1A SA yaco ni sa oti na yabaki, e nai tabayabaki era sa daulako voli kina ko ira na tui, sa talai Yoapi ko Tavita, kei ira vata kaya na nona tamata, kei ira kecega na Isireli; a ra sa vakacacani ira na luve i Amoni, ka buku na druadrua mai Rapa: a sa tikoga mai Jerusalemi ko Tavita.
2Ia e na yakavi sa tu cake ko Tavita mai na nonai mocemoce, ka laʼki gade e na dela ni vale ni tui: a sa raica ko koya mai na dela ni vale e dua na alewa sa sisili tiko; a sa matavinaka sara na alewa.
3A sa talaki ko Tavita me taroga na alewa. A sa vaka, Sa sega li ni luve i Iliami, ko Paci-sepa, na wati i Uriya na luve i Eci, o qo?
4A sa tala e so nai talatala ko Tavita, ka kauti koya; a sa lako vei koya ko na alewa, a sa koto vata kaya ko koya; ni sa vakasavasavataki ko koya mai na nona qeleqelea: a sa lesu yani ki na nona vale.
5A sa bukete mai na alewa, ka sa talaki ka tukuna vei Tavita, ka vaka, Au sa bukete mai.
6A sa talaki vei Yoapi ko Tavita, ka vaka, Mo talai Uriya mai vei au, o koya na luve i Eci. A sa talai Uriya vei Tavita ko Yoapi.
7A sa lako vei koya ko Uriya, a sa tarogi koya ko Tavita, se sa vakaevei ko Yoapi, ka vakaevei ko ira na tamata, ka vakaevei nai valu.
8A sa kaya vei Uriya ko Tavita, Mo lako sobu ki na nomu vale, ka derea na yavamu. A sa lako yani e na vale ni tui ko Uriya, a sa muri koya na bilo kakana mai vua na tui.
9A sa moce vata kei ira kecega na tamata ni nona turaga ko Uriya, mai na katuba ni vale ni tui, ka sega ni lako sobu ki nona vale.
10A ra sa tukuna vei Tavita, ka vaka, Sa sega ni lako sobu ko Uriya ki na nona vale: sa qai kaya vei Uriya ko Tavita, O a sega li ni lako vakayawa mai? a cava ko a sega ni lako sobu kina ki na nomu vale?
11A sa kaya vei Tavita ko Uriya, Sa tiko na kato, kei ira na Isireli, kei ira na Juta, e na vale vaka-cevaceva; kei na noqu turaga ko Yoapi, kei ira na nona tamata na noqu turaga, era sa tiko wale e na dela ni qele; meʼu qai lako beka koi au ki na noqu vale, ka kana ka gunu, ka moce kaya na watiqu? me vaka sa bula ko iko, a sa bula na yalomu, au na sega ni kitaka na ka o qo.
12A sa kaya vei Uriya ko Tavita, Mo tiko eke edaidai talega, ia e na sabogibogi au na talai iko yani. A sa tikoga mai Jerusalemi ko Uriya e na siga ko ya, kei na sabogibogi.
13A sa kaciva ko Tavita, a sa kana ka gunu ko koya e matana; a sa vakamatenitaki koya ko koya: ia e na yakavi sa curu yani me laʼki i koto kei ira na tamata ni nona turaga e nonai mocemoce, ka sega ni lako sobu ki nona i vale.
14Ia e na sabogibogi, sa vola ko Tavita e dua nai vola vei Yoapi, a sa vakauta e na liga i Uriya.
15A sa vola e nai vola, ka kaya, Dou lesi Uriya me donuya na mata ni valu sa qaqa, ia dou qai lako tani vua, me moku ko koya, ka mate.
16Ia ni sa kabata tiko na koro ko Yoapi, sa lesi Uriya ki na tikina sa kila era sa tiko kina na tamata qaqa.
17A ra sa curu yani na lewe ni koro, ka veivala kei Yoapi; a sa bale e so vei ira na tamata nei Tavita; ka mate ko Uriya talega na luve i Eci.
18A sa talaki ko Yoapi ka tukuna vei Tavita nai tukutuku kecega ni valu;
19a sa vakarota vua sa tala ko koya, ka kaya, Ni ko sa tukuna oti nai tukutuku kecega ni valu vua na tui,
20ia kevaka sa tubu na cudru ni tui, a sa kaya ko koya vei iko, A cava dou a toro voleka kina ki na koro mo dou veivala? dou a sega beka ni kila era na vanavana mai na dela ni bai?
21o cei beka ka mokuti Epimeleki na luve i Yirupeseci? sa sega beka ni biuta sobu me lutuki koya na tiki ni vatu ni varo sila e dua na alewa, mai na dela ni bai, a sa mate kina mai Tipesi? a cava dou a toro voleka kina ki na bai? mo qai kaya, Sa mate tu na nomu tamata talega ko Uriya na luve i Eci.
22A sa lako yani ko koya ka talai, ka lako mai ka tukuna vei Tavita na ka kecega sa talai koya kina ko Yoapi.
23A sa kaya vei Tavita ko koya ka talai, Ni ra sa vala vakaqaqa vei keimami ko ira na tamata, ka curu mai vei keimami ki na veiwere, keimami a qai muri ira ka yacova nai sogo ni matamata-ni-koro:
24a ra sa vanai keimami na nomu tamata ko ira na dauvavana mai na dela ni bai; a sa mate e so vei ira na nona tamata na tui, a sa mate tu na nomu tamata talega ko Uriya na luve i Eci.
25A sa kaya ko Tavita vei koya sa talai, Mo vosa vakaoqo vei Yoapi, Me kakua ni ca vei iko na ka o qo, ni sa kana loa nai seleiwau: mo vakaukauwataka na nomui valu ki na koro, ka vukica: ia mo vakaqaqataki koya.
26A sa rogoca ko na wati i Uriya ni sa mate tu ko Uriya na watina, a sa tagicaka na watina.
27Ia ni sa oti na tagi, sa talaki ko Tavita ka kauti koya ki na nona vale, a sa yaco me watina alewa ko koya, ka vakasucuma vua e dua na luvena tagane. A sa ca e na mata i Jiova na ka sa cakava ko Tavita.
Who We AreWhat We EelieveWhat We Do
2025 by iamachristian.org,Inc All rights reserved.
