keitou mai na koro.
4A sa kaya na tui vei ira, A ka e vinaka vei kemudou, kaʼu na cakava. A sa tu na tui ka voleka ki na matamata-ni-koro, a ra sa curu yani na tamata kecega era sa tauyadrau ka tauyaudolu.
5A sa vakaroti Yoapi kei Episai kei Itei ko na tui, ka kaya, Dou valavala vakamalua vua na cauravou ko Episalomi e na vukuqu. A ra sa rogoca na tamata kecega, ni sa vakaroti iratou kecega na turaga ni valu ko koya na tui e na vuku i Episalomi.
6A ra sa curu yani na tamata ki na were me tavaki ira na Isireli: a sa ia nai valu mai na veikaukau mai Ifireimi;
7a ra sa moku maikea ko ira na tamata Isireli e na matadra na tamata i Tavita, a sa dua maikea na samu levu e na siga ko ya, sa rua na oba:
8ni sa veiseiyaki maikina nai valu e na dela ni vanua taucoko ko ya; a ra sa lewe vuqa sa vakamatea ko na veikaukau e na siga ko ya, a ra sa lewe lailai sa vakamatea ko nai seleiwau.
9A sa tavaki ira na tamata i Tavita ko Episalomi. A sa vodo lako ko Episalomi e na asa, a sa lako na asa e ruku ni dua ni oki levu sa vakatabani vakalevu, a sa taura na uluna na oki, a sa lili toka ko koya e na macawa kei lomalagi kei vuravura; a sa lako tani na mule ka vodo kina ko koya.
10A sa raica e dua na tamata, ka tukuna vei Yoapi, a sa kaya, Raica, kaʼu a kunei Episalomi ni sa lili toka e na dua na oki.
11A sa kaya ko Yoapi vei koya na tamata sa tukuna vua, Oi, raica, ko a kunea, ka cava ko a sega ni mokuti koya kina maikea ki na qele? kaʼu a qai solia vei iko e tini na siliva, kei na dua nai vau ni tolo.
12A sa kaya na tamata vei Yoapi, Kevaka kaʼu na taura e na ligaqu e dua na udolu na siliva, au na sega ni dodoka na ligaqu ki na luvena na tui; ni sa vakaroti iko, kei Episai, kei Itei, ko na tui, ni keitou a rogoca tiko, a sa kaya, Dou dui qarauna na cauravou ko Episalomi.
13Ia, kevaka kaʼu a caka cala meʼu mate kina: (a sa sega e dua na ka me vuni vua na tui:) ko a qai sega ni daroya ko iko talega.
14A sa kaya ko Yoapi, Meʼu kakua ni wawa vakaoqo kei iko. A sa kauta e na ligana ko koya e tolu na moto leleka, ka cokavaka ki na uto i Episalomi, ni sa bula tiko e na loma ni oki.
15A sa tini na cauravou eratou colata nai yaragi i Yoapi, eratou sa voliti Episalomi, ka mokuta, ka vakamatea.
16A sa uvuca na davui ko Yoapi, a ra sa lesu mai na tamata me ra kakua ni muri ira na Isireli; ni sa tarovi ira na tamata ko Yoapi.
17A ra sa kauti Episalomi, ka biuti koya ki loma ni dua nai keli levu e na veikaukau ko ya, a ra sa binia ki delana e dua nai binibini vatu levu sara: a sa dro ko ira kecega na Isireli, na tamata yadua ki na nona vale.
18Ia ni sa bula tiko ko Episalomi, sa kauta ka vakaduria cake vua e dua na duru, a ya mai na buca ni tui: ni sa kaya ko koya, Sa sega na luvequ me nanumi kina na yacaqu: a sa vakatoka na duru e na yacana: a sa vakatokai, Nai vakananumi i Episalomi, ka yacova na siga o qo.
19A sa kaya ko Eiimaasi na luve i Satoki, Meʼu cici mada ka tukuna vua na tui ni sa cudruvaki koya ko Jiova vei ira na nona meca.
20A sa kaya vua ko Yoapi, Mo kakua ni laʼki tukutuku edaidai, ia ko na laʼki tukutuku e na dua tani na siga: ia mo kakua ni laʼki tukutuku edaidai, e na vuku ni sa mate tu na luvena na tui.
21A sa kaya ko Yoapi vei Kusi, Mo laʼki tukuna vua na tui na ka ko a raica. A sa cuva sobu vei Yoapi ko Kusi, a sa cici.
22A sa kaya tale vei Yoapi ko Eiimaasi na luve i Satoki, Meʼu cici mada ga, meʼu muri Kusi, koi au talega. A sa kaya ko Yoapi, A cava ko na cici kina, na luvequ? ni sa sega vei iko nai tukutuku e yaga.
23Ia meʼu cici mada ga. A sa kaya vua ko koya, Mo cici. A sa cici ko Eiimaasi kivaka ki na buca, a sa sivi Kusi.
24A sa tiko ko Tavita e na macawa ni matamata-ni-koro e rua: a sa cabe cake nai vakatawa ki na bai, ki na dela ni matamata-ni-koro, a sa ta cake e na matana, ka rai voli, ka raica, sa cici duaduaga e dua na tamata.
25A sa kaci nai vakatawa, ka tukuna vua na tui. A sa kaya na tui, Kevaka sa duaduaga ko koya, sa dua nai tukutuku e na gusuna. A sa lakolako ko koya, ka toro voleka.
26A sa kunea ko nai vakatawa, ni sa cici e dua tani na tamata: a sa kaci nai vakatawa vei koya nai vakatawa ni matamata-ni-koro, ka kaya, Raica, e dua na tamata sa cici duaduaga. A sa kaya na tui, Sa kauta mai nai tukutuku ko koya talega.
27A sa kaya ko koya nai vakatawa, Au sa raica na nona cici sa liu, ni sa vaka na cici i Eiimaasi na luve i Satoki. A sa kaya na tui, A tamata vinaka ko koya, a sa lako mai kei nai tukutuku vinaka.
28A sa kaci ko Eiimaasi, ka kaya vua na tui, Sa cegu tiko. A sa cuva vakatobocu ki na qele e na mata ni tui, ka kaya, Me vakarokorokotaki ko Jiova na nomu Kalou, o koya ka soli ira mai na tamata era a laveta na ligadra vei iko na noqu turaga na tui.
29A sa kaya na tui, Sa vinaka tiko na cauravou ko Episalomi, se segai? A sa kaya ko Eiimaasi, Ni sa tala ko Yoapi na tamata ni tui, kei au na nomu tamata, au a raica e dua na ue levu, ia kaʼu a sega ni kila na kenai balebale.
30A sa kaya na tui, Mo lako vakatikitiki, mo tu kike. A sa lako vakatikitiki ko koya, ka tu vakadua.
31Ka, raica, sa lako mai ko Kusi; a sa kaya ko Kusi, Me kila na noqu turaga na tui; ni sa cudruvaki iko edaidai ko Jiova vei ira kecega era a tu cake me vala kei iko.
32A sa kaya na tui vei Kusi, Sa vinaka tiko na cauravou ko Episalomi, se segai? A sa kaya ko Kusi, Me ra tautauvata ga kei na cauravou ko ya ko ira na nomu meca na noqu turaga na tui, kei ira kecega era tu cake me vakacacani iko.
33A sa sautaninini na tui, a sa cabe cake ki na vale mai na dela ni matamata-ni-koro, ka tagi; a sa kaya vakaoqo ni sa lako, Na luvequ Episalomi, na luvequ, na luvequ Episalomi! keʼu a mate me nomui sosomi ke sa vinaka, Episalomi, na luvequ, na luvequ!
Who We AreWhat We EelieveWhat We Do
2025 by iamachristian.org,Inc All rights reserved.
