Ai I Vola I Simueli 24 - AI VOLA TABU（FIJ1864）

Sa drutia laivi na bui ni sulu i Saula ko Tavita, ka vakabulai koya, 1-7. Erau sa veivosaki kei Saula, 8-22.

1IA ni sa lesu ko Saula mai na nona muri ira na kai Filisitia, sa qai tukuni vua, ka vaka, Raica, sa tiko ko Tavita e na veikau mai Eni-keti.

2A sa kauta ko Saula e i tolu na udolu na tamata sa digitaki maivei ira kecega na Isireli, ka laʼki qarai Tavita kei ira na nona tamata e na dela ni veivatu ni veikoti kila.

3A sa lako mai ko koya ki na bai ni sipi sa tu e na bati ni sala, a sa dua na qara maikea; a sa curu kina ko Saula me vakara: a sa tiko ko Tavita kei ira na nona tamata e na yasa ni qara.

4A ra sa kaya vei Tavita ko ira na nona tamata, Raica, na siga ka vosa kina vei iko ko Jiova, Raica, kaʼu na solia na nomu meca ki na ligamu, ia ko na kitaka vua na ka e vinaka vei iko. A sa tu cake ko Tavita, ka drutia lo na bui ni sulu nei Saula.

5Ia ni sa oti, sa yaviti Tavita na yalona, e na vuku ni sa drutia na bui ni sulu nei Saula.

6A sa kaya ko koya vei ira na nona tamata, Meʼu kakua sara, e na vuku i Jiova, ni kitaka na ka o qo vei koya na noqu turaga, o koya ka lumuta ko Jiova, ni dodoka vua na ligaqu, e na vuku ni ka lumuti koya ko Jiova.

7A sa tarovi ira na nona tamata ko Tavita e na vosa o qo, ka sega ni soli ira me ra tu cake vei Saula. A sa tu cake ko Saula mai na qara, ka lako yani.

8A sa tu cake emuri ko Tavita, ka curu yani e na qara, ka kaci vei Saula, ka kaya, Noqu turaga, na tui. A sa rai kimuri ko Saula, a sa vakalalataka na matana vaka ki na qele, ka cuva.

9A sa kaya vei Saula ko Tavita, A cava ko ni sa rogoca kina na nodra vosa na tamata, ni ra sa kaya, Raica, sa qaqara ko Tavita me vakacacani iko?

10Raica, e na siga edaidai sa kunea na matamu ni ka soli iko edaidai ko Jiova ki na ligaqu mai na qara: a sa kaya e so meʼu vakamatei iko: ia kaʼu a lomani iko; ia kaʼu a kaya, Au na sega ni dodoka na ligaqu vua na noqu turaga; e na vuku ni ka lumuti koya ko Jiova.

11Ia, tamaqu, mo raica, io, mo raica na bui ni nomui sulu e na ligaqu, niʼu a seledrutia na bui ni nomui sulu, ka sega ni vakamatei iko, mo kila ka raica ni sa sega na ka ca se na talaidredre vei au, ia kaʼu a sega ni valavala ca vei iko; ia ko sa vakasaqarai au mo rawai au meʼu mate.

12Me lewai kedaru mada ko Jiova, ka cudruvaki au ko Jiova e na vukumu: ia na ligaqu ena sega ni bikai iko:

13me vaka na vosa vakaibalebale sa daucavuta ko ira na qase eliu, Sa tubu nai valavala ca maivei ira nai valavala ca; ia na ligaqu ena sega ni bikai iko.

14Sa lako mai me muri cei na tui Isireli? ko cei ko sa ciciva mai? e dua na koli sa mate tu: e dua na nana.

15Ia me dauveilewai ko Jiova, ka me lewai kedaru, ka raica, ka dautataro e na vukuqu, ka vakabulai au mai na ligamu.

16Ia ni sa kitaka vakaotia ko Tavita na vosa o qo vei Saula, sa kaya ko Saula, A domomu o qo, na luvequ Tavita, se segai? A sa tabalaka cake na domona ko Saula, ka tagi:

17a sa kaya ko koya vei Tavita, O sa yalododonu ga, ka cala koi au; ni ko sa caka vinaka vei au, ia kaʼu a caka ca vei iko.

18Ia ko sa vakatakila edaidai ni ko sa caka vinaka vei au: e na vuku ni ko a sega ni vakamatei au, ni sa soli au ko Jiova ki na ligamu.

19Ia kevaka sa kunea na nona meca e dua na tamata, ena laivi koya li me lako vakavinaka yani? Ia me sauma vinaka vei iko ko Jiova na ka ko sa cakava vei au edaidai.

20Ia o qo, raica, au sa kila ni sa dina ni ko na tui, ia ena vakataudeitaki vei iko na matanitu nei Isireli:

21ia o qo, mo kitaka na vosa vavakini vei au e na yaca i Jiova, ni ko na sega ni muduka laivi na noqu kawa sa muri au, ko na sega talega ni vakarusa na yacaqu mai na vale i tamaqu.

22A sa vosavavakini vei Saula ko Tavita. A sa lako yani ko Saula ki na nona vale; ia ko Tavita kei ira na nona tamata, era sa lako cake ki na tikina kaukauwa.