Ai I Vola I Simueli 12 - AI VOLA TABU（FIJ1864）

Sa tukuna na nona yalododonu ko Samueli, 1-5. Sa vunauci ira na tamata e na vuku ni nodra talaidredre, 6-17. Sa masuta na Kalou ko koya, a sa ia na kurukuru levu, 18, 19. Sa qai vakacegui ira ko Samueli, 20-25.

1A SA kaya ko Samueli vei ira kecega na Isireli, Raica, kaʼu sa vakarogoca na domomudou e na ka kecega dou a vosataka vei au, ia kaʼu sa lesia vei kemudou e dua na tui:

2ka, raica, sa qai lako voli e na matamudou na tui: ia koi au, kaʼu sa qase ka sika mai; ka, raica, na luvequ, eratou sa tiko kei kemudou: ia kaʼu a lako voli e na matamudou niʼu a gone ka yacova na siga o qo.

3Dou raici au o qo: dou tukuni au e na mata i Jiova, kei na matana sa lumuta oti ko koya: a karavau i cei kaʼu sa kovea? se na asa i cei kaʼu sa kovea? ia ko cei kaʼu sa vakacacana? o cei kaʼu sa vakasaurarataka? se na liga i cei kaʼu sa taura maikina nai bulubulu me mataboko kina na mataqu? ia kaʼu na vakasuka kivei kemudou.

4A ra sa kaya, Ko sa sega ni vakacacani keimami, ka ko sa sega ni vakasaurarataki keimami, ko sa sega talega ni taura e dua na ka mai na ligana e dua na tamata;

5A sa kaya ko koya vei ira, Sa vakadinadina vei kemudou ko Jiova, a sa vakadinadina edaidai o qo na nona lumuti, ni dou sa sega ni kunea e dua na ka e ligaqu. A ra sa kaya, Sa vakadinadina koi rau.

6A sa kaya ko Samueli vei ira na tamata, Sa ko Jiova ka lesi Mosese kei Eroni, ka kauti ira cake na nomudou qase mai na vanua ko Ijipita.

7Ia dou tu mada ga meʼu veileti kei kemudou e na mata i Jiova e na vuku ni cakacaka dodonu kecega i Jiova, a ya sa cakava ko koya vei kemudou kei ira na nomudou qase eliu.

8Ni sa lako mai ko Jekope ki Ijipita, ka sa tagi vei Jiova ko ira na nomudou qase, sa qai talai Mosese kei Eroni ko Jiova, a rau sa kauti ira tani na nomudou qase mai Ijipita, ka vakatikori ira e na tikina o qo.

9A ra sa guilecavi Jiova na nodra Kalou, a sa volitaki ira ko koya ki na liga i Sisira, na turaga ni valu nei Asori, kei na ligadra na kai Filisitia, kei na ligana na tui Moapi, a ra sa mai vala kei ira.

10A ra sa tagi vei Jiova, ka kaya, Keimami sa valavala ca, ni keimami sa biuti Jiova, ka qaravi ira na Peali kei na Aseteroci: ia o qo, mo vakabulai keimami mai na ligadra na neimami meca, keimami na qai qaravi iko.

11A sa talai Yirupeali ko Jiova, kei Pitani, kei Yifica, kei Samueli, ka vakabulai kemudou mai na ligadra na nomudou meca era sa tiko vakavolivoliti, ia dou sa tiko vakacegu.

12Ia ni dou a raica ni sa lako cake mai vei kemudou ko Naasi na nodra tui na luve i Amoni, dou a kaya vei au, E segai, me lewai keda ga e dua na tui; ia ka sa nomudou tui tiko ko Jiova na nomudou Kalou.

13Ia dou raica mada o qo na tui dou a digitaka, o koya dou a kerea! ia raica, sa lesia vei kemudou ko Jiova e dua na tui.

14Kevaka dou na rerevaki Jiova, ka qaravi koya, ka vakarorogo ki na domona, ka sega ni talaidredre ki na vosa i Jiova, dou na qai tikoga me muri Jiova na nomudou Kalou, oi kemudou kei koya talega na tui sa lewai kemudou:

15ia kevaka dou na sega ni vakarorogo ki na domo i Jiova, ka talaidredre ga ki na vosa i Jiova, ena qai bibi vei kemudou na liga i Jiova, me vaka vei ira na nomudou qase.

16Ia o qo, dou tu mada ka raica na ka levu o qo ena cakava e na matamudou ko Jiova.

17Sa sega li ni gauna ni tamusuki witi edaidai? Au na kaci vei Jiova, ka na solia ko koya na kurukuru kei na uca; mo dou kila kina ka raica ni sa ka levu na nomudoui valavala ca, dou sa cakava e na mata i Jiova ni dou a kerea vei kemudou e dua na tui.

18A sa kaci vei Jiova ko Samueli; a sa solia ko Jiova na kurukuru kei na uca e na siga ko ya: a ra sa rerevaki Jiova vakalevu kei Samueli ko ira kecega na tamata.

19A ra sa kaya kecega na tamata vei Samueli, Mo masulaki keimami na nomu tamata vei Jiova na nomu Kalou, me keimami kakua ni mate: ni keimami sa kuria na neimami valavala ca kecega e na ca, io, e na kerea vei keimami e dua na tui.

20A sa kaya ko Samueli vei ira na tamata, Dou kakua ni rere; dou sa cakava oti na ka ca o qo; ia dou kakua ga ni lesu tani mo dou kakua ni muri Jiova, ia dou qaravi Jiova ga e na yalomudou taucoko;

21ia dou kakua ni lesu tani, mo dou muria kina na ka sa segai, a ya ena sega ni yaga se ia rawa na veivakabulai; ni sa ka sa segai o qori.

22Ni na sega ni laivi ira na nona tamata ko Jiova e na vuku ni yacana levu; ni sa vinakata ko Jiova me qisi kemudou me nona tamata.

23Ia koi au, me yawa vei au meʼu valavala ca vei Jiova niʼu sa cegu ni masulaki kemudou: ia kaʼu na vakavulica vei kemudou nai valavala vinaka ka dodonu:

24dou rerevaki Jiova ga, ka qaravi koya vakaidina e na yalomudou taucoko; ia dou nanuma na veika levu sa cakava vei kemudou ko koya.

25Ia kevaka dou na ia tiko nai valavala ca, dou na vakaoti, oi kemudou vata kei na nomudou tui.