Ai I Vola I Simueli 18 - AI VOLA TABU（FIJ1864）

Sa lomani Tavita ko Jonacani, 1-4. Sa vuvutaki Tavita ko Saula, 5-11, ka rerevaki koya, 12-16. Sa musuka vua ko koya na luvena ko Mikuli, me bacani koya, 20-27. Sa tiko kei Tavita ko Jiova, a sa cakacaka vakavuku ko koya, 28-30.

1IA ni sa vosa oti ko koya kivei Saula, sa vauci na yalo i Jonacani ki na yalo i Tavita, a sa lomani koya ko Jonacani me vaka na yalona.

2A sa kauti koya ko Saula e na siga ko ya ka sega ni laivi koya me lako tale ki na vale i tamana.

3Erau sa qai veiyalayalati ko Jonacani kei Tavita, e na vuku ni sa lomani koya me vaka na yalona:

4a sa luvata tani ko Jonacani na nona kote sa vakaisulu kina, a sa solia vei Tavita, kei na nona veisulu, kei na nonai seleiwau talega, kei na nona dakai, kei na nonai vau-ni-sulu.

5A sa daulako yani ko Tavita ki na yasana kecega sa talai koya kina ko Saula, ka sa cakacaka vakavuku tiko: a sa lesi koya ko Saula me lewai ira na tamatai valu, a sa vinaka ko koya e matadra na tamata kecega, kei na matadra talega era qaravi Saula.

6Ia ni ra sa lako mai, ni sa lesu tale mai ko Tavita ni sa mokuta oti na kai Filisitia, era sa lako yani na alewa mai na nodra koro kecega na Isireli, ka meke ka cibi tiko, me ra laʼki tavaki Saula na tui, ka vakalali ka vakaapi ni ra sa reki tiko.

7A ra sa veikainaki ko ira na alewa ni ra sa qiriqiri tiko, ka vaka, Sa mokuta ko Saula na nona veiudolu, kei Tavita na nona veiudolu vakatini.

8A sa cudru vakalevu ko Saula, a sa ca vua na vosa ko ya; a sa kaya ko koya, Era sa cavuta vei Tavita na veiudolu vakatini, a ra sa cavuta vei au na veiudolu walega: ia sa vo, me nona mai na matanitu ga.

9A sa vakaraici Tavita ko Saula mai na siga ko ya.

10Ia e na sabogibogi, sa dua na yalo ca sa curumi Saula mai vua na Kalou, a sa parofisai ko koya e loma ni vale: a sa qiriqiri ko Tavita e na ligana, me vaka sa daukitaka: a sa e na liga i Saula na moto.

11A sa cokataka na moto ko Saula; ni sa kaya, Au na cokai Tavita veituitui kei na lalaga. A sa leve vakarua ko Tavita mai na matana.

12A sa rerevaki Tavita ko Saula, e na vuku ni sa tiko kaya ko Jiova, ka lako tani oti vei Saula.

13A sa biuti koya yani ko Saula, me kakua ni rau tiko kaya, ka lesi koya vua me turaga ni dua na udolu na tamata; a sa daulako yani ka daulako mai ko koya e na matadra na tamata.

14A sa vukutaka na nonai valavala kecega ko Tavita; a sa tiko kaya ko Jiova.

15Ia ni sa raica ko Saula ni sa cakacaka vakavuku sara ko koya, sa rerevaki koya.

16Ia ka sa lomani Tavita ko ira kecega na Isireli kei ira na Juta, ni sa daulako yani ka daulako mai e na matadra.

17A sa kaya vei Tavita ko Saula, Raica na luvequ alewa na ulumatua, ko Merapi, au na soli koya vei iko me watimu: ia mo qaqa ga e na vukuqu, ka kitaka nai valu i Jiova. Ni sa kaya ko Saula, Me kakua ni bikai koya na ligaqu, ia me bikai koya na ligadra na kai Filisitia.

18A sa kaya vei Saula ko Tavita, O cei koi au? ka cava na noqu bula, se na mataqali i tamaqu e Isireli, meʼu sa vugona na tui?

19Ia e na gauna me musu kina vei Tavita ko Merapi, na luve i Saula, sa musu ko koya vei Atirieli na kai Miola me watina.

20A sa lomani Tavita ko Mikali na luve i Saula: a sa tukuni vei Saula, a sa vinaka vua na ka ko ya.

21A sa kaya ko Saula, Au na musuki koya vua, me coriti koya, ka me bikai koya na ligadra na kai Filisitia. A sa kaya vakarua ko Saula vei Tavita, O na sa vugoqu edaidai.

22A sa rotaka ko Saula vei ira era qaravi koya, Dou veivosaki loa kei Tavita, ka kaya, Raica, sa vinakati iko na tui, a ra sa lomani iko kecega na nona tamata: ia mo vugona mada na tui.

23A ra sa vosataka na vosa o qo na tamata nei Saula e na daliga i Tavita. A sa kaya ko Tavita, Sa vaka na ka wale beka vei kemudou meʼu vugona na tui, niʼu sa tamata dravudravua ka kaisi?

24A ra sa tukuna vei Saula ko ira na nona tamata, ka kaya, Sa vosa ko Tavita me vaka na vosa o qo.

25A sa kaya ko Saula, Dou kaya vakaoqo vei Tavita, Sa sega ni vinakata ko na tui na yau e na vuku ni watimu, ka me dua na drau ga na vusodra na kai Filisitia, ka me cudruvaki ko na tui vei ira na nona meca. A sa vakanananu ko Saula me vaka-balei Tavita e na ligadra na kai Filisitia.

26Ia ni sa tukuna ko ira na tamata i koya na ka o qo vei Tavita, sa qai vinaka o qori vei Tavita, me vugona na tui: a sa sega ni oti na kena bogi:

27ka sa ia ko Tavita ka lako yani, ko koya kei ira na nona tamata, ka mokuta e rua na drau na tamata vei ira na kai Filisitia: a sa kauta mai ko Tavita na vusodra, ka wilika vakaotia vua na tui, me vugona kina na tui. A sa musuka vua ko Saula na luvena ko Mikali me watina.

28A sa raica ko Saula ka kila ni sa tiko kei Tavita ko Jiova; a sa lomani koya ko Mikali na luve i Saula.

29A sa levu cake na nona rere ko Saula vei Tavita, a sa yaco me meca i Tavita tikoga ko Saula.

30Era sa qai lako yani na nodra turaga na kai Filisitia: ia ni ra sa lako yani, sa cakacaka vakavuku duaduaga ko Tavita vei ira kecega era qaravi Saula; a sa rogo vakalevu na yacana.