Ai I Vola I Simueli 11 - AI VOLA TABU（FIJ1864）

Era sa mai vala ki Yapesi ko ira na luve i Amoni, 1, 2. Era sa talaki me tukuna vei Saula, a sa laʼki vukei ira ko Saula, ka mokuti ira na luve i Amoni, 4-11. Sa vakataudeitaki kina ko Saula me tui, 12-15.

1SA qai lako cake ko Naasi na luve i Amoni, ka laʼki tiko voleka ki Yapesi-kiliati: a sa kaya ko ira kecega na kai Yapesi vei Naasi, Me da veiyalayalati mada, keimami na qai qaravi iko.

2A sa kaya vei ira ko Naasi na luve i Amoni, E na ka o qo kaʼu na veiyalayalati kina kei kemudou, meʼu leuta kecega ma matamudou i matau, ka meʼu cakava me ka ni veivakamaduataki vei ira kecega na Isireli.

3A ra sa kaya na qase ni Yapesi vei koya, Mo laivi keimami me bogi vitu, me keimami tala nai talatala e so ki na yasana kecega nei Isireli; ia kevaka sa sega e dua me vakabulai keimami, keimami na qai curu yani vei iko.

4A ra sa lako mai nai talaki ki Kipia sa nei Saula, ka ra sa rogo-taka nai rogorogo e daligadra na tamata; a ra sa tabalaka cake na domodra ko ira na tamata kecega, ka tagi.

5Ka raica, sa muria na veikaravau ko Saula mai na veiwere; a sa kaya ko Saula, Sa vakaevei ko ira na tamata, ni ra sa tagi? A ra sa tukuna vua na nodrai tukutuku na kai Yapesi.

6A sa lutuki Saula na Yalo ni Kalou ni sa rogoca nai rogorogo ko ya, a sa waqa vakalevu na nona cudru.

7A sa taura ko koya e rua na karavau, ka tava, ka vakauta e na ligadra nai talatala ki na yasana kecega nei Isireli, ka kaya, Ko ira yadua sa sega ni lako yani me muri Saula kei Samueli, ena caka vakaoqo ki na nona karavau. A sa lutu vei ira na tamata na rere vei Jiova, a ra sa lako yani me vaka era tamata lewe dua.

8A sa wiliki ira ko koya mai Peseki, a ra sa udolu vakatolu na drau na luve i Isireli, a ra sa oba vakatolu na tamata nei Juta.

9A ra sa kaya vei ira nai talatala era a lako mai, Dou vosa vakaoqo vei ira na kai Yapesi-kiliati, E na sabogibogi ni sa katakata na siga dou na vakabulai. A ra sa lako nai talaki, ka tukuna vei ira na kai Yapesi; a ra sa reki.

10A ra sa kaya na kai Yapesi, E na mataka keimami na curu yani vei kemudou, ia dou na cakava vei keimami na ka kecega e vinaka e na matamuni.

11Ia e na sabogibogi sa wasei ira na tamata ko Saula mei taba e tolu; a ra sa yaco mai ki na kedra maliwa nai valu ni sa ia tiko nai vakatawa ni mataka, ka mokuti ira na luve i Amoni ka yacova na gau-ni-siga e katakata; ia sa dui se ko ira ka vo, me sega ni tiko vata e lewe rua.

12A ra sa kaya na tamata vei Samueli, O cei ko koya sa kaya, Me tui li vei keda ko Saula? mo dou kauti ira mai na tamata o qori, me keimami vakamatei ira.

13A sa kaya ko Saula, Ena sega na tamata me vakamatei edaidai, ni sa ia ko Jiova na veivakabulai edaidai vei ira na Isireli.

14A sa kaya ko Samueli vei ira na tamata, Tou mai lako mada ki Kilikali, ka vakataudeitaka maikea na matanitu.

15A ra sa lako na tamata kecega ki Kilikali, a ra sa buli Saula maikea e na mata i Jiova mai Kilikali me tui; a ra sa vakamatea maikina e so nai soro e na veivinakati e na mata i Jiova; a ra sa reki vakalevu maikina ko Saula kei ira kecega na tamata Isireli.