Ai I Vola I Simueli 25 - AI VOLA TABU（FIJ1864）

Sa mate ko Samueli, 1. Sa talaki vei Napali ko Tavita, a sa kolai laʼki cudruvi koya e na vuku ni nona vosa, 2-13. A sa vakayalovinakataki koya ko Epikaili e na nona vosa vinaka, 14-35. Sa mate ko Napali, a rau sa qai veiwatini ko Tavita kei Epikaili, 36-42.

1A SA mate ko Samueli; a sa soqo vata ko ira kecega na Isireli, ka tagicaki koya, ka buluti koya e na nona vale mai Rama.

A sa ia ko Tavita, ka lako sobu ki na veikau mai Perana.

2A sa dua na tamata mai Maoni, sa tiko mai Karimeli na nona yau; a sa vutuniyau sara na tamata ko ya, ia sa tolu na udolu na nona sipi ka dua na udolu na nona koti: a sa ia tiko ko koya na veikoti ni nona sipi mai Karimeli.

3Ia na yaca ni tamata ko Napali; ka sa yaca i watina ko Epikaili: a sa dua na alewa yalomatua ko koya, a sa matavinaka; ia ka sa yalotakelo na tagane, ka ca na nonai valavala; a sa dua vei ira na Kalepi ko koya.

4A sa rogoca mai na veikau ko Tavita ni sa kotiva tiko na nona sipi ko Napali:

5sa qai tala ko Tavita e tini na cauravou, a sa kaya ko Tavita vei iratou na cauravou, Dou lako cake ki Karimeli, ka lako vei Napali, ka tarogi koya e na yacaqu, se sa vinaka ko koya se segai:

6ia dou vosa vakaoqo vua sa tiko vinaka, Mo vakacegu ko iko, ka me vakacegu na nomu lewe-ni-vale, ia me tu na vakacegu ki na nomu ka kecega.

7Ia kaʼu sa qai rogoca ni sa tiko kei iko ko iratou na dauveikoti: ia eratou a tiko kei keitou ko iratou na nomui vakatawa ni manumanu, ia keitou a sega ni vakacacani iratou, a sa sega e dua na ka sa yali vei iratou e na gauna kece eratou a tiko kina mai Karimeli.

8Mo tarogi iratou na nomu cauravou, ka ratou na tukuna vei iko. Ia me ratou kune loloma e matamu ko iratou na cauravou: ni keitou sa lako mai e na siga vinaka: mo solia mada kivei ira na nomu tamata, kei na luvemu ko Tavita, e so na ka sa tu vei iko.

9A sa lako ko iratou na cauravou i Tavita, ka vosataka vei Napali na vosa kecega ko ya e na yaca i Tavita, ka cegu.

10A sa vosa mai ko Napali vei iratou na tamata i Tavita, ka kaya, O cei ko Tavita? ia ko cei na luve i Isei? era sa lewe vuqa na tamata e na veisiga o qo sa biuta yadua na nona turaga, ka dro:

11ia meʼu taura beka na noqu kakana, kei na noqu wai, kei na noqu lewe ni manumanu kaʼu sa vakamatea me kedratou na noqu tamata dauveikoti, ka solia vei ira na tamata kaʼu sa sega ni kila se ra maivei?

12A sa goleva na nodratou sala ko iratou na cauravou i Tavita, ka lesu tale, ka lako ka tukuna vua na vosa kecega o qo.

13A sa kaya ko Tavita vei ira na nona tamata, Dou vauca vua na tamata yadua na nonai seleiwau. A sa vauca na nonai seleiwau vei koya ko ira yadua na tamata; a sa vauca ko Tavita talega na nonai seleiwau vei koya: a ra sa muri Tavita cake e va beka na drau na tamata; a sa rua na drau era tikoga kei na yau.

14A sa dua vei ira na cauravou sa tukuna vei Epikaili na wati i Napali, ka kaya, Raica, sa tala ko Tavita e so nai talatala mai na veikau me veikidavaki kei na neitou turaga; a sa cudrucudru vei iratou ko koya.

15Ia era a caka vinaka sara vei keitou ko ira na tamata, ka sega ni yacovi keitou na ca, ka sega e dua na ka sa yali vei keitou e na veisiga kecega keitou a tiko lako kei ira, ni keitou a tiko e na veiwere:

16era a neitou bai ga e na bogi kei na siga, e na veisiga kecega keitou a tiko kina kei ira, ni keitou a vakatawa tiko na sipi.

17Ia o qo, mo kila ka vakasama na ka mo cakava; ni sa nakiti na ka ca me yacova na neitou turaga, kei ira kece na nona lewe-ni-vale: ni sa luve ni vu-ni-ca ko koya me sega e dua me vosa rawa vua.

18A sa kusarawa ko Epikaili, ka kauta e rua na drau nai buli madrai, ka rua na tavaya waini, ka lima na sipi sa cokonaki oti, ka lima nai vakarau sila tavu, ka dua na drau nai yawa vaini, ka rua na drau nai buli lolo, ka tauca ki na veiasa:

19a sa kaya vei ira na nona cauravou, Dou lako yani ka liutaki au; raica, au sa muri kemudou yani. A sa sega ni tukuna ko koya vei Napali, na watina.

20Ia ni sa vodo lako e na asa, ka lako sobu ki ruku ni ulu-ni-vanua, raica, sa lako sobu me tavaki koya ko Tavita kei ira na nona tamata; a sa laʼki toro vei ira ko koya.

21A sa kaya eliu ko Tavita, E dina ni sa sega ni yaga na noqu vakatawa na nena ka kecega na tamata o qo mai na veikau, ka sega kina e dua na ka sa yali vua e nona ka kecega: ia ka sa vuki ca vei au, mei sau ni ka vinaka.

22Me cakacaka vakakina na Kalou kivei ira na meca i Tavita, ka vakaikuritaka, kevaka kaʼu sa vakabula me kida na mataka e dua na nona tagane.

23Ia ni sa raici Tavita ko Epikaili, sa kusarawa, ka sobu yani mai na asa, ka bale vakatobocu e na mata i Tavita, ka cuva sobu ki na qele,

24ka bale ki na yavana, ka kaya, Me saumi vei au, noqu turaga, nai valavala ca: ia me vosa mada vei iko na nomu vada, ia mo rogoca mada na vosa ni nomu vada.

25Me kakua mada ni rarawa na yalo ni noqu turaga, e na vuku i koya o qo sa tamata ni vu-ni-ca, io ko Napali: ni sa vaka na yacana, sa vakakina ko koya: a yacana ko Napali, a sa tu vua na lialia; ia koi au na nomu vada, kaʼu a sega ni raici iratou na cauravou ni noqu turaga, o iratou ko a tala.

26Ia o qo, noqu turaga, me vaka sa bula ko Jiova, ka vaka sa bula na yalomu, sa tarovi iko ko Jiova mo kakua ni lako yani kina me kitaka na veivakamatei, kei na cudruvaki iko o na ligamu: ia me ra vakai Napali mada ko ira na nomu meca, kei ira era qara me vakayacora na ca vua na noqu turaga.

27Ia o qo, na ka-ni-loloma o qo sa kauta mai na nomu vada vua na noqu turaga, me soli ga vei ira na cauravou era muria na noqu turaga.

28Mo kakua mada ni cudruva na nona cala na nomu vada: ni na cakava vakaidina ko Jiova me dei na vale ni noqu turaga: ni sa kitaka tiko nai valu i Jiova ko na noqu turaga, ka sega na ka ca sa kune vei iko e na nomu veisiga.

29Ia ka sa tu cake ga e dua na tamata me muri iko, ka qarai iko mo mate: ia ena vauci ga na yalona na noqu turaga e nai vau bula kei Jiova na nomu Kalou; ia na yalodra na nomu meca, ena rabotaki ira ko koya me vaka mai loma ni rabo.

30Ia ni na cakava oti ko Jiova vei iko na noqu turaga na ka vinaka kecega sa vosataka oti e na vukumu, a sa lesi iko mo nodra turaga na Isireli;

31me qai kakua ni ka rarawa vei iko na ka o qo, se ca kina na lomana na noqu turaga, na vakadavea walega na dra, se na nomu cudruvaki iko, na noqu turaga: ia ni sa caka vinaka oti ko Jiova vei iko na noqu turaga, mo qai nanuma na nomu vada.

32A sa kaya ko Tavita vei Epikaili, Me vakavinavinakataki ko Jiova na nodra Kalou na Isireli, o koya ka talai iko edaidai me tavaki au;

33ia me vakavinavinakataki na nomu vuku, ia mo kalougata ko iko, o iko sa tarovi au edaidai o qo meʼu kakua ni ia na veivakamatei, ka cudruvaki au.

34Ia sa ka dina, me vaka sa bula ko Jiova na nodra Kalou na Isireli, o koya sa tarovi au meʼu kakua ni vakacacani iko, kevaka ko a sega ni kusarawa ka lako mai me tavaki au, sa sega ni vo vakaidina vei Napali me kida na mataka e dua na tagane.

35A sa taura ko Tavita mai na ligana na ka sa kauta mai vei koya a sa kaya vua, Mo lako cake e na vakacegu ki na nomu vale; raica, au sa vakarorogo ki na domomu, ka vinakati iko.

36A sa lako mai vei Napali ko Epikaili: ka, raica, sa solevu tiko ko koya e na nona vale, me vaka na solevu ni tui; a sa marau na yalo i Napali, ni sa mateni vakaidina ke koya: a sa sega ni tukuna vua ko koya e dua na ka lailai se levu, ka me rarama mada na sabogibogi.

37Ia e na sabogibogi ni sa lako tani vei Napali na waini, sa tukuna ko na watina vei koya na veika o qo: a sa mate e na lomana na yalona, a sa yaco ko koya me vaka na vatu.

38Ia ni sa oti beka na bogi e tini, sa yaviti Napali ko Jiova, a sa ciba ko koya.

39Ia ni sa rogoca ko Tavita ni sa mate tu ko Napali, sa kaya, Me vakavinavinakataki ko Jiova, o koya sa cudruvaka na vosa ca vei au, a ya ka ia ko Napali, a sa tarova na nona tamata mai na ka ca: ni sa saumaka ko Jiova nai valavala ca i Napali ki na uluna.

A sa talaki ko Tavita me vosa vei Epikaili, ka me kauti koya me watina.

40A ratou sa lako mai vei Epikaili na tamata i Tavita ki Karimeli, a ratou sa vosa vua, ka kaya, Sa talai keitou vei iko ko Tavita, me kauti iko me watina.

41A sa tu cake ko koya, ka vakacuva na matana vaka ki na qele, ka kaya, Raica, na nomu vada, me alewa walega mada me derea na yavadra na tamata ni noqu turaga.

42A sa kusarawa ko Epikaili, ka ia, ka laʼki vodo lako e na asa, a sa lima na nona gonealewa eratou muri koya; a sa muri iratou ko koya nai talatala i Tavita, a sa yaco me watina.

43Sa kauti Eiinoami talega na kai Isirieli ko Tavita; a rau sa watina ruarua.

44Ia ko Saula sa soli Mikali oti na luvena, na wati i Tavita, kivei Paliti na luve i Leisi, o koya na kai Kalimi.