1A RA sa lako mai kivei Saula ki Kipia ko ira na kai Sifi, ka kaya, Sa sega li ni vuni koya ko Tavita e na vanua-cecere ko Ekila, a ya sa koto e na mata ni Veikau?
2A sa ia ko Saula, ka lako sobu ki na veikau mai Sifi, vata kei na tolu na udolu na tamata era sa digitaki tu vei ira na Isireli, me ra qarai Tavita e na veikau mai Sifi.
3A sa laʼki tiko ko Saula e na dela ni vanua-cecere ko Ekila, a ya sa donuya na Veikau, e na bati ni sala. A sa tiko e na veikau ko Tavita; a sa raica ni sa mai muri koya ki na veikau ko Saula:
4sa qai tala ko Tavita e so na tamata me yamata, a sa kila kina ni sa lako vakaidina mai ko Saula.
5A sa ia ko Tavita, ka lako mai ki na tikina ka tiko kina ko Saula: a sa raica ko Tavita na tikina sa koto kina ko Saula, kei Epineri na luve i Neri, na turaga ni nonai valu: a sa tiko ko Saula e na yasana ni veivale-vakayavana, a ra sa koto vaka volivolita ko ira na tamata.
6A sa vosa ko Tavita, ka kaya vei Eiimeleki na luve i Eci, vua talega na luve i Siruya, ko Episai, na taci i Yoapi, ka kaya, O cei me daru lako sobu kaya vei Saula ki nai tikotiko? A sa kaya ko Episai, Au na lako sobu kei iko.
7A rau sa lako mai kivei ira na tamata e na bogi ko Tavita kei Episai; ka, raica, sa moce koto ko Saula e na yasana ni veivale-vakayavana, a sa cokataki tu e na qele na nona moto ka voleka ki na uluna: a sa koto vakavolivoliti koya ko Epineri kei ira na tamata.
8A sa kaya ko Episai vei Tavita, Sa solia edaidai na nomu meca ki na ligamu na Kalou: ia o qo, meʼu cokai koya vakadua mada e na moto ki na qele, ia kaʼu na sega ni vakaruataka vei koya.
9A sa kaya vei Episai ko Tavita, Mo kakua ni vakamatea; o cei me dodoka na ligana vua ka lumuta ko Jiova, ka sega ni cala?
10Sa kaya talega ko Tavita, Me vaka sa bula ko Jiova, ena mokuti koya ko Jiova; se na yaco na nona siga ena mate loa kina, se na lako sobu ki nai valu, ka ca kina:
11me yawa sara vei au e na vuku i Jiova meʼu dodoka yani na ligaqu vua ka lumuta ko Jiova; ia mo kauta mada na moto sa tu mai na uluna, kei na saqa wai, me daru qai lako.
12A sa kauta ko Tavita na moto kei na saqa wai mai na ulu i Saula; a rau sa lako yani, a sa sega na tamata e kunea, ka sega e kila, ka sa sega e dua sa yadra mai: ni ra sa moce kecega; e na vuku ni sa lutuki ira na moce lutu maivei Jiova.
13A sa lako yani ki na yasa kadua ko Tavita, ka tu vakayawa e na dela ni ulu-ni-vanua, me ra sa veiyawaki sara kei ira:
14a sa kaci vei ira na tamata ko Tavita, vei Epineri talega na luve i Neri, ka kaya, O sa sega beka ni vosa mai, Epineri? A sa vosa mai ko Epineri, ka kaya, O cei ko iko sa kacikaci vua na tui?
15A sa kaya vei Epineri ko Tavita, Sa sega li ni tamata ko iko, sa sega e tautauvata kaya vei ira na Isireli? ia ka cava ko sa sega ni vakatawa kina na nomu turaga na tui? ni ka lako e dua na tamata me vakamatea na tui na nomu turaga.
16Sa sega ni vinaka na ka o qo ko sa cakava. Me vaka sa bula ko Jiova, e dodonu mo dou mate, e na vuku ni dou sa sega ni vakatawa na nomudou turaga, o koya ka lumuta ko Jiova. Ia dou qai raica se sa evei na nona moto na tui, kei na saqa wai ka tu mai na uluna.
17A sa kua na domo i Tavita ko Saula, ka kaya, O qo na domomu, na luvequ Tavita, ne? A sa kaya ko Tavita, A domoqu ga, noqu turaga na tui.
18A sa kaya ko koya, A cava sa muria kina vakaoqo na nona tamata na noqu turaga? a cava kaʼu sa cakava? se cava na ca sa tu vei au?
19Ia o qo, me rogoca mada ko na noqu turaga na tui na vosa ni nona tamata. Kevaka sa ko Jiova sa vakauqeti iko mo noqu meca, me bau vinakata ko koya e dua nai madrali; ia kevaka era luve ni tamata, me vakarusai mada ko ira e na mata i Jiova; ni ra sa vakasevi au tani edaidai meʼu kakua ni tiko e na vanua i Jiova, ka ra kaya, Mo laʼki qarava e so na kalou tani.
20O koya me qai kakua ni lutu ki na qele na noqu dra e na mata i Jiova; ni sa lako voli mai na tui Isireli me qara e dua na nana, me vaka sa vakasavi na toa ni veikau mai na veiulu-ni-vanua.
21A sa kaya ko Saula, Au sa valavala ca: mo lesu mai, na luvequ Tavita: niʼu na sega ni vakacacani iko tale, e na vuku ni sa ka talei e matamu na noqu bula e na siga edaidai: raica, kaʼu sa caka vakalialia, ka cala vakalevu sara.
22A sa vosa ko Tavita, ka kaya, Raica, na nona moto na tui! ia me lako mai e dua vei ira na cauravou, ka kauta.
23Ia me sauma ko Jiova na nona yalododonu na tamata yadua kei na nona yalodina: ni sa soli iko ko Jiova ki na ligaqu edaidai, ia kaʼu a bese ni dodoka yani na ligaqu vua ka lumuta ko Jiova.
24Ka, raica, me vaka sa ka levu e mataqu na nomu bula e na siga o qo, me ka levu vakakina na noqu bula e na mata i Jiova, ka me vakabulai au ko koya mai na ka rarawa kecega.
25A sa kaya ko Saula vei Tavita, Mo kalougata, na luvequ Tavita; o na cakacaka, ka gumatua tikoga. A sa lako yani ko Tavita e nonai lakolako, a sa lesu mai ko Saula ki na nona tikina.
Who We AreWhat We EelieveWhat We Do
2025 by iamachristian.org,Inc All rights reserved.
