Ai I Vola I Simueli 30 - AI VOLA TABU（FIJ1864）

Era sa kabai Sikilaki ko ira na Amaleki, ka vakabobulataka na wati i Tavita, kei na wekadra na nona tamata, 1-6. Sa taroga na Kalou ko Tavita, a sa qai laʼki muri ira na Amaleki, 7-10. Era sa sota kaya e dua na kai Ijipita, a sa tukutuku rei Tavita, ka kauta vei ira na Amaleki, 11-15. Sa mokuti ira ko Tavita, ka vakabulai ira na bobula, ka taura nai toki ni valu e levu sara, 16-31.

1IA ni sa lako mai ko Tavita kei ira na nona tamata ki Sikilaki e nai katolu ni siga, era sa curuma vakaivalu ko ira na Amaleki na vanua mai na mata ni ceva, kei Sikilaki, ka mokuti Sikilaki, ka vakama e na buka;

2a ra sa vakabobulataki ira na alewa era sa tiko kina: era sa sega ni vakamatea e dua e lailai se dua e levu, ka sa kauti ira yani ga, ka lako yani e nodrai lakolako.

3A ra sa lako mai ki na koro ko Tavita kei ira na nona tamata, ka raica, sa vakamai e na buka; a sa vakabobulataki ko ira na watidra, kei ira na luvedra tagane, kei ira na luvedra alewa.

4A sa tabalaka na domodra ko Tavita kei ira na tamata era vata kaya, a ra sa tagi, ka yali kina vei ira na kaukauwa me ra tagi tiko.

5A sa vakabobulataki na watina ruarua ko Tavita, ko Eiinoami na kai Isirieli, kei Epikaili na wati i Napali na kai Karimeli.

6A sa rarawa vakalevu ko Tavita, ni ra sa kaya na tamata me lauviri ko koya e na vatu, e na vuku ni sa rarawa na yalodra na tamata kecega, na tamata yadua e na vukudratou na luvena tagane kei iratou na luvena alewa: a sa vakaukauwataki koya ga ko Tavita e na vuku i Jiova na nona Kalou.

7A sa kaya ko Tavita vei Epiyacari na bete, na luve i Eiimeleki, Mo kauta mada mai vei au na efoti. A sa kauta mai na efoti kivei Tavita ko Epiyacari.

8A sa tarogi Jiova ko Tavita, ka kaya, Meʼu muria na mataivalu ko ya, se kakua? au na vauci ira, se segai? A sa kaya vua ko koya, Mo muria; ni ko na vauca vakaidina, ka ia vakaidina na veivakabulai.

9A sa lako yani ko Tavita kei ira na tamata e lewe ono na drau era vata kaya, a ra sa yacova na uciwai ko Pisori, a ra sa tiko kina ko ira ka murimuri:

10a sa cici ga ko Tavita kei ira na tamata e lewe va na drau: ni sa toka e rua na drau na tamata, era sa malumalumu, ka sega ni lako-kosova rawa na uciwai ko Pisori.

11A ra sa kunea mai na were e dua na kai Ijipita, a ra sa kauta kivei Tavita, a ra sa solia vua na kakana, a sa kana ko koya; a ra sa vagunuva e na wai;

12a ra sa solia vua e dua na tiki ni buli lolo, ka rua nai yawa vaini: ia ni sa kana ko koya, sa lesu mai vei koya na yalona: ni sa sega ni kana, se gunu wai, ka tolu na siga ka tolu na bogi.

13A sa kaya vua ko Tavita, A tamata i cei ko iko? o a lako tale maivei? A sa kaya ko koya, Sa cauravou ni Ijipita koi au, a nona tamata e dua na Amaleki: a sa biuti au na noqu turaga, niʼu a tauvi mate, ka sa qai bogi tolu:

14keimami a kabata na vanua ki na mata ni ceva vei ira na Kireci, o qori talega sa nei Juta, kei na vanua ki na mata ni ceva vei ira na Kalepi; ia ko Sikilaki keimami a vakama e na buka.

15A sa kaya vua ko Tavita, O sa kauti au sobu rawa vei ira nai valu ko ya, se segai? A sa kaya ko koya, Mo vosavavakini vei au e na yaca ni Kalou, ni ko na sega ni vakamatei au, se soli au yani ki na ligana na noqu turaga, kaʼu na qai kauti iko sobu ki na mataivalu ko ya.

16Ia sa kauti koya sobu ko koya, ka raica, era sa tiko raraba e na dela ni vanua, a ra sa kana ka gunu tiko, ka marau tiko, e na vuku ni toki levu kece era a kauta mai na nodra vanua na kai Filisitia, kei na nodra vanua na Juta.

17A sa mokumokuti ira ko Tavita mai na kida ni mataka ka yacova na yakavi e na sabogibogi: a sa sega ni bula e dua na tamata vei ira, e va ga na drau na cauravou era vodoka na veikameli ka dro.

18A sa rawata tale ko Tavita na ka kecega era a kauta ko ira na Amaleki: a sa Vakabula ko Tavita na watina ruarua,

19A sa sega ni yali vei ira e dua na ka, se lailai se levu, se na luvedra tagane se na luvedra alewa, se nai toki, se dua na ka era a kauta me nodra: sa rawata tale kecega ko Tavita.

20Sa kovea talega ko Tavita kecega na sipi, kei na karavau; era sa vakauta me liutaka na nodra manumanu, a ra sa kaya, O qo nai toki ni valu nei Tavita.

21A sa lako mai ko Tavita vei ira na tamata e rua na drau, era a malumalumu ka sega ni muri Tavita rawa, ko ira era a tiko mai na uciwai ko Pisori: a ra sa lako yani me tavaki Tavita, me tavaki ira talega na tamata era vata kaya: ia ni sa torovi ira na tamata ko Tavita, sa veikidavaki kei ira.

22A ra sa vosa ko ira na tamata ca kecega, kei ira sa vaka na vu-ni-ca, maivei ira era a lako kei Tavita, a ra sa kaya, Keitou na sega ni solia vei ira e dua na ka e nai toki keitou a taura, e na vuku ni ra sa sega ni lako kei keitou, a watina ga kei iratou na luvena na tamata yadua, me ra tuberi ira, ka lako yani.

23A sa kaya ko Tavita, Dou kakua ni cakacaka vakaoqo, na wekaqu, e na ka sa solia vei keda ko Jiova, o koya sa vakabulai keda, ka solia ki na ligada nai valu sa mai kabai keda:

24ia ko cei ena vakarorogo vei kemudou e na ka o qo? me vaka na nonai votavota sa lako sobu ki nai valu, sa na vakakina na nonai votavota sa tiko kei na yau: ena tautauvata na nodrai votavota.

25Ia mai na siga ko ya sa lesia ko koya vei ira na Isireli mei vunau kei na ka sa ia tiko, ka yacova na siga o qo.

26Ia ni sa lako mai ki Sikilaki ko Tavita, sa vakauta e so nai toki vei ira na qase ni Juta, io vei ira na wekana, ka kaya, Raica, e dua na ka-ni-loloma vei kemudou e nai toki maivei ira na meca i Jiova;

27io, vei ira era tiko mai Peceli, vei ira talega mai Ramoci-nekipa, vei ira talega mai Yatiri,

28vei ira talega mai Aroeri, vei ira talega mai Sifimoci, vei ira talega mai Esitimoa,

29vei ira talega mai Rakali, vei ira talega era tiko e na nodra Veikoro na kai Yiramieli, vei ira talega era tiko e nodra veikoro na Kenai,

30vei ira talega mai Orima, vei ira talega mai Kori-asani, vei ira talega mai Ataki,

31vei ira talega mai Epironi, kei na tikina kecega sa dautiko voli kina ko Tavita kei ira na nona tamata.