Ai I Vola I Simueli 28 - AI VOLA TABU（FIJ1864）

Sa vala ko ira na Isireli kei ira na kai Filisitia, a sa qara e dua na alewa daucurumi ko Saula me tukuna vua se na vakaevei nai valu, 1-11 Sa rairai vua ko Samueli, ka tukuna vua ni sa voleka mai na nona mate, 12-25.

1IA e na veisiga ko ya, era sa soqona vata na nodra veimataivalu ko ira na kai Filisitia, me kitaka nai valu; me ra veivala kei ira na Isireli. A sa kaya vei Tavita ko Akisi, Mo kila sara ni ko na lako kei au ki nai valu, o iko kei ira na nomu tamata.

2A sa kaya vei Akisi ko Tavita, O ni na kila vakaidina na ka sa cakava rawa na nomu tamata. A sa kaya vei Tavita ko Akisi, O koya o qo kaʼu sa lesi iko kina me vakatawai au tikoga.

3A sa mate eliu ko Samueli, a sa tagicaki koya oti ko ira kecega na Isireli, ka buluta mai Rama, io e na nona koro ga.

A sa vakaseavutaki ira tani mai na vanua ko Saula ko ira era sa daucurumi, kei ira na dauveinita.

4A ra sa soqo vata ko ira na kai Filisitia, ka lako mai ka tiko mai Sunemi: a sa soqoni ira vata kecega na Isireli ko Saula, a ra sa laʼki tiko mai Kilipoa.

5Ia ni sa raica ko Saula na nodrai valu na kai Filisitia, sa rere, ka sautaninini vakalevu na lomana.

6A sa tarogi Jiova ko Saula, a sa sega ni vosa vua ko Jiova e na tadra, se na Urimi, se na gusudra na parofita.

7A sa kaya ko Saula vei ira na nona tamata, Dou qara vei au e dua na alewa sa daucurumi, meʼu lako vua, ka tarogi koya. A ra sa kaya vua ko ira na nona tamata, Raica, sa mai Eni-tori e dua na alewa daucurumi.

8A sa via vuni koya ko Saula, ka suluma e so nai sulu tani, ka lako, ko iratou kei na tamata e lewe rua, a ratou sa lako mai vua na alewa e na bogi: a sa kaya ko koya, Mo cakai sausau mada e na vukuqu ni ko sa curumi, ka kauti koya cake mai vei au kaʼu na cavuta vei iko.

9A sa kaya vua ko koya na alewa, Raica, ko sa kila na ka sa cakava ko Saula, ni sa vakamatei ira laivi era sa daucurumi, kei ira era sa dauveinita, mai na vanua; ia a cava ko sa via corita kina na noqu bula, meʼu vakamatei?

10A sa vosavavakini vua ko Saula e na yaca i Jiova, ka vaka, Me vaka sa bula ko Jiova, ena sega ni yacovi iko na ka ca e na vuku ni ka o qo.

11A sa kaya ko koya na alewa, O cei ko koya meʼu kauta cake mai vei iko? A sa kaya ko koya, Mo kauti Samueli cake mai vei au.

12Ia ni sa raici Samueli ko koya na alewa, sa qoqolou vakadomoilevu: a sa vosa na alewa vei Saula, ka kaya, A cava ko sa vakaisini au kina? ni sai Saula ga ko iko.

13A sa kaya vua ko koya na tui, Mo kakua ni rere; ni sa cava ko a kunea? A sa kaya na alewa vei Saula, Na kalou kaʼu a raica, ni sa lako cake mai loma ni qele.

14A sa kaya vua ko koya, Sa tautauvata kei na cava? A sa kaya ko koya, Sa lako cake mai e dua na tamata qase; a sa ubi e nai sulu. A sa kila ko Saula ni sai Samueli, a sa vakalakala ki na qele na matana, a sa cuva.

15A sa kaya vei Saula ko Samueli, A cava ko sa vakaocai au kina, ka kauti au mai kicake? A sa kaya ko Saula, Au sa bitaki vakalevu; ni ra sa mai kabai au na kai Filisitia, a sa lako tani vei au na Kalou, ka sega tale ni vosa vei au, sa sega e na gusudra na parofita, se na tadra; ia kaʼu a kacivi iko kina, mo vakatakila vei au na ka meʼu cakava.

16A sa kaya ko Samueli, Ia ka cava ko sa tarogi au kina, ni sa lako tani vei iko ko Jiova, a sa yaco me nomu meca?

17a sa cakacaka ko Jiova me vaka na nona vosa kaʼu a tukuna; ni sa dresuka maivei iko na matanitu ko Jiova, ka solia vua na kai nomu, io vei Tavita:

18e na vuku ni ko a sega ni vakarorogo ki na domo i Jiova, ka sega ni kitaka vei ira na Amaleki me vaka na nona cudru waqawaqa, o koya o qo sa cakava kina vei iko edaidai na ka o qo ko Jiova.

19Ia ena soli ira talega ko Jiova na Isireli vata kei iko ki na ligadra na kai Filisitia: ia ko iko, kei iratou na luvemu, dou na tiko vata kei au e na sabogibogi: ena solia talega ko Jiova na nodrai valu na Isireli ki na ligadra na kai Filisitia.

20A sa bale vakasauri e na yagona taucoko ki na qele ko Saula, a sa rere vakalevu e na vuku ni vosa i Samueli; a sa sega tale vua na kaukauwa; ni sa sega ni kana e na siga taucoko kei na bogi taucoko ko ya.

21A sa toro vei Saula na alewa, ka raica ni sa taqaya vakalevu ko koya, a sa kaya vua, Raica, sa vakarorogo na nomu vada ki domomu, kaʼu sa viria ki ligaqu na noqu bula, ka talairawarawa ki na nomu vosa ko a vosataka vei au:

22ia mo qai rogoca mada ko iko na domo ni nomu vada, ka meʼu viritu e matamu e dua na tiki ni kakana; ia mo kana, mo kaukauwa kina, ni ko sa lako yani e na sala.

23A sa bese ko koya, ka kaya, Au na sega ni kana. Ia eratou sa cikevi koya, koi rau na nona tamata kei koya na alewa; a sa vakarorogo ko koya ki na domodratou. A sa duri cake mai na qele ko koya, ka tiko e nai mocemoce.

24A sa tiko vua na alewa mai vale e dua na luve ni karavau sa vakani me uro; a sa kusarawa ko koya, ka vakamatea, ka kauta na madrai droka, ka natuka, ka vavia kina na madrai tawa vakaleveni:

25a sa kauta ki na mata i Saula, ki na matadrau talega na nona tamata; a ratou sa kana. Eratou sa qai tu cake, ka lako yani e na bogi ko ya.