Ai I Vola I Simueli 31 - AI VOLA TABU（FIJ1864）

Sa vala kei ira na Isireli ko ira na kai Filisitia, a sa mate ko Saula kei na luvena e tolu, 1-6. Era sa biuta na nodra veikoro ko ira na Isireli, a ra sa tiko kina ko ira na kai Filisitia, 7. Era sa vakota na yago i Saula ki na bai mai Peci-sani, a ra sa lako vakaqaqa na kai Yapesi, ka kauta mai, 8-13.

1IA sa ia nai valu vei ira na Isireli ko ira na kai Filisitia: a ra sa dro ko ira na Isireli e na matadra na kai Filisitia, ka bale mate mai na ulu-ni-vanua ko Kilipoa.

2A ra sa cicivi Saula, kei iratou na luvena, ko ira na kai Filisitia; ia ko irana kai Filisitia, era sa mokuti Jonacani, kei Epinatapi, kei Malikisua, o iratou na luve i Saula.

3A sa gumatua vei Saula nai valu, a sa lau gasau ko koya vei ira na tamata dauvavana; a sa vuetaki vakalevu vei ira na dauvavana.

4A sa kaya ko Saula vua sa daucolata na nonai yaragi, Ucuna na nomui seleiwau, ka cokai au kina; de ra lako mai na tamata tawa cilivi o qo, ka cokai au, ka vakaisini au. A sa bese ko koya sa daucolata na nonai yaragi; ni sa rere vakalevu. A sa taura ko Saula nai seleiwau, ka baleta.

5Ia ni sa raica ko koya sa daucolata na nonai yaragi ni sa mate tu ko Saula, sa baleta ko koya talega na nonai seleiwau, ka mate vata kaya.

6A sa mate vata ko Saula, kei iratou na luvena e lewe tolu, kei koya sa daucolata na nonai yaragi, kei ira na nona tamata kecega, e na siga ko ya.

7Ia ni sa raica ko ira na tamata Isireli era sa tiko e na yasa kadua ni buca, kei ira era tiko mai tai kadua ni Joritani, ni ra sa dro na tamata Isireli, a sa mate tu ko Saula kei iratou na luvena, era sa qai biuta na nodra veikoro, ka dro; a ra sa lako mai ka tiko kina na kai Filisitia.

8Ia e na sabogibogi, era sa lako na kai Filisitia me luvata na nodra veisulu era sa moku, a ra sa kunei Saula kei iratou na luvena e tolu, ni ratou sa bale tu e na ulu-ni-vanua ko Kilipoa.

9A ra sa tamusuka na uluna, ka luvata tani na nonai yaragi, ka talaki voli e na nodra vanua na kai Filisitia, me tukuna e na vale ni nodra veimatakau, vei ira talega na tamata.

10A ra sa tokara na nonai yaragi e na vale nei Aseteroci, a ra sa vakota na yagona ki na bai ni koro mai Peci-sani.

11Ia ni ra sa rogoca na kai Yapesi-kiliati na ka sa kitaka vei Saula ko ira na kai Filisitia,

12era sa ia ko ira kecega na tamata qaqa, ka lako e na bogi taucoko ko ya, ka kauta tani na yago i Saula, kei na yagodratou na luvena, mai na bai ni koro mai Peci-sani, ka tale mai ki Yapesi, ka vakamai iratou maikina.

13A ra sa kauta na suidratou, ka buluta e ruku ni dua na kau mai Yapesi, ka lolo ka bogi vitu.