II. Ai Ni Vola I Samueli 2 - AI VOLA TABU（FIJ1864）

Sa lako ki Epironi ko Tavita, a sa buli me tui Juta. 1-4. Sa talaki ki Yapesi, 5-7. Sa buli me tui Isireli ko Isi-poseci, 8-11. Era sa vala na tamata i Tavita kei na tamata i Isi-poseci, 12-32.

1IA sa oti na ka o qo, sa qai tarogi Jiova ko Tavita, ka kaya, Meʼu lako cake ki na dua na koro nei Juta, se kakua? A sa kaya vua ko Jiova, Mo lako cake. Asa kaya ko Tavita, Meʼu lako cake kivei? A sa kaya ko koya, Ki Epironi.

2A sa lako cake kina ko Tavita, kei rau talega na watina, ko Eiinoami na kai Isirieli, kei Epikaili na wati i Napali na kai Karimeli.

3A sa kauti ira cake na nona tamata era vata kaya ko Tavita, na tamata yadua kei na nona lewe-ni-vale: a ra sa tiko e na Veikoro ki Epironi.

4A ra sa lako mai na tamata Juta, a ra sa lumuti Tavita maikea me nodra tui na mataqali i Juta.

A ra sa tukuna vei Tavita, ka vaka, Era kai Yapesi-kiliati ko ira era sa buluti Saula.

5A sa talaki ko Tavita vei ira na kai Yapesi-kiliati, ka kaya vei ira, Me vakalougatataki kemudou ko Jiova, ni dou a cakava na ka vinaka o qo vua na nomudou turaga, vei Saula, ni dou a buluti koya.

6Ia me qai caka ka vinaka vei kemudou ko Jiova, kei na ka dina: ia koi au talega, kaʼu na sauma vei kemudou na ka vinaka o qo, e na vuku ni dou a cakava na ka o qo.

7Ia o qo, me kaukauwa na ligamudou, ka dou qaqa: ni sa mate tu ko Saula na nomudou turaga, a ra sa lumuti au me nodra tui na mataqali i Juta.

8Ia ko Epineri na luve i Neri, na turaga ni valu nei Saula, sa kauti Isi-poseci na luve i Saula, ka kauti koya mai ki Meeneimi;

9ka buli koya me nodra tui na Kiliati, kei na Asuri, kei na kai Isirieli, kei na Ifireimi, kei na Penijamini, kei ira kecega na Isireli.

10Sa vasagavulu na nona yabaki ko Isi-poseci na luve i Saula ni sa buli me nodra tui na Isireli, a sa tui tiko ka yabaki rua. A sa muri Tavita na mataqali i Juta ga.

11Ia na kena dede ni sa tui mai Epironi ko Tavita vei ira na mataqali i Juta, e vitu na yabaki ka ono na vula.

12A sa lako tani mai Meeneimi ki Kipioni ko Epineri na luve i Neri, kei ira na tamata i Isi-poseci na luve i Saula,

13A sa lako yani ko Yoapi na luve i Siruya kei ira na tamata i Tavita, a ra sa laʼki veitavaki kei ira mai na mata-ni-wai ki Kipioni, a ra sa tiko ko ira o qo e na kena yasa o qo ni mata-ni-wai, kei ira o qori e na kena yasa ko ya ni mata-ni-wai.

14A sa kaya vei Yoapi ko Epineri, Me ra ia mada na cauravou, ka qito e matada. A sa kaya ko Yoapi, Me ra ia ga.

15A ratou sa ia, ka lako e lewe tinikarua na kedratoui wili vei ira na Penijamini, eratou sa nei Isi-poseci na luve i Saula, kei na lewe tinikarua talega na tamata i Tavita.

16A ra sa dui taura na uluna na kenai kania, ka cokavaka na nonai seleiwau ki na sarisarina; a ra sa bale sobu vata: a sa vakatokai kina na tikina ko ya Na yasa ni veiseleiwau, a ya mai Kipioni.

17A sa ia nai valu kaukauwa sara e na siga ko ya; a sa gu ca ko Epineri, kei ira na tamata Isireli, vei ira na tamata i Tavita.

18A ratou sa tiko maikea na luve i Siruya eratou lewe tolu, ko Yoapi, kei Episai, kei Asaeli: ia sa yava mamada ko Asaeli me vaka e dua na koti ni veikau.

19A sa cicimuri Epineri ko Asaeli; a sa lakolako, ka sega ni lako tani ki nai matau se nai mawi ni sa muri Epineri.

20A sa rai kimuri ko Epineri, ka kaya, O iko ko Asaeli, se segai? A sa kaya ko koya, Koi au.

21A sa kaya vua ko Epineri, Mo lako tani ki na ligamu i matau se na ligamu i mawi, ka taura e dua vei ira na cauravou, ka kauta vei iko na nonai yaragi. A sa bese ni lako tani vua ko Asaeli.

22A sa kaya tale vei Asaeli ko Epineri, Mo lako tani mo kakua ni muri au: meʼu mokuti iko ki na qele mei cavai? au na qai ta cake vakaevei na mataqu vua na tuakamu ko Yoapi?

23A sa bese ga ni lako tani ko koya: a sa cokai koya e ketena ko Epineri e na dule ni moto, a sa basika sara kimuri na moto: a sa bale sobu maikea, ka mate maikina: ia sa tu vakadua ko ira kecega era yaco ki na tikina sa bale ka mate kina ko Asaeli.

24A sa muri Epineri ko Yoapi kei Episai: a sa dromu na siga ni ra sa yacova na vanua-cecere mai Ama, a ya sa tu e na mata i Kia, e na sala e na veikau ki Kipioni.

25A ra sa soqo vata na luve i Penijamini ka muri Epineri, a ra sa yaco me matai valu e dua, ka ra sa tu e dela ni dua na vanua-cecere.

26A sa kaci vei Yoapi ko Epineri, ka kaya, Me kanakana tiko li nai seleiwau, ka tawa mudu? o sa sega beka ni kila ni na ka gaga na kenai vakataotioti? ena vakaevei tale na kena dede, mo sega ni kaya kina vei ira na tamata me ra lesu yani, me ra kakua ni muri ira na wekadra?

27A sa kaya ko Yoapi, Me vaka sa bula na Kalou, kevaka ko a sega ni vosa, sa qai lako yani vakaidina e na mataka ko ira na tamata, me kakua ni muria na wekana ko ira yadua.

28A sa uvuca na davui ko Yoapi, a ra sa tu vakadua kecega na tamata, ka sega ni muri ira tiko na Isireli, ka sega ni kitaka tale nai valu.

29A sa lako yani e na buca ko Epineri kei ira na nona tamata e na bogi ko ya ka siga, ka lako-kosova na Joritani, ka lako yani ka basiki Picironi taucoko, ka yaco ki Meeneimi.

30A sa lesu mai ko Yoapi me kakua ni muri Epineri: ia ni sa vakasoqoni ira vata kecega na tamata ko koya, sa yali vei ira na tamata i Tavita e tinikaciwa na tamata kei Asaeli.

31Ia ko ira na tamata i Tavita era sa mokuta vei ira na Penijamini, kei ira na tamata i Epineri, me mate kina e tolu na drau ka onosagavulu na tamata.

32A ra sa kauti Asaeli, ka buluti koya e nai bulubulu i tamana, a ya mai Pecileema. A sa lakolako ko Yoapi kei ira na nona tamata e na bogi ko ya ka siga, a sa kida na mataka vei ira mai Epironi.