Ai I Vola I Simueli 27 - AI VOLA TABU（FIJ1864）

Sa laʼki tiko kei tui Kaca ko Tavita, ni sa rerevaki Saula, 1-4. Sa soli vua ko Sikilaki, 5-7. Sa ia nai valu ko koya, a sa tukuna cala vei tui Kaca, 8-12.

1A SA kaya e lomana ko Tavita, Au na qai mate e na dua na siga e na liga i Saula; sa sega na ka e vinaka vei au, ka meʼu dro sara ga ki na nodra vanua na kai Filisitia; ena qai kua soti ko Saula ni qarai au tale e na nodra yasana kecega na Isireli: au na qai bula mai na ligana.

2A sa ia ko Tavita, ka lako yani vua na tui Kaca, ko Akisi na luve i Maoki, ko koya kei ira na tamata e lewe ono na drau era vata kaya.

3A sa tiko kei Akisi mai Kaca ko Tavita kei ira na nona tamata, na tamata yadua kei na nona lewe-ni-vale, io ko Tavita kei rau na watina e rua, ko Eiinoami na kai Isirieli, kei Epikaili na wati i Napali na kai Karimeli.

4A sa tukuni vei Saula ni sa dro ki Kaca ko Tavita; sa qai sega ni qarai koya tale.

5A sa kaya ko Tavita vei Akisi, Kevaka kaʼu sa kune loloma e matamu, me soli vei au e dua na tikina e na dua na koro e vanua, meʼu tiko kina; ia me tiko mei cavai kei iko na nomu tamata e na koro turaga?

6A sa soli Sikilaki vua ko Akisi e na siga ko ya: o koya sa nodra koro kina na tui Jutia ko Sikilaki, ka yacova na siga o qo.

7Ia na kena dede ni sa tiko ko Tavita e na nodra vanua na kai Filisitia, sa dua na yabaki ka va na vula.

8A sa lako cake ko Tavita kei ira na nona tamata, ka kabati ira na kai Kesuri, kei ira na kai Keseri, kei ira na Amaleki: ni ra sai taukei ni vanua mailiu ko ira o qo, e na gau-ni-sala ki Suri, ka yacova na vanua ko Ijipita.

9A sa mokuta na vanua ko Tavita, ka sega ni Vakabula e dua na tagane se dua na alewa, ka kauta yani na veisipi, kei na veikaravau, kei na veiasa, kei na veikameli, kei na veisulu, ka lesu mai, ka lako vei Akisi.

10A sa kaya ko Akisi, Dou sa sega beka ni vala edaidai. A sa kaya ko Tavita, Keitou sa vala kei ira mai na mata ni ceva ki Jutia, kei ira mai na mata ni ceva vei ira na kai Yiramieli, kei ira mai na mata ni ceva vei ira na kai Kenai.

11A sa sega ni vakabula ko Tavita e dua na tagane se dua na alewa, me tukutuku ki Kaca, ni sa kaya, De ra tukuni keda, ka vaka, Sa cakacaka vakaoqo ko Tavita: ia sa vakakina na nonai valavala e na veisiga kecega sa tiko kina e na nodra vanua na kai Filisitia.

12A sa vakadinati Tavita ko Akisi, ni sa kaya, Sa vakaboicataki ko koya vei ira na kai nona, na Isireli; ia ena noqu tamata kina ko koya ka tawa mudu.