1A SA oti na ka o qo, sa qai qisia vua ko Episalomi e so na vale-vodoki, ka so na ose, kei na tamata daucici e lewe limasagavulu me liutaki koya.
2A sa dausou e na sabogibogi ko Episalomi, ka laʼki tu e na bati ni sala mai na matamata-ni-koro: ia ni sa lako mai vei koya na tui e dua na tamata me lewai e na vuku ni nona ka sa veiletitaki, sa qai kacivi koya ko Episalomi, ka kaya, O cei na koro ko sa lako maikina? Ia ke sa kaya, Sa mai dua na nodra yavusa na Isireli na nomu tamata;
3sa qai kaya vua ko Episalomi, Raica, sa vinaka ka dodonu na nomu ka; a sa sega ni lesi e dua mai vua na tui me rogoci iko.
4A sa kaya ko Episalomi, Meʼu lesi mada meʼu dauveilewai e na vanua, me lako mai kina vei au na tamata yadua sa dua nona ka sa veiletitaki se na ka me lewai, ia kaʼu na lewa dodonu vua.
5Ia ni sa toro e dua na tamata me vakarokoroko vua, sa dodoka na ligana ko koya, ka tauri koya, ka reguca.
6A sa caka vakaoqo ko Episalomi vei ira kecega na Isireli era sa lako mai vua na tui me lewai: a sa butakoca na yalodra na tamata Isireli ko Episalomi.
7A sa oti na yabaki e vasagavulu, sa qai kaya ko Episalomi vua na tui, Meʼu lako madani meʼu vakayacora na noqu vosavavakini kaʼu a cavuta vei Jiova mai Epironi:
8ni sa cavuta na vosa vavakini na nomu tamata, niʼu a tiko mai Kesuri mai Siria, ka kaya, Kevaka sa na vakalesui au tale ki Jerusalemi ko Jiova, au na qai qaravi Jiova.
9A sa kaya na tui vei koya, Mo lako e na vakacegu. A sa ia ko koya, ka lako ki Epironi.
10A sa tala ko Episalomi e so na yamata ki na nodra yavusa kecega na Isireli, me ra kaya, Ni dou sa rogoca na domo ni davui, dou qai kaya, Sa tui mai Epironi ko Episalomi.
11A ra sa lako kei Episalomi e rua na drau na tamata mai Jerusalemi, era sa kacivi; a ra sa lako e na nodra yalododonu, ka sa sega na ka era sa kila.
12A sa talaki ko Episalomi, me lako mai na nona koro mai Kilo, ko Eiitofeli na kai Kilo, na tamata erau daubose kei Tavita, a sa cabora tiko nai soro ko koya. A sa kaukauwa na vere; ni ra sa lewe levu cake tikoga na tamata era sa lako kei Episalomi.
13A sa lako mai vei Tavita e dua na tamata dautukutuku, ka kaya, Sa golevi Episalomi na yalodra na tamata Isireli.
14A sa kaya ko Tavita vei ira kecega na nona tamata era vata kaya mai Jerusalemi, Tou mai ia, me da dro; ni da na sega ni vakabulai rawa mai na mata i Episalomi: tei kusarawa me lako, de yacovi keda vakasauri ko koya, ka vakacacani keda, ka mokuta na koro e na bati ni seleiwau.
15A ra sa kaya vua na tui ko ira na nona tamata na tui, Raica, e na ka kecega sa vinakata ko na noqu turaga na tui, sa nomu tamata koi keitou.
16A sa lako yani na tui, a sa muri koya ko ira kecega na nona lewe-ni-vale. A sa laiva ko na tui e lewe tini na alewa, eratou watina lalai, me vakatawa na vale.
17A sa lako yani na tui, a ra sa muri koya ko ira kecega na tamata; a sa laʼki tiko mai Peci-meraki.
18A ra sa lako yani vata kaya ko ira kecega na nona tamata; kei ira kecega na Kireci, kei ira kecega na Pileci, kei ira kecega na kai Kaca, era ono na drau na tamata era sa muri koya mai Kaca, era sa lako voli e matana na tui.
19A sa kaya na tui vei Itei na kai Kaca, A cava sa lako kina kei keda ko iko talega? mo lesu, ka tiko kaya na tui; ni sa kai tani ko iko, ka lako tiko ki na nomu yasana:
20o a lako walega mai e na noa; ia meʼu cakavi iko li edaidai mo veilakoyaki kei keitou? ia koi au, au sa lako ki na vanua kaʼu na lako rawa kina; mo lesu tale, ka kauti ira na wekamu tale yani kei iko e na loloma kei na dina.
21A sa vosa vua na tui ko Itei, ka kaya, Me vaka sa bula ko Jiova, a sa bula na noqu turaga na tui, ena tiko na nomu tamata e na tikina sa tiko kina na noqu turaga na tui, se e na bula se e na mate.
22A sa kaya vei Itei ko Tavita, Mo lako voli yani. A sa lako ki tai kadua ko Itei na kai Kaca, kei ira kecega na nona tamata, kei ira kecega na lalai era vata kaya.
23A ra sa tagi vakadomoilevu kecega na lewe ni vanua, a ra sa lako ki tai kadua na tamata kecega: a sa lako talega na tui ki tai kadua ni uciwai ko Kitironi, a ra sa lako ki tai kadua na tamata kecega kivaka ki na sala ni veikau.
24Ia, raica, ko Satoki talega, kei ira kecega na luve i Levi era vata kaya, era sa colata tiko na kato ni veiyalayalati ni Kalou, a ra sa vakotora sobu na kato ni Kalou; a sa lako cake ko Epiyacari, ka me oti mada eliu ko ira kecega na tamata ni ra lako yani e na koro.
25A sa kaya na tui vei Satoki, Mo kauta tale yani ki na koro na kato ni Kalou: ke sa lomani au ko Jiova, ena vakalesui au tale ko koya meʼu raica na ka ko ya kei na nona vale talega:
26ia kevaka sa kaya vakaoqo, Au sa sega ni vinakati iko, raica, koi au o qo, me kitaka vei au ko koya na ka e vinaka vua.
27Sa kaya talega na tui vei Satoki na bete, Sa tamata daurai beka ko iko? mo lesu vakacegu tale ki na koro, kei rau talega na luvemudrau, ko Eiimaasi na luvemu, kei Jonacani na luve i Epiyacari.
28Dou raica, kaʼu na wawa e na buca ni veikau, ka me lako mada mai na vosa maivei kemudou me tukutuku vei au:
29a sa kauta tale na kato ni Kalou ki Jerusalemi ko Satoki kei Epiyacari: a rau sa tiko maikea.
30A sa lako cake ko Tavita e nai cabecabe ni veiolive, a sa tagi tiko ni sa lako, a sa ubi tu na uluna, a sa sega ni vakaivava na yavana: a ra sa ubia na uludra na tamata kecega era vata kaya, a ra sa lako cake, ka tagi lako ga.
31A sa tukuni vei Tavita, ka vaka, Ko Eiitofeli, sa tiko kei ira era buki vere vata kei Episalomi. A sa kaya ko Tavita, I Jiova, mo vakalialia-taka mada na ka e bosea ko Eiitofeli.
32Ia ni sa yaco ki delana ko Tavita, sa soro kina vua na Kalou, ka raica, sa tavaki koya ko Usei na Ariki, sa kadresu na nona kote, a sa tu e uluna na qele:
33a sa kaya vua ko Tavita, Kevaka ko sa lako kei au, ko na bitaki au,
34ia kevaka ko sa lesu yani ki na koro, ka kaya vei Episalomi, Kaʼu na nomu tamata, o iko na tui; sa nona tamata na tamamu eliu koi au, ia kaʼu na qai nomu tamata: o na qai vaka-waletaka e na vukuqu na ka e bosea ko Eiitofeli:
35ia sa sega li ni tiko vata kei iko maikea koi rau na bete, ko Satoki kei Epiyacari? ia na ka kecega ko na rogoca mai na nona vale na tui, mo tukuna vei rau na bete, ko Satoki kei Epiyacari:
36raica, sa tiko vata kei rau maikea na luvedrau, ko Eiimaasi, sa nona ko Satoki, kei Jonacani, sa nona ko Epiyacari; ia mo dou talai rau vei au me tukuna na ka kecega dou na rogoca.
37A sa lako ki na koro ko Usei nai tau i Tavita, a sa lako ki Jerusalemi ko Episalomi.
Who We AreWhat We EelieveWhat We Do
2025 by iamachristian.org,Inc All rights reserved.
