Ai I Vola I Simueli 22 - AI VOLA TABU（FIJ1864）

Sa dro ki Etulami ko Tavita, ka lako vua na tamata e so, 1, 2. Sa lako vei tui Moapi, a sa vakasalataki koya ko Kata na parofita, 3-5. Sa via vakamatei koya tiko ko Saula, 6-8. Sa tukuni Eiimeleki vakaca ko Toeki, a sa vakamatei ira na bete, 9-19. Sa bula ko Epiyacari, ka dro vei Tavita, 20-23.

1A SA lako tani maikea ko Tavita, ka dro bula ki na qara mai Etulami: ia ni sa rogoca ko iratou na tuakana kei ira kecega na lewe-ni-vale i tamana, era sa lako sobu kina vei koya.

2Ia sa soqo vata vua ko ira kecega sa vakasaurarataki, kei ira kecega sa tawa sauma na ka era a volia, kei na tamata kecega sa vakararawataki; a sa yaco ko koya me nodra turaga: a ra sa tiko kaya sa va beka na drau na tamata.

3A sa lako tani maikea ko Tavita ki Misipe nei Moapi: a sa kaya ko koya vua na tui Moapi, Me rau lako mada mai na tamaqu kei tinaqu, me rau tiko kei kemudou, meʼu kila mada se cava na ka ena cakava vei au na Kalou.

4A sa kauti rau ko koya vei tui Moapi: ia eratou sa tiko kaya e na gauna kecega sa tiko kina ko Tavita mai na koro kaukauwa ko ya.

5Ia sa kaya ko Kata na parofita vei Tavita, Mo kakua ni tiko e na koro kaukauwa o qo; mo lako tani, ka lako ki na vanua nei Juta. Sa qai lako mai ko Tavita, ka lako ki na veikau mai Ereci.

6A sa rogoca ko Saula ni sa kune ko Tavita, kei ira na tamata era sa vata kaya, (ia sa tiko ko Saula mai Kipia e ruku ni dua na kau mai Rama, a sa tu ga e ligana na nona moto, a sa tu vakavolivolita ko ira kecega na nona tamata;)

7sa qai kaya ko Saula vei ira na nona tamata era tu vata kaya, Dou rogoca, oi kemudou na Penijamini; ena solia beka vei kemudou yadua ko na luve i Isei e so na veiwere, ka so na veivainivaini? ena lesi kemudou kecega beka me nodra turaga na lewe udolu, kei na nodra turaga na lewe drau?

8dou sa bukia kina qau vere oi kemudou kecega, ia ka sega mada e dua me bau tukuna ki daligaqu ni rau sa vere vata na luvequ kei na luve i Isei, ka sega e dua vei kemudou sa rarawa na lomana e na vukuqu, sa sega talega e dua me vakatakila vei au ni sa uqeta na noqu tamata ko koya na luvequ, me lawa-vaki au, me vaka e na siga o qo.

9A sa vosa mai ko Toeki na kai Itomi, o koya sa lesi me vakaraici ira na tamata nei Saula, a sa kaya, Au a raica na luve i Isei ni sa lako mai ki Nopi, kivei Eiimeleki na luve i Eiitupi:

10a sa tarogi Jiova ko koya e na vukuna, a sa solia vua nai vaqa, ka solia vua nai seleiwau i Koliyaci na kai Filisitia.

11A sa tala ko na tui me kacivi Eiimeleki na bete, na luve i Eiitupi, kei ira kecega na lewe-ni-vale i tamana, ko ira na bete era sa tiko mai Nopi: a ra sa lako kecega mai vei koya na tui.

12A sa kaya ko Saula, Mo rogoca mada, na luve i Eiitupi. A sa kaya ko koya, Oi au, noqu turaga.

13A sa kaya vua ko Saula, A cava ko drau sa buki qau vere kina, oi kemudrau kei na luve i Isei, ni ko sa solia vua na kakana, kei nai seleiwau, a sa taroga na Kalou e na vukuna, me tu cake ko koya, me lawavaki au, me vaka e na siga o qo?

14A sa vosa mai vei koya na tui ko Eiimeleki, ka kaya, O cei vei ira kecega na nomu tamata sa yalodina me vakai Tavita, o koya na vugona na tui, ka lako me vaka na nomu vosa, a sa vakarokorokotaki e na nomu vale?

15Sa siga beka o qori kaʼu a vakatekivu me taroga na Kalou e na vukuna? sa yawa sara vei au: me kakua ni beitaka ko na tui e na dua na ka na nona tamata, sei ira kecega na lewe-ni-vale i tamaqu: ni sa sega ni kila ko na nomu tamata e dua na ka lailai se na ka levu e na ka o qo.

16A sa kaya na tui. O na mate vakaidina, Eiimeleki, ko iko, kei ira kecega na lewe-ni-vale i tamamu.

17Sa kaya talega na tui vei ira nai talatala era sa tu vata kaya, Mo dou gole, ka vakamatei ira na bete i Jiova: ni sa vata kei Tavita na ligadra, a ra sa kila ni sa dro ko koya, a ra a sega ni tukuna vei au. A ra sa bese ni dodoka na ligadra ko ira na nona tamata na tui me ra lutuki ira na bete i Jiova.

18A sa kaya na tui vei Toeki, Mo gole ko iko, ka lutuki ira na bete. A sa gole ko Toeki na kai Itomi, ka lutuki ira na bete, ka vakamatea e na siga ko ya e walusagavulu ka lima na tamata era suluma na efoti malo:

19o Nopi talega, na nodra koro na bete, sa mokuta ko koya e na bati ni seleiwau, na tagane kei na alewa talega, na gone lailai, kei ira sa sucu tiko, kei na karavau, kei na asa, kei na sipi, e na bati ni seleiwau.

20A sa dua na luve i Eiimeleki na luve i Eiitupi, na yacana ko Epiyacari, sa bula ka dro me muri Tavita.

21A sa tukuna vei Tavita ko Epiyacari ni ka vakamatei ira na bete i Jiova ko Saula.

22A sa kaya vei Epiyacari ko Tavita, Au a kila e na siga ko ya, sa tiko kina maikea ko Toeki na kai Itomi, ni na tukuna vakaidina vei Saula: sa mate e na vukuqu na tamata kecega e na mataqali i tamamu.

23Mo tiko mada vei au, kakua ni rere: ni sa qarai iko mo mate ko koya sa qarai au meʼu mate: ia ko na vakatawai vinaka ni ko sa tiko vei au.