1A RA sa lako mai na veiyavusa kecega ni Isireli kivei Tavita ki Epironi, a ra sa kaya, Raica, sa suimu kei na lewemu koi keitou:
2ia e na gauna eliu, ni sa neimami tui ko Saula, sai iko gaka kauti ira yani ka kauti ira tale mai na Isireli: a sa kaya vei iko ko Jiova, O iko, ko na vakatawai ira na noqu tamata na Isireli, ia ko na turaga ni valu vei ira na Isireli.
3A ra sa lako mai vua na tui ki Epironi ko ira kecega na qase nei Isireli; a sa veiyalayalati kei ira ko koya na tui ko Tavita mai Epironi e na mata i Jiova: a ra sa lumuti Tavita me nodra tui na Isireli.
4Sa tolusagavulu na yabaki i Tavita ni sa mai tui; sa tui tiko ko koya ka yabaki vasagavulu.
5Sa nodra tui na Juta mai Epironi ka yabaki vitu ka vula ono; a sa nodra tui na Isireli kecega kei na Juta mai Jerusalemi ka yabaki tolusagavulu ka tolu.
6A sa lako ko koya na tui kei ira na nona tamata ki Jerusalemi kivei ira na kai Jepusa, nai taukei ni vanua: a ra sa vosa vei Tavita, ka kaya, O na sega ni curu mai kike, kevaka ko sa sega ni kauti ira tani na mataboko kei ira na lokiloki: ni ra sa kaya, Sa sega ni lako rawa mai kike ko Tavita.
7A sa kabata ga ko Tavita na koro kaukauwa mai Saioni; a ya na koro i Tavita.
8A sa kaya ko Tavita e na siga ko ya, O koya sa yaco ki nai kelikeli, ka yavita e dua na kai Jepusa, kei ira na mataboko kei ira na lokiloki sa cata sara ko Tavita, ena turaga ni valu ko koya. E na vuku ni ra sa kaya na mataboko kei na lokiloki, Ena sega ni lako mai ki na vale ko koya.
9A sa tiko ko Tavita e na koro kaukauwa ko ya, ka vakatoka, Na koro i Tavita. A sa tara voli na koro ko Tavita mai Milo ka kauta kiloma.
10A sa lakolako ko Tavita, ka yaco me levu, a sa totaki koya ko Jiova na Kalou ni lewe vuqa.
11Ia ko Irami na tui Teiri, sa tala vei Tavita e so nai talatala, kei na kau sitari, ka so na matai ni kau, ka so na matai ni vatu; a ra sa tara vei Tavita e dua na vale.
12Asa kila ko Tavita ni sa vakataudeitaki koya ko Jiova me nodra tui na Isireli, ka laveta cake na nona matanitu e na vukudra na nona tamata na Isireli.
13A sa kauta tale e so ko Tavita me watina lalai, ka so me watina dina, mai Jerusalemi, ni sa biuti Epironi oti: a ra sa sucu tale vei Tavita e so na luvena tagane kei na luvena alewa.
14A sa vakaoqo na yacadratou eratou sa sucu vua mai Jerusalemi; ko Samua, kei Sopapi, kei Nacani, kei Solomoni,
15kei Ipiari, kei Ilisua, kei Nefeki, kei Yafia,
16kei Ilisama, kei Eliyata, kei Ilifeleti.
17A ra sa rogoca na kai Filisitia ni ka lumuti ko Tavita me nodra tui na Isireli, a sa lako cake ko ira kecega na kai Filisitia me qarai Tavita; a sa rogoca ko Tavita, a sa lako sobu ki na koro kaukauwa.
18A ra sa lako mai na kai Filisitia, ka tiko raraba mai na buca ko Refeimi.
19A sa tarogi Jiova ko Tavita, ka kaya, Meʼu lako cake vei ira na kai Filisitia, se kakua? o na soli ira ki na ligaqu, se segai? A sa kaya vei Tavita ko Jiova, Mo lako cake ga; niʼu na soli ira vakaidina na kai Filisitia ki na ligamu.
20A sa lako ko Tavita ki Peali-pirasimi, a sa mokuti ira maikea ko Tavita, a sa kaya, Sa gumatua vei ira na noqu meca e mataqu ko Jiova, me vaka sa gumatua na veiwai. O koya o qo sa vakatoka kina na yaca ni tikina ko ya, ko Peali-pirasimi.
21A ra sa biuta maikea na nodra veimatakau, a sa kauta tani ko Tavita kei ira na nona tamata.
22A ra sa lako tale kicake ko ira na kai Filisitia, ka tiko raraba mai na buca ko Refeimi.
23A sa tarogi Jiova ko Tavita, a sa kaya ko koya, Mo kakua ni lako cake; mo lako voli ka muri ira, ka lutuki ira ni ko sa donuya na kau o qori:
24ia ni ko sa rogoca na rorogo ni yavavala e na veitaba ni kau o qori, mo qai yavala; ni na liutaki iko yani ko Jiova, me mokuta na nodrai valu na kai Filisitia.
25A sa kitaka vakakina ko Tavita, me vaka sa vakarota vua ko Jiova; a sa mokuti ira na kai Filisitia mai Kepa ka yaco sara ki Keseri.
Who We AreWhat We EelieveWhat We Do
2025 by iamachristian.org,Inc All rights reserved.
