II. Ai Ni Vola I Samueli 12 - AI VOLA TABU（FIJ1864）

Sa vunauci Tavita ko Nacani na parofita, a sa veivutuni kina ko Tavita, 1-14; a sa mate na luve i Paci-sepa, 15-23. Sa sucu ko Solomoni, 24, 25. Sa kabai ko Rapa, a sa vakararawataki ira vakalevu ko Tavita, 26-31.

1A SA talai Nacani ko Jiova vei Tavita. A sa lako vua ko koya, ka kaya vua, Sa tiko e na dua na koro e rua na tamata; e dua sa vutuniyau, ka dravudravua na kenai kadua.

2Na tamata vutuniyau sa vuqa sara na nona sipi, kei na nona karavau;

3ia ka sa sega vua na tamata dravudravua e dua na ka, e dua walega na lami alewa lailai, a ya ka vakaivolitaka, a sa vakania: a sa tubu cake kaya, vata talega kei iratou na luvena; sa kania e so na tiki ni kena, a sa gunu mai na mena bilo, a sa koto e na lomaserena, a sa tautauvata vua kei na dua na luvena alewa.

4A sa lako vua na tamata vutuniyau e dua na tamata sa lako voli, a sa bese ko koya ni kauta e dua na nona sipi se na nona karavau, me cakava vua sa taubale voli sa lako vei koya; a sa kauta na nona lami na tamata dravudravua, ka cakava me kena na tamata sa lako vei koya.

5A sa waqa vakalevu mai na cudru i Tavita vua na tamata; a sa kaya vei Nacani, Me vaka sa bula ko Jiova, sa donu me mate na tamata sa cakava na ka o qo:

6ia ena sauma vakava na lami, e na vuku ni sa cakava na ka o qo, ka sega ni loloma.

7A sa kaya vei Tavita ko Nacani, Sai iko ga na tamata ko ya. Sa vosa vakaoqo ko Jiova na nodra Kalou na Isireli, Kaʼu a lumuti iko mo nodra tui na Isireli, ia kaʼu a vakabulai iko mai na liga i Saula;

8au a solia talega vei iko na nona vale na nomu turaga, kei iratou na wati ni nomu turaga ki na lomaseremu, au a solia talega vei iko na nodra mataqali na Isireli kei ira na Juta; ia kevaka sa lailai ko ya, kaʼu sa vakaikuritaka vei iko na ka vakavakaga.

9A cava ko sa beca kina na vosa i Jiova, me caka ca e matana? o a mokuti Uriya na luve i Eci e nai seleiwau, ka kauta na watina me watimu, ka vakamatei koya e na nodrai seleiwau na luve i Amoni.

10Ia o qo, ena sega ni lako tani nai seleiwau mai na nomu vale, ka tawa mudu; e na vuku ni ko sa beci au, ka kauta na wati i Uriya na luve i Eci me watimu:

11sa vosa vakaoqo ko Jiova, Raica, kaʼu na vakatubura vei iko na ca mai na nomu vale, ia kaʼu na kauti iratou na watimu e matamu, ka solia vua na wekamu, ia ena koto ko koya kei iratou na watimu e na mata ni siga o qo.

12Ni ko a cakava vakavuni ko iko; ia kaʼu na cakava na ka o qo e matadra kecega na Isireli, kei na mata ni siga.

13A sa kaya vei Nacani ko Tavita, Au sa valavala ca vei Jiova. A sa kaya vei Tavita ko Nacani, Sa kauta tani na nomui valavala ca ko Jiova; o na sega ni mate:

14ia e na vuku ga ni ko sa cakava me ra vosavakacaca ko ira na meca i Jiova e na vuku ni ka o qo, sa dina ni na mate talega na gone sa sucu vei iko.

15A sa lako yani ko Nacani ki na nona vale.

A sa yavita ko Jiova na gone ka vakasucuma vei Tavita ko na wati i Uriya, a sa malumalumu sara.

16A sa vakamasuta na Kalou ko Tavita e na vuku ni gone; a sa lolo ko Tavita, ka curu, ka koto e na qele ka siga mai.

17A sa tu cake ko iratou na qase ni nona vale vei koya, me vakaduria cake mai na qele; a sa bese ko koya, ka sega ni kana vata kei ira.

18Ia e na kenai kavitu ni siga sa ciba na gone. A ratou sa rere na tamata i Tavita ni tukuna vua ni sa mate tu na gone; ni ratou sa kaya, Raica, ni sa bula tiko na gone, edatou a vosa vua, ka sega ni vakarogoca na nodatou vosa ko koya: ena vakaevei na nona rarawa, ni datou sa tukuna vua ni sa mate tu na gone.

19Ia ni sa raica ko Tavita ni ratou sa va-kasolokakana ko iratou na nona tamata, sa qai kila ko Tavita ni sa mate tu na gone: a sa kaya ko Tavita vei iratou na nona tamata, Sa mate na gone, ne? A ratou sa kaya, Sa mate.

20Sa qai tu cake mai na qele ko Tavita, ka sisili, ka lumu, ka vakaisulutaki koya e nai sulu tani, ka laʼki curu ki na vale i Jiova, ka soro: sa qai lako ki na nona vale; ia ni sa vaka me kana, sa viritu na kakana vei koya, a sa kana ko koya.

21A sa kaya vua ko iratou na nona tamata, A cava na ka o qo ko ni sa cakava? ni sa bula tiko na gone, ko a lolo ka tagi e na vukuna; ia ni sa mate tu na gone, ko a tu cake ka kana.

22A sa kaya ko koya, Ni sa bula tikoga na gone, kaʼu a lolo ka tagi; niʼu a kaya, O cei e kila se na lomani au ko Jiova, se segai, me bula na gone?

23ia ni sa qai mate tu ko koya, meʼu qai lolo e na vuku ni cava? au na rawata li me kauti koya tale mai? au na lako ga vua, ia ko koya ena sega ni lesu mai vei au.

24A sa vakacegui Paci-sepa na watina ko Tavita, ka curu vua, ka koto kaya; a sa vakasucuma ko koya na goneatagane, a sa vakatoka na yacana, ko Solomoni: a sa lomani koya ko Jiova:

25a sa talai Nacani na parofita ko koya, ka vakatoka na yacana ko Yititia, e na vuku i Jiova.

26Ia sa vala tiko ko Yoapi kei Rapa, a ya sa nodra na luve i Amoni, a sa rawa na koro turaga ko ya.

27A sa tala e so nai talatala vei Tavita ko Yoapi, ka kaya, Au sa kabai Rapa oti, ka rawata na koro ni veiwai:

28ia mo vakasoqoni ira vata na tamata sa vo, ka buku na druadrua ni koro, ka rawa; deʼu sa rawata na koro koi au, a sa kacivi e na yacaqu.

29A sa vakasoqoni ira vata na tamata kecega ko Tavita, ka lako ki Rapa, ka kitaka kina nai valu, ka rawata.

30A sa kauta na nonai sala vakaturaga na nodra tui mai na uluna, a kena bibi e dua na taledi koula, kei na veivatu j dredre; a sa vakaisalataki kina na ulu i J Tavita. A sa kauta yani nai toki ni valu e na koro, na ka levu sara.

31A sa kauti ira yani na tamata sa tiko kina, ka lesi ira me cudruvi e nai varo, kei nai kadrukadru aironi ni qele, kei na matau aironi, ka kitaki ira me ra lako ki na yasana sa caka kina na vatu-buli: a sa cakacaka vakakina ki na nodra koro kecega na luve i Amoni. A sa lesu ki Jerusalemi ko Tavita kei ira kecega na tamata.