II. Ai Ni Vola I Samueli 14 - AI VOLA TABU（FIJ1864）

Sa lakovi tale ko Episalomi, 1-24. Sa matavinaka ko koya, 25-27. Ni sa tiko oti ko koya ka yabaki rua mai Jerusalemi, sa qai kauti koya ko Yoapi vei koya na tui, 28-33.

1A SA kila ko Yoapi na luve i Siruya ni sa golevi Episalomi na yalona na tui.

2A sa talaki ki Tikoa ko Yoapi, ka kauta maikina e dua na alewa vuku, a sa kaya vua, Mo vakataka mada e dua sa tagiyaso, ka vakasuluma mada nai sulu ni tagiyaso, ka kakua ni lumuti iko e na waiwai, ia mo vakataka na alewa sa tagiyaso vakadede e na vuku ni mate:

3ia mo lako vua na tui, ka vosa vakaoqo vei koya. A sa lesia na vosa vei koya ko Yoapi.

4A sa laʼki vosa vua na tui na alewa ni Tikoa, ka bale e matana ki na qele, ka vakarokoroko, ka kaya, Mo veivuke, na tui.

5A sa kaya na tui vei koya, A cava sa yacovi iko? A sa kaya ko koya, Sa dina ni sa alewa dawai koi au, ka sa mate na watiqu.

6Ia ka rua na luvequ tagane na nomu vada, a rau a veivala e na were, a sa sega e dua me tawasei rau, a sa mokuta e dua ko koya nai kadua, ka vakamatea.

7Ia, raica, sa tu cake vakaivalu na mataqali taucoko ki na nomu vada, ka ra sa kaya, Mo soli koya mada ka mokuta na tacina, me keitou vakamatei koya, mei sau kei tacina ka vakamatea ko koya; ia keitou na vakamatea talega nai taukei emuri: a ra na bokoca kina na qilaiso ni noqu buka sa vo tu, ka sega ni laiva me vo na yaca vei koya na watiqu, se na kawa e na dela i vu ravura.

8A sa kaya na tui vua na alewa, Mo lako yani ki na nomu vale, ia koi au, kaʼu na lewa e na vukumu.

9A sa kaya vua na tui ko koya na alewa ni Tikoa, Me lutu vei au, noqu turaga na tui, na kena ca, me lutuka na mataqali talega i tamaqu; ia me tawa cala na tui kei na nonai tikotiko vakaturaga.

10A sa kaya na tui, O koya sa vosa vei iko mo kauti koya mai vei au, ena qai sega ni tarai iko tale.

11A sa kaya na alewa, Me nanuma mada ko na tui na nomu Kalou ko Jiova, mo kakua kina ni laivi koya sa sauma na dra me vakalevutaka na veivakarusai, de ra vakamatea na luvequ. A sa kaya ko koya, Me vaka sa bula ko Jiova, ena sega ni lutu ki na qele e dua na drau ni uluna na luvemu.

I

12Sa qai kaya na alewa, Me vosa mada na nomu vada e dua na vosa vei iko na noqu turaga na tui. A sa kaya ko koya, Mo vosa ga.

13A sa kaya ko koya na alewa, A cava ko ni sa nanuma vakaoqo kina vei ira na tamata ni Kalou? ni sa vosataka na ka o qo na tui me vaka e dua sa caka cala, e na vuku ni sa sega ni kauta tale mai ko na tui na nona sa vakasevi.

14Ni da na mate vakaidina, ka vaka na wai sa tasova ki na qele, sa sega ni kumuni vata tale rawa; a sa sega ni vinakata vakailoa e dua na tamata na Kalou: a sa vakanananu ga ki na ka me kakua ni tiko sese ga ko koya ka vakasevi.

15Ia na ka o qo kaʼu sa mai vosataka kina na ka o qo vei iko na noqu turaga na tui, a ka ni ra sa vakarerei au na tamata: a sa kaya na nomu vada, Au na qai vosa vua na tui; ena kitaka beka ko na tui na ka e kerea na nona vada.

16Ni na rogoca ko na tui me Vakabula na nona vada mai na liga ni tamata sa via vakarusai keirau vata kei na luvequ mai nai votavota ni Kalou.

17A sa kaya na nomu vada, Me ka mada ni veivakacegui na vosa ni noqu turaga na tui; ni sa vaka na agilose ni Kalou na noqu turaga na tui, me kunea na ka vinaka kei na ka ca: a sa tiko kei iko ko Jiova na nomu Kalou.

18A sa vosa na tui, ka kaya vua na alewa, Mo kakua mada ni vunia vei au na ka kaʼu na tarogi iko kina. A sa kaya na alewa, Me vosa mada na noqu turaga na tui.

19A sa kaya na tui, Sa tu vei iko na liga i Yoapi e na ka kecega o qo, se segai? A sa vosa ko koya na alewa, ka kaya, Me vaka sa bula na yalomu, noqu turaga na tui, sa sega e dua me vuki rawa ki nai matau se nai mawi mai na ka kecega sa kaya na noqu turaga na tui: ni sa vakarota vei au ko Yoapi ga na nomu tamata, ka lesia vei au na nomu vada na vosa kecekecega o qo:

20e nai naki me vakabaleti na vosa sa kitaka kina na ka o qo ko Yoapi na nomu tamata: ia ka sa vuku na noqu turaga me vaka na nona vuku e dua na agilose ni Kalou, me kila na ka kecega e vuravura.

21A sa kaya na tui vei Yoapi, Raica, kaʼu sa cakava na ka o qo, mo lako madani, mo kauta tale mai na cauravou ko Episalomi.

22A sa bale vakatobocu ki na qele ko Yoapi, ka cuva, ka vakavinavinaka vua na tui: a sa kaya ko Yoapi, Sa kila edaidai na nomu tamata niʼu sa kune loloma e matamu, noqu turaga na tui, e na vuku ni sa vakayacora ko na tui na vosa ni nona tamata.

23A sa ia ko Yoapi, ka lako yani ki Kesuri, ka kauti Episalomi mai ki Jerusalemi.

24A sa kaya na tui, Me lesu yani ko koya ki na nona vale, ka me kakua ni raica na mataqu. A sa lesu yani ki na nona vale ko Episalomi, a sa sega ni raica na matana na tui.

25Ia ka sa sega e lewe dua vei ira kecega na Isireli sa matavinaka me vakai Episalomi me qoroi sara; mai na qeteqete ni yavana ka cavaraka na buradelana, sa sega na ca vei koya.

26Ia ni sa kotiva na uluna, (a sa daukotiva ni sa cava na yabaki, ni sa bibi vua, a sa daukotiva kina,) sa dauvakatovolea na kena bibi ni drau ni uluna, a sa rua na drau na sikeli me vaka nai vakarau ni tui.

27A sa sucu vei Episalomi e tolu na luvena tagane, ka dua na luvena alewa, a yacana ko Tamari: sa alewa matavinaka ni raici ko koya.

28A sa tiko mai Jerusalemi ko Episalomi ka yabaki rua, ka sa sega ni raica na matana na tui.

29A sa talaki ko Episalomi kivei Yoapi, me vakayacori koya ko koya vua na tui; a sa bese ni lakani vua. A sa talaki tale vua ko koya, a sa bese ga ni lakani.

30A sa kaya vei ira na nona tamata, Raica, sa voleka na were i Yoapi ki na noqu tikina, a sa tu kina na nona parile; dou laʼki vakacaudreva e na buka. A ra sa vakacaudreva na were e na buka ko ira na tamata nei Episalomi.

31A sa ia ko Yoapi, ka lako vei Episalomi ki na vale, a sa kaya vua, A cava era sa vakacaudreva kina na noqu were na nomu tamata?

32A sa kaya vei Yoapi ko Episalomi, Raica, kaʼu a talaki vei iko, ka kaya, Mo lako mai kike, meʼu talai iko vua na tui, me kaya, A cava beka kaʼu sa lako mai kina mai Kesuri? keʼu a tikotikoga kina ke sa vinaka: ia o qo, meʼu raica na matana na tui; ia kevaka sa tu vei au nai valavala ca, me vakamatei au ko koya.

33A sa lako vua na tui ko Yoapi, ka tukuna vua: a sa kacivi Episalomi ko koya, a sa lako mai ko koya vua na tui, a sa cuva na matana ki na qele e na mata ni tui: a sa reguci Episalomi na tui.