II. Ai Ni Vola I Samueli 9 - AI VOLA TABU（FIJ1864）

Ai tukutuku kei Mifiposeci na luve i Jonacani, kei na loloma i Tavita vua, 1-13.

1A SA kaya ko Tavita, Sa vo tu e dua e na mataqali i Saula meʼu caka vinaka vua e navuku i Jonacani, se segai?

2A sa dua nai talatala ni mataqali i Saula, na yacana ko Sipa. A sa kacivi ko koya vei Tavita, a sa kaya na tui vei koya, O iko ko Sipa, se segai? A sa kaya ko koya, Sai koya ga na nomu tamata.

3A sa kaya na tui, Sa dua tiko na tamata e na mataqali i Saula, meʼu caka vinaka vua e na vuku ni Kalou, se segai? A sa kaya ko Sipa vua na tui, Sa dua tiko na luve i Jonacani, a sa lokiloki na yavana.

4A sa kaya na tui vei koya, Sa evei ko koya? A sa kaya vua na tui ko Sipa, Raica, sa tiko e na vale i Mekiri, na luve i Amieli, mai Lo-tipari.

5Asa talaki ko Tavita na tui, ka kauti koya mai na vale i Mekiri, na luve i Amieli, mai Lo-tipari.

6A sa lako mai vei Tavita ko Mifiposeci, na luve i Jonacani, na luve i Saula, a sa bale e na matana, ka vakarokoroko. A sa kaya ko Tavita, I Mifiposeci. A sa kaya ko koya, Raica na nomu tamata!

7A sa kaya vua ko Tavita, Mo kakua ni rere, niʼu na caka vinaka vakaidina vei iko e na vuku i Jonacani, na tamamu, ia kaʼu na vakasuka vei iko na vanua kecega nei Saula na nomu qase; ia ko iko, ko na kana tikoga e na noqui kanakana.

8A sa vakarokoroko ko koya, ka kaya, A cava na nomu tamata, mo golevi au kina na koli mate?

9A sa kacivi Sipa na tamata i Saula ko na tui, ka kaya vua, Au sa solia vua na luvena na nomu turaga na ka kecega ka nei Saula kei ira kecega na nona mataqali.

10Ia ko iko, kei iratou na luvemu, kei iratou na nomu tamata, dou wereca na qele vei koya, ia mo kauta mai na kakana me kena na luve ni nomu turaga: ia ena kana tikoga e na noqui kanakana ko Mifiposeci, na luvena na nomu turaga: (ia ko Sipa, sa tinikalima na luvena tagane, ka ruasagavulu na nona tamata). (

11A sa kaya vua na tui ko Sipa, Ena cakacaka na nomu tamata me vaka na ka kecega sa rotaka ko na noqu turaga na tui:) ia ena kana e na noqui kanakana ko Mifiposeci, me vaka e dua vei ira na luvena na tui.

12A sa dua vei Mifiposeci na luvena lailai, a yacana ko Mika. Ia ko ira kecega ka tiko e na vale i Sipa era sa tamata i Mifiposeci.

13A sa tiko mai Jerusalemi ko Mifiposeci; ni sa kana tikoga e nai kanakana ni tui; a sa lokiloki na yavana ruarua.