Ai I Vola I Simueli 29 - AI VOLA TABU（FIJ1864）

Sa nanuma ko tui Kaca me lako ko Tavita e na nonai valu, a ra sa bese ni laiva ko ira na turaga, a sa qai talai Tavita yani ko tui Kaca.

1A RA sa soqona vata ki Efeki na nodra mataivalu kecega ko ira na kai Filisitia: a ra sa laʼki tiko ko ira na Isireli mai na dua na mata-ni-wai mai Isirieli.

2A ra sa lako yani vakadrau, ka vakaudolu, na nodra turaga na kai Filisitia; a sa lako emuri ko Tavita kei ira na nona tamata vata kei Akisi.

3A ra sa kaya na nodra turaga na kai Filisitia, Sa vakaevei ko ira na Iperiu o qo? A sa kaya ko Akisi vei ira na nodra turaga na kai Filisitia, O Tavita o qo, se segai, na tamata nei Saula na tui Isireli, o koya sa tiko vei au e na veisiga o qo, se na veiyabaki o qo, ia kaʼu sa sega ni kunea vua e dua na ka ca mai na siga sa vuki kina, ka yacova na siga o qo?

4A ra sa cudru vua ko ira na nodra turaga na kai Filisitia; a ra sa kaya vua ko ira na nodra turaga na kai Filisitia, Mo vakalesuya na tamata, me laʼki lesu ki na nona tikina ko sa lesi koya kina, ia me kakua ni lako sobu kei keda ki nai valu, de sa noda meca ni sa ia nai valu: ia a cava ena veivinakati kina kei na nona turaga ko koya o qo? sa sega li e na uludra na tamata o qo?

5sa sega beka ni Tavita o qo, o koya era sa vei vosataki kina ni ra kitaka na meke, ka kaya, Sa mokuta na nona veiudolu ko Saula, kei na nona veiudolu vakatini ko Tavita?

6Sa qai kacivi Tavita ko Akisi, ka kaya vua, Me vaka sa bula ko Jiova, sa dina vakakina ni ko sa yalododonu, a sa vinaka e mataqu na nomu veilakoyaki kei au e nai valu; niʼu sa sega ni kunea na ca vei iko mai na siga ko a lako mai kina vei au, ka yacova na siga o qo; ia ko sa sega ni vinaka e matadra na turaga:

7mo qai lesu, ka lako e na vakacegu, mo kakua ni ca kina e matadra na nodra turaga na kai Filisitia.

8A sa kaya vei Akisi ko Tavita, Ia ka cava kaʼu sa cakava? ka cava ko sa kunea vei au na nomu tamata mai na siga kaʼu a mai tiko kina e matamu, ka yacova na siga o qo, meʼu kakua kina ni lako me kitaka nai valu vei ira na nona meca na noqu turaga na tui.

9A sa vosa ko Akisi, ka kaya vei Tavita, Au sa kila ni ko sa vinaka e na mataqu, me vaka e dua na agilose ni Kalou: a ra sa kaya ga na nodra turaga na kai Filisitia, Me kakua ni lako cake kei keda ki nai valu ko koya.

10O koya mo qai sou e na sabogibogi kei ira na nona tamata na nomu turaga era a lako vata mai kei iko; ia ni dou sa sou e na mataka, a sa rarama vei kemudou na vanua, dou qai lako yani.

11A sa sou e na mataka ko Tavita, ko koya kei ira na nona tamata, me lako yani e na sabogibogi, me lesu ki na nodra vanua na kai Filisitia. A ra sa lako cake ki Isirieli ko irana kai Filisitia.