II. Ai Ni Vola I Samueli 3 - AI VOLA TABU（FIJ1864）

Sa kaukamea cake tiko ko Tavita, 1; a yacadratou na luve i Tavita sa sucu mai Epironi, 2-5. Sa veileti ko Epineri kei Isi-poseci, a sa totaki Tavita kina ko Epineri, 6-21. Sa mokuti Epineri vakaca ko Yoapi, a sa cata ko Tavita, 22-30. Sa tagicaki Epineri ko Tavita, ka buluti koga, 31-39.

1A SA ia vakadede nai valu vei ira na mataqali i Saula kei na mataqali i Tavita: a sa tubu me kaukauwa tiko ko Tavita, a sa malumalumu sobu tiko na mataqali i Saula.

2A sa sucu vei Tavita mai Epironi e so na luvena tagane: a nona ulumatua ko Aminoni, o koya sa maivei Eiinoami na kai Isirieli;

3kei na kenai karua ko Kiliapi, o koya sa maivei Epikaili na wati i Napali na kai Karimeli; kei na kenai katolu, ko Episalomi na luve i Meeka na luve i Talimei, na tui Kesuri;

4kei na kenai kava, ko Etoniya na luve i Akici; kei na kenai kalima, ko Sifatiya na luve i Epitali;

5kei na kenai kaono, ko Iciriami, o koya sa maivei Ekila na wati i Tavita. O iratou o qo, eratou sa sucu vei Tavita mai Epironi.

6Ia ni sa ia tiko nai valu vei ira na mataqali i Saula kei na mataqali i Tavita, sa vakaukauwataki koya ko Epineri e na vuku ni mataqali i Saula.

7A sa dua na watina lailai ko Saula, a yacana ko Risipa na luve i Eya: a sa kaya vei Epineri ko Isi-poseci, A cava ko a curu kina vua na watina lailai ko tamaqu?

8A sa waqa vakalevu mai na cudru i Epineri e na vuku ni vosa i Isi-poseci, a sa kaya, Oi au beka na ulu ni koli nei Juta? au sa caka vinaka e na gauna o qo ki na mataqali i Saula na tamamu, kei iratou na tacina, kei na wekana, ka sega ni soli iko ki na liga i Tavita; ia ko sa beitaki au ga me ca edaidai e na vuku ni alewa ko ya.

9Me cakacaka vakakina na Kalou vei Epineri, ka vakaikuritaka, kevaka kaʼu sa sega ni cakacaka vei Tavita me vaka sa vosavavakini ko Jiova;

10meʼu kauta tani na matanitu mai na mataqali i Saula, ka vakatura cake nai tikotiko vakaturaga nei Tavita me lewai ira na Isireli kei ira na Juta, mai Tani ka yacovi Pieri-sepa.

11A sa sega ni vosa tale rawa vei Epineri ko koya, e na vuku ni sa rerevaki koya.

12A sa tala ko Epineri me kenai sosomi e so nai talatala vei Tavita, ka kaya, A nei cei na vanua? a sa kaya tale, Me daru veiyalayalati, ka, raica, ena tiko kei iko na ligaqu me saumaki ira kecega na Isireli vei iko.

13A sa kaya ko koya, E vinaka; au na ia na veiyalayalati kei iko; sa dua ga na ka kaʼu sa kerea vei iko, o qori, mo sega ni raica na mataqu kevaka ko sa sega ni kauti Mikali mai, na luve i Saula, ni ko sa mai raica na mataqu.

14A sa tala ko Tavita e so nai talatala vei Isi-poseci na luve i Saula, ka kaya, Mo solia mai na watiqu ko Mikali, o koya kaʼu a rawata me noqu e na dua na drau na vusodra na kai Filisitia.

15A sa talaki ko Isi-poseci, ka kauti koya maivei koya na watina, maivei Palitieli, na luve i Leisi.

16A sa lako kaya na watina tagane, ka tagi lako ga ni sa muri koya ki Peurimi. Sa qai kaya vua ko Epineri, Mo lako, mo lesu yani. A sa lesu yani ko koya.

17A sa veivosaki ko Epineri kei ira na qase nei Isireli, a sa kaya ko koya, Dou a qarai Tavita eliu me nomudou tui:

18ia dou qai cakava: ni sa vosataki Tavita ko Jiova, ka vaka, E na ligana na noqu tamata ko Tavita kaʼu na vakabulai ira na noqu tamata na Isireli mai na ligadra na kai Filisitia, kei na ligadra na nodra meca kecega.

19A sa vosa talega ko Epineri e na daligadra na Penijamini: a sa lako ko Epineri me vosataka e na daliga i Tavita mai Epironi na ka kecega sa vinaka vei ira na Isireli, kei ira kecega na mataqali i Penijamini.

20A sa lako mai vei Tavita ki Epironi ko Epineri, kei iratou vata kaya na tamata e lewe ruasagavulu. A sa caka magiti ko Tavita vei Epineri kei iratou na tamata eratou sa vata kaya.

21A sa kaya vei Tavita ko Epineri, Au na ia ka lako, ka vakasoqoni ira vata kecega na Isireli vei iko na noqu turaga na tui, ka me ra ia na veiyalayalati kei iko, mo lewai ira kecega sa vinakata ko na yalomu. A sa talai Epineri yani ko Tavita; a sa lako ko koya e na vakacegu.

22Ia, raica, era sa tale mai ko ira na tamata i Tavita kei Yoapi mai na mataivalu, a sa levu nai toki era sa kauta mai; a sa sega ni tiko kei Tavita mai Epironi ko Epineri; ni sa talai koya yani oti ko koya, a sa lako e na vakacegu.

23Ia ni sa lako mai ko Yoapi, kei ira kecega nai valu era sa vata kaya, sa tukuni vei Yoapi, ka vaka, Sa lako mai vei koya na tui ko Epineri, na luve i Neri, a sa laivi koya me lako ko koya, a sa lako yani e na vakacegu.

24A sa lako mai ko Yoapi vua na tui, a sa kaya, A cava ko sa cakava? raica, ka lako mai vei iko ko Epineri; a cava ko a talai koya yani kina, a sa lako laivi ko koya?

25o sa kilai Epineri, na luve i Neri, ni ka lako mai ko koya me vakacalai iko, ka me kila na nomu veilakoyaki, ia me kila na ka kecega ko sa cakava.

26A sa lako tani ko Yoapi maivei Tavita, a sa tala e so nai talatala me muri Epineri, a ratou sa vakalesui koya mai na mata-ni-wai mai Sira; a sa sega ni kila ko Tavita.

27Ia ni sa lesu mai ki Epironi ko Epineri, sa kauti koya vakatikitiki ki na matamata-ni-koro ko Yoapi, me vosa vuni vua, a sa cokai koya maikea e na ketena, e na vuku ni dra i Asaeli na tacina, a sa mate kina ko koya.

28A sa rogoca emuri ko Tavita, a sa kaya, Sa tawa cala koi au, kei na noqu matanitu, e na mata i Jiova, ka tawa mudu, e na vuku ni dra i Epineri, na luve i Neri:

29me tauca na ulu i Yoapi, kei na mataqali taucoko i tamana; ia me kakua ni mudu mai na mataqali i Yoapi na tamata sa turusibalavu, se na vukavuka, se dua sa ravita nai titoko, se dua e baleta nai seleiwau, se dua e dravudravua e na kakana.

30A rau sa vakamatei Epineri ko Yoapi kei Episai na tacina, e na vuku ni ka vakamatei Asaeli na tacidrau mai Kipioni ko koya, ni sa ia nai valu.

31A sa kaya ko Tavita vei Yoapi, kei ira kecega na tamata era sa vata kaya, Dou dresulaka na nomudoui sulu, ka vauci kemudou e nai sulu ca, ka tagi e na vuku i Epineri. A sa muria na tavata ko Tavita na tui.

32A ra sa buluti Epineri mai Epironi: a sa tabalaka na domona ko na tui, ka tagi mai nai bulubulu i Epineri; a sa tagi ko ira kecega na tamata.

33A sa lelevaki Epineri ko na tui, ka kaya, Me mate li ko Epineri me vaka sa mate na tamata ca?

34sa sega ni vesuki na ligamu, a sa sega ni vakacurumi ki nai vesu kaukamea na yavamu: me vaka na bale e matadra na tamata ca, sa vakakina na nomu bale. A sa tagicaki koya tale ko ira kecega na tamata.

35A sa lako mai ko ira kecega na tamata me vakani Tavita ni sa siga toka; a sa vosavavakini ko Tavita, ka kaya, Me cakacaka vakakina vei au na Kalou, ka vakaikuritaka, kevaka kaʼu sa tovolea na madrai, se dua na ka tani, a me dromu oti mada na siga.

36A ra sa vakasama na tamata kecega, a sa vinaka vei ira; a sa vinaka vakakina vei ira kecega na tamata na ka kece sa cakava ko na tui.

37A sa kila ko ira kecega na tamata kei ira kecega na Isireli e na siga ko ya, ni sa sega ni vu vei koya na tui na vakamatei Epineri, na luve i Neri.

38A sa kaya na tui vei ira na nona tamata, Dou sa sega beka ni kila ni sa bale e Isireli edaidai o qo e dua na turaga kei na tamata rogo?

39ia koi au, kaʼu sa lumuti tu me tui, ia kaʼu sa malumalumu ga edaidai o qo; ia eratou sa tamata dredre vei au ko iratou o qo na luve i Siruya: ena sauma ko Jiova na nona ca vei koya sa kitaka na ca.