II. Ai Ni Vola I Samueli 8 - AI VOLA TABU（FIJ1864）

Sa vakamalumalumutaki ira ko Tavita na kai Filisitia, kei ira na Moapi, kei Etateseri, kei ira na kai Siria, 1-8. Sa vakacabora ko koya nai toki ni valu ki na Kalou, 9-12. Sa vakamalumalumutaki Siria kei Itomi, 13, 14. O iratou na tamata vakaturaga i Tavita, 15-18.

1A SA oti na ka o qo, sa qai yaviti ira na kai Filisitia ko Tavita, ka vakamalumalumutaki ira: a sa rawai Meceki-ama ko Tavita mai na ligadra na kai Filisitia.

2A sa mokuti ira na Moapi, a sa vakarauti ira e na wa-vakarau, ka vakabalei ira ki na qele: a sa vakarauta e na wa-vakarau e rua me vakamatea, ka dua na wa-vakarau taucoko, me vakabula: a ra sa yaco na kai Moapi me tamata nei Tavita, ka kauta mai nai vakacavacava.

3A sa yavita ko Tavita na luve i Riopi, ko Etateseri, na tui Sopa, ni sa lako ko koya me rawa tale na nona kaukauwa mai na uciwai ko Uferetisi.

4A sa rawata maivei koya ko Tavita e dua na udolu ka vitu na drau na tamata sa vodo e na ose, ka oba vakarua na tamata era lako e na yavadra: a sa vakalokilokitaka ko Tavita na veiose ni vale-vodoki kecega, a sa maroroya ga maivei ira na ose me rauta e dua na drau na vale-vodoki.

5A ra sa lako mai na kai Siria mai Tamasiko me vukei Etateseri na tui Sopa, a sa mokuta ko Tavita e oba vakarua ka rua na udolu na tamata vei ira na; kai Siria.

6A sa vakatikora na mataivalu ko Tavita e Siria mai Tamasiko: a ra sa yaco na kai Siria me tamata i Tavita, ka kauta nai vakacavacava. A sa vakabulai Tavita ko Jiova e na vanua kecega ka lako kina.

7A sa kauta ko Tavita na veisasa-bai koula sa nodra na tamata i Etateseri, ka kauta ki Jerusalemi.

8A sa kauta ko Tavita na tui na parasa, na ka levu sara, mai Peta kei Perocai, erau sa koro i Etateseri.

9A sa rogoca ko Toi na tui Emaci ni sa mokuta ko Tavita nai valu taucoko i Etateseri,

10a sa talai Yorami na luvena ko Toi vei Tavita na tui, me vakacegui koya, ka vosavakalougatataki koya, e na vuku ni sa kitaka nai valu vei Etateseri, ka mokuti koya (ni sa veivala oti kei Etateseri ko Toi): a sa kauta kaya ko Yorami nai yaya siliva kei nai yaya koula, kei nai yaya parasa:

11a ya talega sa cabora vei Jiova ko Tavita na tui, vata kei na siliva kei na koula sa cabora ko koya mai na veimatanitu kecega sa vakamalumalumutaka ko koya;

12mai Siria, kei Moapi, kei ira na luve i Amoni, kei ira na kai Filisitia, kei ira na Amaleki; kei nai toki ni valu mai vua na luve i Riopi, ko Etateseri, na tui Sopa.

13A sa vakarogotaka na yacana ko Tavita, ni sa lesu mai ni sa mokuta oti e lewe tinikawalu na udolu vei ira na kai Siria, mai na buca ni masima.

14A sa vakatikora ko koya na mataivalu ki Itomi; sa vakatikora ko koya na veimataivalu ki Itomi taucoko, a ra sa yaco kecega na kai Itomi me tamata nei Tavita.

A sa vakabulai Tavita ko Jiova e na vanua kecega sa lako kina.

15A sa nodra tui na Isireli kecega ko Tavita: a sa kitaka na lewa dodonu ko Tavita vei ira kecega na nona tamata.

16A sa lewai ira nai valu ko Yoapi na luve i Siruya; a sa dau vola na ka sa yaco ko Yiosafati, na luve i Eiiluti; i

17ia erau sa bete ko Satoki, na luve i Eiitupi, kei Eiimeleki, na luve i Epiyacari; a sa tamata dauvolavola ko Siruya;

18a sa turaga vei ira na Kireci, kei na Pileci, ko Pinaya, na luve i Yioyata; a sa turaga ko iratou na luve i Tavita.