II. Ai Ni Vola I Samueli 4 - AI VOLA TABU（FIJ1864）

E rua na tamata sa mokuti. Isi-poseci, ka kauta na uluna vei Tavita, 1-8. Sa vakamatei rau kina ko Tavita, 9-12.

1IA ni sa rogoca na luve i Saula ni sa mate tu ko Epineri mai Epironi, sa malumalumu na ligana, a ra sa kidroa ko ira kecega na Isireli.

2A sa rua na nona tamata na luve i Saula erau turaga ni mataivalu: na yacana e dua ko Peana, ia na yaca ni kenai karua ko Rekapi, erau luve i Rimoni na kai Pieroci, o koya sa dua vei ira na luve i Penijamini: (ni sa kainaki sa nei Penijamini ko Pieroci:

3a ra sa dro oti ki Kiteimi na kai Pieroci: a ra sa tiko vulagi kina ka yacova na gauna o qo.)

4Ia sa dua na luve i Jonacani na luve i Saula, a sa lokiloki na yavana ruarua. Sa lima na nona yabaki ni sa kau mai Isirieli nai rogo kei Saula kei Jonacani, a sa laveti koya cake na alewa sa susuga, a sa dro: ia ni sa kusarawa ni dro ko koya, sa bale na gone, a sa lokiloki kina. Ia na yacana ko Mifiposeci.

5A rau sa lako na luve i Rimoni na kai Pieroci, ko Rekapi kei Peana, a rau sa lako mai, ni sa katakata na siga, ki na vale i Isi-poseci, a sa koto ko koya e nai kotokoto ni sa siga levu.

6A rau sa lako mai kikea ki loma ni vale, me kauta na witi; a rau sa cokai koya e na ketena: a sa dro bula ko Rekapi kei Peana na tuakana.

7Io, ni rau sa lako mai ki vale, sa davo ko koya e nonai mocemoce e nona vale ni moce, a rau sa mokuti koya, ka vakamatei koya, ka tamusuka na uluna, ka kauta na uluna, ka lako yani e na sala mai na buca e na bogi ko ya ka siga.

8A rau sa kauta na ulu i Isi-poseci kivei Tavita ki Epironi, a rau sa kaya vua na tui, Raica, na ulu i Isi-poseci na luve i Saula na nomu meca, o koya ka qarai iko mo mate; sa cudruvaka ko Jiova na noqu turaga na tui vei Saula kei na nona kawa e na siga edaidai.

9A sa vosa ko Tavita vei Rekapi kei Peana na tuakana, erau luve i Rimoni na kai Pieroci, a sa kaya vei rau, Me vaka sa bula ko Jiova, o koya sa Vakabula na yaloqu mai na ka rarawa kecega,

10ni sa tukuna vei au e dua, ka vaka, Raica, sa mate tu ko Saula, a sa nanuma ko koya ni sa kauta mai nai rogorogo vinaka, kaʼu a qai taura ka vakamatea mai Sikilaki: ia sa ka o qo kaʼu a covi koya kina:

11e vakaevei ni ra sa vakamatea e dua na tamata yalododonu e na nona vale, e na nonai kotokoto, ko ira na tamata ca? ia o qo, meʼu kakua beka ni taroga na kena dra mai na ligamudrau, ka vakarusai kemudrau tani mai vuravura?

12A sa vakarota ko Tavita vei ira na cauravou, a ra sa vakamatei rau, ka muduka tani na ligadrau kei na yavadrau, ka vakarubeca kicake mai na mata-ni-wai mai Epironi. A ra sa kauta na ulu i Isi-poseci, ka buluta e nai bulubulu i Epineri mai Epironi.