II. Ai Ni Vola I Samueli 6 - AI VOLA TABU（FIJ1864）

Sa kauta mai na kato ni Kalou ko Tavita, 1-5. Sa mate ko Usa, a sa kau kina na kato ki na vale i Opeti-itomi, a sa kalougata kina ko Opeti-itomi, 6-11. Sa qai laʼki kauta mai na kato ki Saioni ko Tavita, a sa meke lako ni sa liutaka, a sa beci koya ko Mikali, 12-23.

1A SA vakasoqoni ira vata tale ko Tavita na tamata digitaki kecega, e tolu na oba, maivei ira na Isireli.

2A sa ia ko Tavita, kei ira kecega na tamata era sa vata kaya, ka lako yani mai Peali a nei Juta, ka me kauta cake maikea na kato ni Kalou, a ya sa vakayacani e na yaca i Jiova ni lewe vuqa, o koya sa tiko e na tadrua ni jerupi.

3A ra sa vakavodoka na kato ni Kalou ki na dua na vale-vakayavana vou, a ra sa kauta mai na vale i Epinatapi mai Kipia: a sa vakalalataka na vale-vakayavana vou ko Usa kei Ei io, oi rau na luve i Epinatapi.

4A ra sa kauta mai na vale i Epinatapi mai Kipia, a ra sa lako kaya na kato ni Kalou; a sa liutaka na kato ko Eiio.

5Ia era sa qiriqiri e na mata i Jiova ko Tavita, kei ira kecega na mataqali i Isireli, e na ka ni meke kecega sa caka e na kau paini, io e na veiapi kei na veiqiriqiri, kei na veilali, kei na veika tani ni meke.

6Ia ni ra sa yaco ki na rara ni samu sila nei Nakoni, sa dodo ko Usa ki na kato ni Kalou, ka taura; ni ra sa talaidredre na karavau.

7A sa waqa mai na cudru i Jiova vei Usa; a sa yaviti koya maikea ko na Kalou e na vuku ni cala; a sa mate maikea ko koya ka voleka ki na kato ni Kalou.

8A sa rarawa ko Tavita, e na vuku ni sa yaviti Usa ko Jiova: a sa vakayacana na tikina ko ya, ko Peresi-usa, ka yacova na siga o qo.

9A sa rere vei Jiova ko Tavita e na siga ko ya, ka kaya, Ena kauti vakacava mai vei au na kato i Jiova?

10A sa sega ni via kauta vua ko Tavita na kato i Jiova ki na koro i Tavita: a sa kauta vakatikitiki ko Tavita ki na vale i Opeti-itomi na kai Kaca.

11A sa tiko na kato i Jiova e na vale i Opeti-itomi na kai Kaca ka vula tolu: a sa vakalougatataki Opeti-itomi ko Jiova, kei iratou kecega na nona lewe-ni-vale.

12A sa tukuni vei Tavita na tui, ka vaka, Sa vakalougatataka ko Jiova na vale i Opeti-itomi, kei na nona ka kecega, e na vuku ni kato ni Kalou. A sa lako ko Tavita, ka kauta cake na kato ni Kalou mai na vale i Opeti-itomi ki na koro i Tavita e na marau.

13Ia ni ra sa lako ka cavuta oti vakaono na yavadra ko ira ka colata na kato i Jiova, sa cabora e so na karavau ka so na manumanu uro ko koya.

14A sa meke ko Tavita e na mata i Jiova e nona kaukauwa kecega; a sa vauci ko Tavita e na efoti malo.

15A sa kauta cake na kato i Jiova ko Tavita, kei na mataqali taucoko i Isireli, e na kaila kei na domo ni davui.

16Ia ni sa yaco ki na koro i Tavita na kato i Jiova, sa vakararai ko Mikali na luve i Saula mai na katuba, ka kunei Tavita na tui ni sa ladelade ka meke tiko e na matai Jiova; a sa beci koya e na lomana.

17A ra sa kauta na kato i Jiova, ka tauca e nona tikina, e lomani vale gatu ka birika ko Tavita me tu kina: a sa cabora ko Tavita e so nai soro kama ka so nai soro e na veivinakati e na mata i Jiova.

18Ia ni sa cabora oti ko Tavita na veisoro kama kei na veisoro e na veivinakati, sa vosavakalougatataki ira na tamata ko koya, e na yaca i Jiova ni lewe vuqa.

19A sa vota vei ira kecega na tamata, io vei ira na lewe vuqa kecega na Isireli, na tagane kei ira talega na alewa, ki na tamata yadua e dua nai buli madrai, kei na tiki ni lewe ni manumanu, kei na dua na tavaya waini. A ra sa lako yani na lewe vuqa, na tamata yadua ki na nona vale.

20A sa lesu ko Tavita me vosavakalougatataki ira na nona lewe-ni-vale. A sa curu yani ko Mikali me tavaki Tavita, a sa kaya, Sa lagilagi na tui Isireli edaidai, ne! o koya ka luvata na nonai sulu e na matadra na nodra vada na nona tamata, me vaka sa luvata votu na nonai sulu e dua vei ira na tamata lialia.

21A sa kaya vei Mikali ko Tavita, E na mata ga i Jiova, o koya ka digitaki au, ka biuti tamamu, kei na nona lewe-ni-vale kecega, ka vakarota vei au meʼu turaga vei ira na tamata i Jiova, io vei ira na Isireli: o koya o qo kaʼu a rereki kina e na mata i Jiova:

22ia kaʼu na vakaisini au vakalevu cake, ka malumalumu sara e na mataqu: ia ko ira na vada ko sa vosataka, kaʼu na vakarokorokotaki ga vei ira.

23A sa sega kina na luve i Mikali na luve i Saula, ka yacova na siga sa mate kina.