II. Ai Ni Vola I Samueli 7 - AI VOLA TABU（FIJ1864）

Sa nanuma ko Tavita me tara na vale i Jiova; a sa kaya ko Jiova me kakua, ka mena qai tara ga ko na luvena, 1-17. Sa laʼki masu kina ko Tavita, ka vakavinavinaka, 18-29.

1IA ni sa mai tiko na tui e nona vale, a sa solia vua ko Jiova na vakacegu maivei ira kecega na nona meca era tiko volita;

2sa kaya na tui vei Nacani na parofita, Mo raica mada, oi au, kaʼu sa tiko e na vale sitari, ia na kato ni Kalou sa tiko e na maliwa ni veigatu.

3A sa kaya ko Nacani vua na tui, A ka kecega sa tu e lomamu mo laʼki cakava; ni sa vata kei iko ko Jiova.

4Ia e na bogi ko ya sa lako mai na vosa i Jiova vei Nacani, ka kaya,

5Mo laʼki kaya vua na noqu tamata ko Tavita, Sa vosa vakaoqo ko Jiova, O iko ko na tara beka e dua na vale vei au meʼu tiko kina?

6niʼu sa sega ni tiko e na dua na vale mai na siga kaʼu a kauti ira cake kina na luve i Isireli mai Ijipita, ka yacova na siga edaidai, ia kaʼu a lako voli ga e na vale malo, kei na vale-vakacevaceva.

7E na tikina kecega kaʼu a lako voli kina kei ira kecega na luve i Isireli, kaʼu a vosataka li e dua na vosa vua e dua vei ira na veiyavusa i Isireli, o ira kaʼu a vakarota me lewai ira na noqu tamata na Isireli, ka vaka, A cava dou sa sega kina ni tara e dua na vale sitari me noqu?

8Ia mo vosa kina vakaoqo vua na noqu tamata ko Tavita, Sa vosa vakaoqo ko Jiova ni lewe vuqa, Au a kauti iko mai na bai ni sipi, ni ko a muria na sipi, mo turaga vei ira na noqu tamata na Isireli:

9ia kaʼu a tiko kei iko e na vanua kecega ko a lako kina, ia kaʼu a muduka tani vei iko na nomu meca kecega, a sa vakarogotaka na yacamu, me vaka na yacadra na tamata rogo e vuravura:

10kaʼu a lesia e dua na tikina vei ira na noqu tamata na Isireli, ka tei ira, me ra tiko e nodra tikina dina ka sega ni yavala tale; a me kakua ni vakamalumalumutaki ira tale ko ira na tamata ca, me vaka eliu,

11me vaka mai na siga kaʼu a lesia kina me so na dauveilewai me lewai ira na noqu tamata na Isireli; ia kaʼu a vakacecegui iko mai na nomu meca kecega. A sa tukuna vei iko ko Jiova ni na vakatuburi iko ko Jiova mo qase ni dua na mataqali.

12Ni sa oti na nomu veisiga, ka ko sa koto vata kei ira na nomu qase, kaʼu na vakataudeitaka na nomu kawa, o koya sa muri iko, o ko va ka lako mai na yagomu, ia kaʼu na vakataudeitaka na nona matanitu.

13O koya ga ena tara na vale ki na yacaqu, ia kaʼu na vakataudeitaka nai tikotiko ni nona matanitu, ka tawa mudu.

14Au na tamana koi au, ia ena luvequ ko koya. Kevaka sa kitaka nai valavala ca ko koya, kaʼu na vunauci koya e na ka sa daucudruvi kina ko ira na tamata, kei na ka era sa dauyaviti kina ko ira na luve ni tamata:

15ia na noqu loloma ena sega ni kauti tani vua, me vaka kaʼu a kauta tani vei Saula, o koya kau a vakasivoka e matamu.

16Ia na nomu mataqali, kei na nomu matanitu, ena vakataudeitaki e matamu, ka tawa oti: ena vakataudeitaki ka tawa oti na nomui tikotiko vakaturaga.

17Sa vosa vei Tavita ko Nacani me vaka na vosa kecega o qo, kei na raivotu kecega o qo.

18A sa lako ko Tavita na tui, ka tiko e na mata i Jiova, a sa kaya, O cei koi au, Turaga Jiova? ka cava na noqu mataqali, ko sa kauti au mai kina ka yacova na gauna o qo?

19Ia ka sa ka lailai talega o qo e matamu, Turaga Jiova, ni ko sa vosataka talega na noqu mataqali, na nomu tamata, e na gauna sa bera sara ni yaco. Sa dauvakaoqo li na nodrai valavala na tamata, Turaga Jiova?

20Ia ka cava tale me kaya vei iko ko Tavita? ni ko sa kila, Turaga Jiova, na nomu tamata.

21E na vuku ni nomu vosa, ka me vaka na lomamu, ko sa cakava na ka levu kecega o qo, ka vakatakila vei au na nomu tamata.

22O koya sa levu kina ko iko, Jiova na Kalou: ni sa sega e dua sa tautauvata kei iko, ka sega na Kalou, o iko duaduaga, me vaka na ka kecega keitou sa rogoca e na daliga i keitou.

23Ia ko cei e dua na matanitu e vuravura me tautauvata kei ira na nomu tamata na Isireli, o ira ka lako kina na Kalou me volia me ra nona tamata, me vakarokorokotaki talega ko koya, ka cakava vei kemudou na ka levu kei na veika rerevaki, e na vuku ni nomu vanua, e na matadra na nomu tamata, o ira ko a volia me nomu mai Ijipita, mai na veimatanitu kei na nodra veikalou?

24Ia ko sa vakataudeitaki ira vei iko na nomu tamata na Isireli me ra nomu tamata ka tawa mudu: ia ko iko, Jiova, ko sa yaco me nodra Kalou.

25Ia o qo, Jiova na Kalou, na vosa ko a vosataka e na vuku ni nomu tamata, kei na vuku ni nona mataqali, mo vakataudeitaka mada, ka tawa mudu, ka kitaka me vaka ko a kaya.

26Ia me vakalevulevui na yacamu ka tawa mudu, ka vaka, Ko Jiova ni lewe vuqa sa nodra Kalou na Isireli; ia me vakataudeitaki e matamu na mataqali i Tavita na nomu tamata.

27Io ko iko, Jiova ni lewe vuqa, na nodra Kalou na Isireli, ko sa vakatakila ki na nomu tamata, ka vaka, Au na vakatuburi iko mo qase ni dua na mataqali; o koya sa doudou kina e na yalona na nomu tamata me masu vei iko e na masumasu o qo.

28Ia o qo, Turaga Jiova, o iko na Kalou, a sa dina na nomu vosa, ka ko sa yalataka na ka loloma o qo vei au na nomu tamata:

29ia o qo, me sa yalomu, mo vakalougatataka na mataqali ni nomu tamata, me tu ga e matamu, ka tawa mudu: ni ko sa vosataka, Turaga Jiova: ia me kalougata tawa mudu e na nomu kalougata na noqu mataqali, na nomu tamata.