Ai I Vola I Simueli 13 - AI VOLA TABU（FIJ1864）

A tamatai valu i Saula, 1, 2. Sa mokuta e dua na nodra tabai valu na kai Filisitia, a ra sa qai soqoni vata na kai Filisitia me vala kei ira na Isireli, 3-7. Sa qai cabora nai soro ko Saula, a sa vunauci koya kina ko Samueli, 8-16. Era sa va-kaloloma na Isireli, e na vukudra na kai Filisitia, 17-23.

1SA oti e dua na yabaki ni sa lewa tiko ko Saula. Ia ni sa lewai ira oti na Isireli ka yabaki rua,

2sa qai digitaka vua ko Saula e tolu na udolu na tamata Isireli; ia sa tiko kei Saula e rua na udolu mai Mikimasi kei na ulu-ni-vanua ko Peceli, ka dua na udolu sa tiko kei Jonacani mai Kipia nei Penijamini; ia ko ira na tamata sa vo, sa talai ira ko koya, na tamata yadua ki na nona vale.

3A sa mokuta ko Jonacani na nodra tabai valu na kai Filisitia, o koya ka tiko mai Kipia; a sa rogoca ko ira na kai Filisitia. A sa uvuca na davui ko Saula e na vanua taucoko, ka kaya, Me ra rogoca mada na Iperiu,

4A ra sa rogoca kecega na Isireli ni sa kainaki sa mokuta ko Saula na nodra tabai valu na kai Filisitia, ni sa boi ca talega ko ira na Isireli vei ira na kai Filisitia. A ra sa kaila vata na tamata me muri Saula ki Kilikali.

5A sa soqoni vata ko ira na kai Filisitia me kitaka nai valu kei ira na Isireli, sa tolusagavulu na udolu na vale-vodoki, ka ono na udolu na tamata sa vodo e na ose, ia sa vaka na mata ni nuku mai na baravi na kedrai wiliwili na tamata: a ra sa lako cake ka laʼki tiko mai Mikimasi, kivaka ki cake mai Peci-aveni.

6Ia ni ra sa raica ko ira na tamata Isireli ni ra sa vakasaurarataki (e na vuku ni sa vakaosooso ko ira na tamata), era sa qai vunitaki ira ko ira na tamata e na qara lelevu e so, kei na veikau, kei na veivatu lelevu, kei na veitikina kaukauwa, kei na veikeli.

7Ia e so na Iperiu, era sa lako ki tai kadua ni Joritani, ki na vanua kei Kata kei Kiliati.

Ia ko Saula sa tiko ga mai Kilikali, a ra sa muri koya ka sautaninini ko ira kecega na tamata.

8A sa wawa tiko ko koya me bogi vitu, na bogi ka lokuca ko Samueli; a sa sega ni lako yani ki Kilikali ko Samueli; a ra sa se tani vua ko ira na tamata.

9A sa kaya ko Saula, Dou kauta mai vei au e dua nai soro kama kei nai soro e na veivinakati. A sa cabora ko koya nai soro kama.

10Ia ni sa oti na nona vakacabora nai soro kama, raica, sa lako mai ko Samueli; a sa laʼki tavaki koya ko Saula me vakacegui koya.

11A sa kaya ko Samueli, A cava ko sa cakava? A sa kaya ko Saula, E na vuku niʼu a raica era sa se tani vei au ko ira na tamata, ni ko a sega talega ni lako mai e na veisiga sa lokuci, a sa soqoni vata ko ira na kai Filisitia mai Mikimasi;

12au a qai kaya, Era na lako sobu mai vei au ki Kilikali na kai Filisitia, ia kaʼu sa sega ni masu oti e na mata i Jiova, ia kaʼu a vakasaurarataki au kina, ka cabora nai soro kama.

13A sa kaya ko Samueli vei Saula, Ko sa cakacaka vakalialia: ko sa sega ni vakabauta na vunau i Jiova na nomu Kalou, a va ka vu-nautaka ko koya vei iko: ke sa vakakoya, ke sa vakataudeitaka ko Jiova me tawa mudu na nomu lewai ira na Isireli:

14ia o qo ga, ena sega ni dei na nomu lewa: sa qara oti ko Jiova e dua na tamata sa vaka na yalona, a sa vakaroti koya ko Jiova me nodra turaga na nona tamata, e na vuku ni ko sa sega ni vakabauta na ka ka vunautaka vei iko ko Jiova.

15A sa ia ko Samueli ka lako yani e Kilikali ki Kipia nei Penijamini. Ia ko Saula sa wiliki ira na tamata era sa tiko kaya, era sa ono beka na drau na tamata.

16Ia era sa tiko mai Kipia nei Penijamini ko Saula, kei Jonacani na luvena, kei ira na tamata era sa tiko kei rau.

A ra sa tiko mai Mikimasi na kai Filisitia.

17A ra sa lako yani ka tabai tolu na dauyayana mai na nodrai tikotiko na kai Filisitia; e dua na matai valu era sa lako ki na sala kivaka ki Ofira, ki na vanua ko Suali;

18a sa lako e dua na mataivalu ki na sala ki Peci-oroni; a sa dua na mataivalu sa lako ki na sala ki nai yalayala sa donuya na buca mai Sepoimi kivaka ki na veikau.

19A sa sega ni kune e dua na matai ni kaukamea e na nodra vanua taucoko na Isireli: ni ra sa kaya na kai Filisitia, De ra tulia nai seleiwau ko ira na Iperiu, se na moto;

20a ra sa lako sobu ga ko ira kecega na Isireli vei ira na kai Filisitia, me yadua e vagatara na nonai sivi yara, kei na nona matau, kei na nona vulaono, kei na nonai sivi,

21kevaka sa bati ca na vei-sivi, kei na veimatau, kei nai cula ni co e matai tolu, kei na veivulaono, me vagatara talega na moto ni karavau.

22Ia e na siga sa ia kina nai valu, sa sega ni kune e dua nai seleiwau se dua na moto e na ligana e dua vei ira na tamata era sa tiko kei Saula kei Jonacani: a sa kune vei Saula ga kei Jonacani na luvena.

23Ia sa yacova na sala ki Mikimasi e dua na nodrai tikotiko ni valu na kai Filisitia.