1IA sa soqona vata na nodra veimataivalu ko ira na kai Filisitia me ra ia nai valu, a ra sa soqoni vata ki Soko, a ya ka nei Juta, a ra sa tiko e na tadrua i Soko kei Aseka mai Efesi-tamimi.
2A ra sa soqoni vata ko Saula kei ira na tamata Isireli, ka laʼki tiko e na buca ko Ela, ka vakarautaka nai valu me donui ira na kai Filisitia.
3Ia na kai Filisitia era sa tu e na ulu-ni-vanua vaka, kei ira na Isireli era sa tu e na ulu-ni-vanua vaka; ia sa kedra maliwa na buca.
4A sa lako yani e na nodrai tikotiko na kai Filisitia e dua na tamata dau-bolebole, ko Koliyaci na yacana, na kai Kaca, a kena balavu e tinikatolu na caga.
5A sa vakaisala parasa na uluna, a sa vakaisulu e nai sulu ni valu; ia na kena lutubi ni sulu e lima na udolu na sikeli parasa.
6A sa vakaivava parasa na yavana, a sa dua na sasabai parasa e nai usausa ni domona.
7Ia na kau ni nona moto sa vaka na nona kau ni tali sulu na dautalisulu; Ja na mata ni nona moto sa ono na drau na sikeli aironi; a sa liutaki koya e dua sa colata na sasabai.
8A sa tu ko koya, ka kaci ki na nodra mataivalu na Isireli, a sa kaya vei ira, Dou sa lako mai kitautuba me vakarauna nai valu e na vuku ni cava? sa sega li ni kai Filisitia koi au, ia na tamata i Saula koi kemudou? dou digitaka vei kemudou e dua na tamata, a me lako sobu mai vei au.
9Kevaka sa rawata me keirau veivala, ka vakamatei au, keimami na qai qaravi kemuni: ia kevaka kaʼu sa gumatua vua, ka vakamatei koya, ko ni na qai neimami tamata, ka qaravi keimami.
10A sa kaya ko koya na kai Filisitia, Au sa bolei ira edaidai na nodra veimataivalu na Isireli; solia mada mai vei au e dua na tamata, me keirau vala kaya.
11Ia ni sa rogoca ko Saula kei ira kecega na Isireli na nona vosa o qo na kai Filisitia, era sa yalowai, ka rere vakalevu.
12Ia ko Tavita na luvena na kai Ifiraca mai Pecileema nei Juta, na yacana ko Isei; a sa walu na luvena tagane: a sa wili vata na tamata ko ya kei ira na tamata qase e na gauna i Saula.
13Ia sa lako yani na luve i Isei e lewe tolu eratou sa qase; eratou sa laʼki muri Saula ki nai valu: ia na yacadratou na luvena e lewe tolu, eratou lako ki nai valu, ko Iliapi na ulumatua, kei na kenai karua ko Epinatapi, kei na kenai katolu ko Sama:
14a sa gone vei iratou ko Tavita; ia ka muri Saula ko iratou na lewe tolu, eratou sa qase cake.
15A sa lako ka lesu maivei Saula ko Tavita, me vakatawa na sipi nei tamana mai Pecileema.
16A sa dautoro mai ko koya na kai Filisitia e na mataka kei na yakavi, ka dauvakarairaitaki koya ka siga vasagavulu.
17A sa kaya ko Isei vei Tavita na luvena, Mo kauta mada vei iratou na tuakamu na efa sila tavu o qo, kei nai buli madrai o qo e tini, ka cici ki nai tikotiko ni valu kivei iratou na tuakamu;
18ka kauta nai buli wai-ni-sucu o qo e tini vei koya na turaga ni udolu, ka vakaraici iratou na tuakamu se ratou tiko vinaka, ka kauta mai na kedratoui vakadinadina.
19Ia ko Saula, kei iratou, kei ira kecega na tamata Isireli, sa tiko e na buca ko Ela, a sa kitaka tiko nai valu kei ira na kai Filisitia.
20A sa sou e na sabogibogi ko Tavita, ka laiva na sipi vua nai vakatawa, ka lako, ka kauta na veika ka vakarota vua ko Isei; a sa yaco ki na yasana ni veivale-vakayavana, ni sa lako yani tiko nai valu me kitaka nai valu, a ra sa kaila tiko me ia nai valu:
21ni ra sa tuvai valu oti ko ira na Isireli kei ira na kai Filisitia, na mataivalu me veiqaravi kei na mataivalu.
22A sa laiva na nona kaukau ko Tavita vei koya sa dauvakatawa na veikaukau, ka cici ki nai valu, ka lako mai, ka tarogi iratou na tuakana se ratou tiko vinaka.
23Ia ni sa veivosaki tiko kei iratou, raica, sa lako mai ko koya na daubole, na kai Filisitia mai Kaca, ko Koliyaci na yacana, mai na nodra veimataivalu na kai Filisitia, ka vosa me vaka na vosa ko ya: a sa rogoca ko Tavita.
24Ia ko ira kecega na tamata Isireli, ni ra sa raica na tamata, era sa dro mai na matana, a ra sa rere vakalevu.
25A ra sa kaya na tamata Isireli, Dou sa raici koya na tamata o qo sa lako cake mai, se segai? ni sa lako cake mai me bolei ira na Isireli: ia na tamata sa na mokuti koya, ena vakavutuniyautaki koya e na yau levu ko na tui, ka na solia na luvena alewa vei koya, ka cakava na mataqali i tamana me kakua ni qali e Isireli.
26A sa vosa ko Tavita vei ira na tamata sa tu vata kaya, a sa kaya, A cava na ka sa na caka vua na tamata sa na mokuta na kai Filisitia o qo, ka kauta tani nai rogorogo ca vei ira na Isireli? ni sa tamata maivei ko koya na kai Filisitia tawa cili o qo, me bolea na nona veimataivalu na Kalou bula?
27A ra sa vosa vakaoqo na tamata vei koya, ka kaya, Ena caka vakaoqo vua na tamata sa mokuti koya.
28A sa rogoca ko na tuakana na ulumatua, ko Iliapi, ni sa vosa ko koya vei ira na tamata; a sa cudru mai-ko Iliapi vei Tavita, a sa kaya, A cava ko a lako sobu mai kina kike? ia ko sa laiva vei cei na sipi ka vica o qori mai na veikau? au sa kila na nomu viavialevu, kei na kena ca ni yalomu; ni ko sa lako sobu mai mo raica kina nai valu.
29A sa kaya ko Tavita, A cava beka kaʼu sa cakava? sa sega beka ni vosa walega?
30A sa vuki yani mai vua ki na dua tani, ka vosa me vaka na vosa ko ya; a sa vosa vua ko ira na tamata me vaka na vosa eliu.
31Ia ni sa rogo na vosa ka vosataka ko Tavita, era sa tukuna vei Saula; a sa talaki ko koya vei koya, me lako mai.
32A sa kaya ko Tavita kivei Saula, Me kakua ni waicala na yalona e dua na tamata e na vukuna; ena lako ga na nomu tamata, ka vala kaya na kai Filisitia o qo.
33A sa kaya vei Tavita ko Saula, O sa sega ni rawata me lako vua na kai Filisitia o qo, mo drau vala kaya; ni sa cauravou ga ko iko, ia ko koya sa tamata dauvala mai na nona cauravou.
34A sa kaya vei Saula ko Tavita, Sa vakatawa tiko na sipi nei tamana na nomu tamata, a sa lako mai e dua na laioni, ka dua na pera, ka kauta tani e dua na luve ni sipi mai na qele ni sipi;
35ia kaʼu a laʼki muri koya, ka yavita, ka ia na veivakabulai mai na gusuna; ia ni sa tu cake mai vei au, kaʼu a taura na kumina, ka yavita, ka vakamatea.
36Sa vakamatea na laioni kei na pera talega na nomu tamata: ia na kai Filisitia tawa cili
0qo ena vaka e dua vei rau, e na vuku ni sa bolea na nona veimataivalu na Kalou bula.
37A sa kaya ko Tavita, Ko Jiova, o koya ka vakabulai au mai na liga ni laioni, kei na liga ni pera, ena vakabulai au ko koya mai na ligana na kai Filisitia o qo. A sa kaya vei Tavita ko Saula, Mo lako, ia me lako vata kei iko ko Jiova.
38A sa vakaisulutaki Tavita ko Saula e na nonai sulu, ka vakaisalataka na uluna e nai sala parasa ni valu; a sa vakaisulutaki koya e nai sulu ni valu:
39a sa vauca ko Tavita na nonai seleiwau e taudaku ni nonai sulu, a sa ia me lako, ni sa sega ni vakatovolea oti. A sa kaya vei Saula ko Tavita, Au sa sega ni lako rawa e na veika o qo; niʼu sa sega mada ni vakatovolea. A sa luvata tani vua ko Tavita.
40A sa taura ko koya ua nonai titoko e na ligana, a sa digitaka vua e lima na vatu mulo mai na uciwai, ka tugana ki na taga ni vakatawa ni sipi a ya sa kauta, io e na taga; ia ka sa e ligana na nonai rabo: a sa laʼki toro yani vua na kai Filisitia.
41A sa lako na kai Filisitia ka laʼki toro vei Tavita; a sa liutaki koya na tamata ka kauta na sasabai.
42A sa rai voli na kai Filisitia, a sa kunei Tavita, ka vakalialiai koya; ni sa cauravou ko koya, ka sa damudamu, ka matavinaka.
43A sa kaya vei Tavita na kai Filisitia, Sa koli beka koi au, ko sa lako mai kina vei au e nai titoko? A sa rukaki Tavita na kai Filisitia e na yacadra na nona kalou.
44A sa kaya vei Tavita na kai Filisitia, Mo lako mai vei au, au na qai solia na lewemu ki na manumanu ni lomalagi kei na manumanu ni vanua.
45Sa qai kaya ko Tavita vua na kai Filisitia, O sa lako mai vei au ka taura nai seleiwau, kei na moto, kei na sasabai: ia koi au, kaʼu sa lako vei iko e na yaca i Jiova ni lewe vuqa, o koya na Kalou ni nodra veimataivalu na Isireli, o ira ko a vosavakacacataka:
46e na siga o qo ena soli iko ko Jiova ki na ligaqu; ia kaʼu na yaviti iko, ka kauta tani vei iko na ulumu; au na solia talega na yagodra na nodrai valu na kai Filisitia e na siga o qo ki na manumanu ni lomalagi, kei na manumanu tawa lasa ni vanua; me kila ko ira kecega na kai vuravura ni sa dua na nodra kalou na Isireli:
47era na kila kina ko ira nai vavakoso taucoko o qo ni sa sega ni ia na veivakabulai ko Jiova e nai seleiwau kei na moto; ni sa nei Jiova nai valu, ena soli kemuni talega ko koya ki na ligaimami.
48Ia ni sa ia na kai Filisitia ka laʼki tavaki Tavita, sa tei kusarawa ko Tavita, ka cici vaka ki nai valu me tavaki koya na kai Filisitia.
49A sa daramaka na ligana ko Tavita ki na taga, ka kauta maikina e dua na vatu, ka rabotaka, ka yavita na kai Filisitia e na yadrena, a sa coba na vatu e yadrena; a sa bale vakatobocu ki na qele.
50A sa gumatua ko Tavita vei koya na: kai Filisitia e nai rabo kei na vatu: ka mokuta na kai Filisitia, ka vakamatea; ia ka sa sega nai seleiwau e na liga i Tavita.
51A sa cici ko Tavita, ka laʼki vaca na kai Filisitia, ka taura na nonai seleiwau, ka ucuna mai na kena waqa, ka vakamatei koya, ka seledrutia laivi kina na uluna.
Ia ni ra sa raica na kai Filisitia ni sa mate na nodra qaqa, era sa dro.
52A ra sa ia ko ira na tamata Isireli kei ira na Juta, ka kaila, ka cicimuri ira na kai Filisitia, ka yacova na buca kei na matamata-ni-koro ni Ekironi. Ia era sa bale e na sala ki Seereimi, io ka yacovi Kaca, kei Ekironi, ko ira na kai Filisitia era vuetaki.
53A sa lesu mai ko ira na luve i Isireli ni sa oti na nodra muri ira na kai Filisitia, ka kauta nai toki mai na nodrai tikotiko.
54A sa taura na uluna na kai Filisitia ko Tavita, ka kauta ki Jerusalemi; ia ka sa virikotora na nonai yaragi e na nona vale gatu.
55Ia ni sa raici Tavita ko Saula ni sa laʼki tavaka na kai Filisitia ko koya, sa kaya ko koya vei Epineri na turaga ni valu, I Epineri, na luve i cei na cauravou o qo? A sa kaya ko Epineri, Me vaka sa bula na yalomu, na tui, au sa sega ni kila.
56A sa kaya na tui, Mo vakatataro, se sa luve i cei na cauravou o qo.
57Ia ni sa lesu mai ko Tavita ni sa mokuta oti na kai Filisitia, sa tauri koya ko Epineri, ka kauti koya ki na mata i Saula, a sa qumia tu na ligana na ulu i koya na kai Filisitia.
58A sa kaya ko Saula vei koya, A luve i cei ko iko, cauravou? A sa kaya ko Tavita, Na luvena na nomu tamata ko Isei, na kai Pecileema.
Who We AreWhat We EelieveWhat We Do
2025 by iamachristian.org,Inc All rights reserved.
