1IA ni sa mate oti ko Saula, a sa lesu mai ko Tavita ni sa mokuti ira oti na Amaleki, sa tiko ka bogi rua mai Sikilaki ko Tavita:
2ia e nai katolu ni siga, raica, sa lako mai e dua na tamata mai nai tikotiko ni valu nei Saula, a sa kadresu na nonai sulu, a sa tu e na uluna na qele: ia ni sa lako mai vei Tavita, sa bale ki na qele ko koya, ka vakarokoroko.
3A sa kaya vua ko Tavita, O sa lako maivei? A sa kaya vua ko koya, Au sa dro bula mai na nodrai tikotiko na Isireli.
4A sa kaya vua ko Tavita, A cava na ka sa kitaki? mo tukuna mada mai vei au. A sa kaya ko koya, Era sa dro mai nai valu ko ira na tamata, a sa lewe vuqa vei ira na tamata sa bale ka mate; a sa mate ko Saula talega kei Jonacani na luvena.
5A sa kaya ko Tavita vua na cauravou sa tukuna vua, O sa kila vakaevei ni sa mate tu ko Saula kei Jonacani na luvena?
6A sa kaya ko koya na cauravou sa tukuna vua, Niʼu a lako loa mai na ulu-ni-vanua ko Kilipoa, raica, sa ravita na nona moto ko Saula, ka raica, sa muri koya voleka na vale-vodoki kei ira na tamata sa vodo lako e na veiose:
7ia ni sa rai kimuri ko koya, sa kunei au, a sa kacivi au, kaʼu a kaya, Oi au.
8A sa kaya vei au, O cei ko iko? kaʼu a kaya vua, Sa dua vei ira na Amaleki koi au.
9A sa kaya vei au, Mo tu mada e delaqu, ka vakamatei au: ni sa tauri au na rarawa levu, e na vuku ni sa tikoga e lomaqu na noqu bula.
10Ia kaʼu a tu e delana, ka vakamatei koya, niʼu a kila ena sega ni bula rawa ni sa bale oti: ia kaʼu a taura nai sala vakaturaga sa vakaisala kina na uluna, kei na qato sa vaqato kina na ligana, ia kaʼu a kauta mai kike vei iko na noqu turaga.
11A sa taura na nonai sulu ko Tavita, ka dresulaka; kei ira talega na tamata kece era vata kaya:
12a ra sa tagi ka yaso, ka lolo ka yakavi mada, e na vuku i Saula, e na vukuna talega ko Jonacani na luvena, e na vukudra talega na tamata i Jiova, e na vukudra talega na mataqali nei Isireli; e na vuku ni ra a bale e nai seleiwau.
13A sa kaya ko Tavita vua na cauravou sa tukuna vua, O sa lako maivei? A sa kaya ko koya, Sa luve ni dua na kai tani, na Amaleki, koi au.
14A sa kaya vua ko Tavita, E vakaevei ni ko a sega ni rere ni dodoka yani na ligamu me vakarusai koya ka lumuta ko Jiova?
15A sa kaciva e dua vei ira na cauravou ko Tavita, ka kaya, Mo toro, mo lutuki koya. A sa mokuta vakamatea ko koya.
16A sa kaya vua ko Tavita, Sa dodonu na nomu mate; ni sa beitaki iko na gusumu, ni ko sa kaya, Au sa vakamatei koya ka lumuta ko Jiova.
17A sa lelevaki Saula, kei Jonacani na luvena, ko Tavita e na lele o qo: (
18a sa vakarota me vakatavulici vei ira na luve i Juta ko Na dakai: raica, sa volai e nai vola i Yeseri:)
19Sa vuetaki na nodrai ukuuku na Isireli e na nomu veitikina cecere: ule, sa bale ko ira na kaukauwa!
20Dou kakua ni tukuna mai Kaca, dou kakua ni rogotaka e na veisalatu mai Asikiloni: de ra reki na nodra gonealewa na kai Filisitia, de ra cibi na nodra gonealewa na tawa cili.
21Oi kemudou na ulu-ni-vanua ko Kilipoa, me kakua na tegu, me kakua na uca e tauci kemudou, me kakua na veiwere ni veimadrali; ni sa biu tani maikina na nodrai sasabai na qaqa; nai sasabai i Saula, me vaka sa sega ni lumuti tu e nai wali.
22Mai na nedra dra era sa moku, mai na nodra uro na qaqa, sa sega ni gole tani na dakai i Jonacani, ka sega ni lesu wale nai seleiwau i Saula.
23O Saula kei Jonacani, erau sa lomani ka vinakati ni rau sa bula, ka sega ni tawase ni rau sa mate: erau a kusakusa, ka berabera na ikeli, erau a kaukauwa, ka malumalumu na laioni.
24Oi kemudou na gonealewa nei Isireli, dou tagicaki Saula, o koya ka vakaisulutaki kemudou e nai sulu damudamu, kei na ka domoni, o koya ka vakaiukuukutaka na nomudoui sulu e na koula.
25Ule, era sa bale na kaukauwa e na maliwa ni valu! sa vakamatei ko Jonacani e na nomu veitikina cecere!
26au sa rarawa vakalevu e na vukumu, na wekaqu Jonacani: o sa vinaka sara vei au: sa ka veivakidacalataki na nomu loloma vei au, sa lailai na nodra loloma na alewa.
27Ule, era sa bale na kaukauwa, ka rusa nai yaragi ni valu.
Who We AreWhat We EelieveWhat We Do
2025 by iamachristian.org,Inc All rights reserved.
