Ai I Vola I Simueli 14 - AI VOLA TABU（FIJ1864）

Sa mokuta e dua na nodra tabai valu na kai Filisitia ko Jonacani, 1-14. Era sa veimokuti vakai ira ko ira na kai Filisitia, era sa qai cici muri ira ko Saula kei ira na Isireli, 15-23. Sa ca ko ira na tamata e na vosa vavakini i Saula, ka vakacataka ko Jonacani, 24-30. Era sa vakacataka na vunau ko ira na tamata, e na vuku ni ra viakana, 31-34. Sa taroga na Kalou ko Saula, a sa sega ni vosa vua ko koya, 36, 37. Sa ia na veidigidigi, me kila kina se ko cei e ca, 38-42: a sa vaka ko Saula me mate ko Jonacani, a sa vakabulai koya ko ira na tamata, 43-46. Sa gumatua ko Saula, 47-52.

1IA e na dua na siga sa kaya ko Jonacani na luve i Saula vua na cauravou sa daucolata na nonai yaragi, Daru lako yani ki na nodrai tikotiko ni valu na kai Filisitia, a ya sa mai na yasana kadua. A sa sega ni tukuna vei tamana.

2A sa tiko ko Saula mai nai yalayala kei Kipia e na ruku ni kau vua sa tu mai Mikironi: ia na tamata era tiko kaya sa ono beka na drau na tamata;

3kei Eija, na luve i Eiitupi, na tuaka i I-kapoti, na luve i Piniasi, na luve i Eli na bete i Jiova mai Silo, a sa suluma lako e dua na efoti. A ra sa sega ni kila ko ira na tamata ni sa lako tani ko Jonacani.

4Ia c na macawa ni lakolako sa vakatovolea ko Jonacani me lako yani kina ki na nodrai tokotiko ni valu na kai Filisitia, sa dua na vatu gata e na kena yasana o qo, ka dua na vatu gata mai na yasana ko ya: ia na yacana e dua ko Posesi, kei na yaca ni kenai karua ko Sene.

5A kena yasana e dua, sa qarava na tokalau me donui Mikimasi, ia na kenai karua, sa qarava na ceva me donui Kipia.

6A sa kaya ko Jonacani vua na cauravou sa daucolata na nonai yaragi, Daru lako yani ki na nodrai tikotiko ni valu na tawa cili o qori; ena cakacaka beka e na vukudaru ko Jiova: ni sa sega ni dredre vei Jiova me ia na veivakabulai ni ra lewe vuqa se ra lewe lailai.

7A sa kaya vua ko koya sa daucolata na nonai yaragi, Mo kitaka na ka kecega sa tu e lomamu: mo lakani: raica, kaʼu sa tiko kei iko me vaka na lomamu.

8A sa kaya ko Jonacani, Raica, edaru na lako yani kivei ira na tamata o qori, ia edaru na vakaraitaki kedaru vei ira.

9Kevaka era na kaya vei kedaru vakane, Drau tiko mada, me keitou lako madani vei kemudrau; edaru na qai tiko mada e na nodaru tikina, ka sega ni lako cake vei ira:

10ia kevaka era na kaya vakane, Drau lako cake mai vei keda; edaru na qai lako cake; ni sa soli ira ko Jiova ki na ligadaru: ia enai vakadinadina vei kedaru o qo.

11A rau sa vakaraitaki rau ki na nodra mataivalu na kai Filisitia: a ra sa kaya na kai Filisitia, Raica, era sa lako mai na Iperiu mai na veiqara era a vuni ira kina.

12Ia sa vosa ko ira na mataivalu vei Jonacani kei koya sa daucolata na nonai yaragi, ka kaya, Drau lako cake mai vei keitou, ia keitou na vakatakila vei kemudrau e dua na ka. A sa kaya ko Jonacani vei koya sa daucolata na nonai yaragi, Mo muri au mai; ni sa soli ira ko Jiova ki na ligadra na Isireli.

13A sa cabe cake e na ligana kei na yavana ko Jonacani, a sa muri koya ko koya sa daucolata na nonai yaragi: a ra sa bale e na mata i Jonacani; ia sa muri koya ko koya sa daucolata na nonai yaragi, ka veiraravui lako.

14Ia na veimoku eliu ko ya ka kitaka ko Jonacani kei koya sa daucolata na nonai yaragi, sa ruasagavulu beka na tamata, e na dua na tiki ni vanua lailai.

15A sa dua na sautaninini levu e nai tikotiko, e na veiwere, vei ira kece talega na tamata: ko ira na mataivalu kei ira na dauyayana, era sa sautaninini ko ira talega, a sa yavala na vanua: a sa dua na sautaninini sa ka levu vakaidina.

16Ia sa rai yani ko ira na tamatai vakatawa i Saula mai Kipia nei Penijamini; ka, raica, era sa waicala na lewe vuqa, a sa tubu lako na kubu.

17A sa kaya ko Saula vei ira na tamata era vata kaya, Dou wiliwili mada; ka raica se ko cei sa lako tani vei keda. A ra sa wiliwili, ka, raica, sa yali ko Jonacani kei koya sa daucolata na nonai yaragi.

18A sa kaya ko Saula vei Eija, Mo kauta mada mai na kato ni Kalou. Ni sa tiko kei ira na luve i Isireli na kato ni Kalou e na gauna ko ya.

19Ia ni sa vosa tiko ko Saula vei koya na bete, sa ia na ue ka levu cake tiko, e na nodrai valu na kai Filisitia: a sa kaya ko Saula vei koya na bete, Mo kakua mada.

20Ia era sa kaila vata ko Saula kei ira na tamata kecega era vata kaya, a ra sa lako ki nai valu: ka, raica, era sa veikitaki ira vakai ira e nai seleiwau, a sa dua na mokumoku levu sara:

21ia ko ira na Iperiu era tiko makawa kei ira na kai Filisitia, ko ira ka lako cake kei ira ki na nodrai tikotiko taucoko, ko ira o qo era sa nodrai to na Isireli era vata kei Saula kei Jonacani:

22ia ko ira kece talega na tamata Isireli era a vuni ira tu e na ulu-ni-vanua ko Ifireimi, ni ra sa rogoca era sa dro na kai Filisitia, era sa cici ko ira talega ka muri ira e nai valu.

23A sa vakabulai ira na Isireli ko Jiova e na siga ko ya, a sa lako nai valu ka yacovi Peci-aveni.

24A ra sa rarawa ko ira na tamata Isireli e na siga ko ya; ni sa vosavavakini vei ira na tamata ko Saula, ka vaka, Me rusa na tamata sa na kania e dua na kakana, ka me yakavi mada, meʼu cudruvaki au mada vei ira na noqu meca. A ra sa sega ni kania e dua na kakana ko ira na tamata.

25A ra sa yaco na tamata kecega ki na dua na veikau; a sa koto na oni e na dela ni vanua.

26Ia ni ra sa lako ki na veikau na tamata, raica, sa titiri tiko na oni; ia ka sa sega na tamata sa kauta na ligana ki na gusuna, e na vuku ni sa rerevaka na vosa vavakini ko ira na tamata.

27Ia ko Jonacani sa sega ni rogoci tamana ni sa vakarota vei ira na tamata e na vosa vavakini, a sa dodoka na mua ni nonai titoko sa qumia na ligana, ka tonisua e na qa ni oni, ka kauta na ligana ki na gusuna; a sa rai vinaka kina na matana.

28A sa vosa mai e dua vei ira na tamata, ka kaya, O tamamu sa vakarota sara vei ira na tamata e na vosa vavakini, ka vaka, Me rusa na tamata sa kania e dua na kakana edaidai. A ra sa malumalumu ko ira na tamata.

29A sa kaya ko Jonacani, Sa vakararawataki ira na lewe ni vanua ko tamaqu; raica mada, ni sa rarama mai na mataqu e na vuku niʼu sa kania e dua na ka lailai e na oni o qo:

30sa levu cake kevaka era sa kanakana edaidai ko ira na tamata e nai toki ni nodra meca era sa kunea: ni sa sega ni levu o qo na moku sa baleti ira na kai Filisitia.

31A ra sa yaviti ira na kai Filisitia e na siga ko ya mai Mikimasi ka kauta ki Eiyaloni: a ra sa malumalumu sara na tamata.

32A ra sa kitaka nai toki ni valu ko ira na tamata, ka taura e so na sipi, kei na karavau, kei na luve ni karavau, ka vakamatea e na qele: a ra sa kana vata kei na dra ko ira na tamata.

33A sa tukuni vei Saula, ka vaka, Raica, era sa valavala ca vei Jiova ko ira na tamata ni ra sa kana vata kei na dra. A sa kaya ko koya, Dou sa caka ca: dou vaqiqica mai vei au edaidai e dua na vatu levu.

34A sa kaya ko Saula, Dou dui lakolako e na kedra maliwa na tamata, ka kaya vei ira, Dou kauta mai vei au kike na tamata yadua na nona karavau, kei na tamata yadua na nona sipi, ka vakamatea eke, ka kania: ia dou kakua ni valavala ca vei Jiova ni dou kana vata kei na dra. A ra sa kauta kaya mai e na bogi ko ya na tamata yadua na nona karavau, ka vakamatea e na tikina ko ya.

35A sa cakava ko Saula e dua nai cabocabo-ni-soro vei Jiova: ko ya nai matai ni cabocabo-ni-soro kei cakava ko koya vei Jiova.

36A sa kaya ko Saula, Me da muri ira sobu na kai Filisitia e na bogi, ka kovea na nodra ka me rarama mada na sabogibogi, ia mo da kakua ni vakavoca e dua na tamata vei ira. A ra sa kaya, Mo kitaka na ka kecega sa vinaka e matamu. A sa kaya ko koya na bete, Me da toro mada vua na Kalou kike.

37A sa taroga na Kalou ko Saula, Meʼu muri ira sobu na kai Filisitia, se kakua? o na soli ira ki na ligadra na Isireli, se segai? A sa sega ga ni vosa vua ko koya e na siga ko ya.

38A sa kaya ko Saula, Dou toro mai kike, oi kemudou kecega sa turaga vei ira na tamata; ia dou kila ka raica se cava e tu kina nai valavala ca o qo edaidai:

39ia me vaka sa bula ko Jiova, o koya ka vakabulai ira na Isireli, kevaka sai koya na luvequ ko Jonacani sa tu kina o qo, ena mate vakaidina ko koya. A sa sega e dua vei ira na tamata kecega sa vosa vua.

40A sa kaya ko koya vei ira kecega na Isireli, Dou tu yani kikea, ia koi au kei Jonacani na luvequ, keirau na tu mai kike. A ra sa kaya na tamata vei Saula, Mo kitaka ga na ka e vinaka e matamu.

41A sa kaya ko Saula vei Jiova na Kalou nei Isireli, Mo vakatakila se ko cei sa dodonu. A sa bale vei Jonacani kei Saula nai vola ni veidigidigi; a sa vakadonui ko ira na tamata.

42A sa kaya ko Saula, Dou kitaka na kei-raui vola kei Jonacani na luvequ. A sa bale vei Jonacani.

43A sa kaya vei Jonacani ko Saula, Mo tukuna mai vei au se cava ko a cakava. A sa tukuna vua ko Jonacani, ka kaya, Au a vakatovolea walega e dua na oni lailai e na mua ni titoko sa tu e ligaqu; raica, kaʼu na mate kina.

44A sa kaya ko Saula, Me cakacaka vakakina na Kalou, ka vakaikuritaka; ni ko na mate vakaidina, Jonacani.

45A ra sa kaya na tamata vei Saula, Ena mate li ko Jonacani, o koya sa kitaka na veivakabulai levu o qo e Isireli? me yawa sara: me vaka sa bula ko Jiova, ena sega e dua na drau ni uluna me lutu ki na qele: ni rau sa cakacaka kaya na Kalou edaidai o qo. A ra sa vakabulai Jonacani ko ira na tamata, a sa sega kina ni mate ko koya.

46A sa lako cake ko Saula, me kakua ni muri ira na kai Filisitia; a ra sa lako yani ki na nodra tikina na kai Filisitia.

47A SA rawata ko Saula na nodra matanitu na Isireli, ka veivala kei ira na nodra meca kecega sa tiko volita, vei ira na Moapi, kei ira na luve i Amoni, kei ira na kai Itomi, kei ira na tui Sopa, kei ira na kai Filisitia; ia sa vakararawataka na vanua kecega sa lako kina ko koya.

48A sa cakacaka vakaqaqa ko koya, ka yaviti ira na Amaleki, ka vakabulai ira na Isireli mai na ligadra era vakacacani ira.

49Ia eratou sa luve i Saula, ko Jonacani, kei Isivi, kei Malikisua; kei na yacadrau na luvena alewa, na yacana na ulumatua ko Merapi, kei na yacana sa gone ko Mikali:

50kei na yaca ni wati i Saula ko Eiinoami, na luve i Eiimaasi: ia na yacana na nona; turaga ni valu ko Epineri, na luve i Neri, na tamana lailai ko Saula.

51Ia na tama i Saula ko Kisi; ia na tama i Epineri ko Neri, na luve i Epieli.

52A sa ia nai valu kaukauwa kei ira na kai Filisitia e na gauna kecega i Saula; i ia ni sa raica ko Saula e dua na tamata i kaukauwa, se na tamata qaqa, sa daukauti koya vua.