Ai I Vola I Simueli 19 - AI VOLA TABU（FIJ1864）

Sa tukuna vei Tavita na vere i Saula ko Jonacani, 1-3. Sa masuti tamana ko Jonacani me bula ko Tavita, 4-7. Sa qara tale ko Saula me vakamatei Tavita, a sa vakabulai koya ko Mikali, 9-17. Sa dro kivei Samueli ko Tavita, a sa tala e so ko Saula me vakamatei koya, a sa lutuki iratou na Yalo ni Kalou, a ratou sa parofisai, kei Saula talega, 18-24.

1A SA vosa ko Saula vei Jonacani na luvena, kei ira kecega na nona tamata, me ra vakamatei Tavita. Ia ka sa vinakati Tavita vakalevu ko Jonacani, na luve i Saula:

2a sa tukuna vei Tavita ko Jonacani, ka vakane, Sa qara tiko ko Saula na tamaqu me vakamatei iko: ia mo qarauni iko mada e na sabogibogi, ka tiko e na dua na tikina vuni, ka vuni iko:

3ia kaʼu na lako yani me keirau tu vata kei tamaqu e na veiwere ko sa tiko kina, ia kaʼu na vosataki iko vei tamaqu; ia kaʼu na raica se sa vakaevei, ka tukuna vei iko.

4A sa vosataka na ka vinaka e na vuku i Tavita ko Jonacani kivei Saula na tamana, a sa kaya vua, Me kakua ni valavala ca na tui vei koya na nona tamata, vei Tavita; ni sa sega ni valavala ca ko koya vei iko, ka ni sa vinaka sara na nonai valavala vei iko:

5ni sa viria ko koya na nona bula ki na ligana, ka vakamatei koya na kai Filisitia, a sa cakava ko Jiova na veivakabulai levu vei ira kecega na Isireli: o a raica, ka marau: e na vuku ni cava ko na valavala ca kina vua na tamata tawa cala, me vakamatei Tavita walega?

6A sa vakarorogo ko Saula ki na domo i Jonacani: a sa vosavavakini ko Saula, Me vaka sa bula ko Jiova, ena sega ni vakamatei ko koya.

7A sa kacivi Tavita ko Jonacani, ka tukuna vua ko Jonacani na ka kecega o qo. A sa kauti Tavita vei Saula ko Jonacani, a sa dautiko ko koya e na matana, me vaka eliu.

8A sa ia tale nai valu: a sa lako yani ko Tavita, ka veivala kei ira na kai Filisitia, ka mokuti ira e na veiraravui levu; a ra sa dro mai na matana.

9A sa curumi Saula na yalo ca maivei Jiova, ni sa tiko e nona vale ko koya, a sa tu e na ligana na nona moto; a sa qiriqiri e na ligana ko Tavita.

10A sa qara ko Saula me cokai Tavita veituitui kei na lalaga e na moto; a sa lako lo tani ko koya mai na mata i Saula, a sa cokataka na moto ki na lalaga ko koya; a sa dro ko Tavita ka bula e na bogi ko ya.

11A sa tala yani ko Saula e so nai talatala ki na vale i Tavita, me vakatawai koya, ka me ratou vakamatei koya e na sabogibogi: ia sa tukuna vei Tavita ko Mikali na watina, ka kaya, Kevaka ko sa sega ni vakabulai iko e na bogi edaidai, ko na qai vakamatei e na sabogibogi.

12A sa tukuci Tavita sobu ko Mikali mai na katuba lailai ecake: a sa lako yani ko koya, ka dro, ka bula.

13A sa kauta ko Mikali e dua na matakau, ka vakotora e nai mocemoce, a sa kauta nai lokoloko vutika ni koti me kenai lokoloko, ka tutuvitaka e na dua nai tutuvi.

14Ia ni sa tala ko Saula e so nai talatala me kauti Tavita, sa kaya na alewa, Sa tauvi mate ko koya.

15A sa talai iratou nai talatala ko Saula me laʼki raici Tavita, ka kaya, Dou kauti koya cake mai vei au e nai mocemoce, meʼu vaka-matei koya.

16A ratou sa lako mai nai talatala, ka raica, sa dua na matakau e nai mocemoce, a sa dua nai lokoloko vutika ni koti sa nonai lokoloko.

17A sa kaya vei Mikali ko Saula, A cava ko sa vakaisini au kina vakaoqo, ka tala yani na noqu meca me bula ko koya? A sa kaya vei Saula ko Mikali, Sa kaya vei au ko koya, Mo laivi au mada meʼu lako; meʼu vakamatei iko mei cavai?

18A sa dro ko Tavita, ka bula, ka lako mai kivei Samueli ki Rama, ka tukuna vua na ka kecega ka cakava vua ko Saula. A rau sa lako kei Samueli me rau tiko mai Nayoci.

19A sa tukuni vei Saula, ka vakane, Raica, sa e Nayoci mai Rama ko Tavita.

20A sa tala ko Saula e so nai talatala me kauti Tavita mai: ia ni ratou sa raica nai vavakoso parofita ni ra sa parofisai tiko, a sa wavu tu ko Samueli ni sa lesi tu me vakaraici ira, sa curumi iratou nai talatala i Saula na Yalo ni Kalou, a sa parofisai ko iratou talega.

21A sa tukuni vei Saula, a sa tala e so nai talatala tani, a sa parofisai ko iratou talega. A sa tala vakatolu e so nai talatala ko Saula, a sa parofisai ko iratou talega.

22A sa lako talega ko koya ki Rama, ka yacova nai keli-wai levu mai Seku: a sa vakatataro ko koya, ka vakane, Sa evei ko Samueli kei Tavita? A sa kaya e dua, Raica, e Nayoci mai Rama.

23A sa lako yani kina ko koya ki Nayoci mai Rama: a sa curumi koya talega na Yalo ni Kalou, a sa lako yani ko koya ka parofisai lako, ka yacovi Nayoci mai Rama.

24A sa luvata tani ko koya talega na nonai sulu, ka parofisai ko koya talega e na mata i Samueli, a sa koto luvawale e na siga taucoko ko ya kei na bogi taucoko ko ya. O koya o qo sa kainaki kina, Sa tiko vata li ko Saula talega kei ira na parofita?