Ai I Vola I Simueli 10 - AI VOLA TABU（FIJ1864）

Sa lumuti Saula ko Samueli, 1; a sa tukuna vua e so na ka ena yacova, 2-8. Sa ia na parofisai ko Saula, 9-13. Sa vunia na vosa i Saula ko Samueli vua na tamana lailai, 14-16. Sa buli ko Saula me tui, 17-27.

1A SA taura ko Samueli na tavaya waiwai, ka livia ki na ulu i koya, ka reguci koya, ka kaya, Sa sega li e na vuku ni sa lumuti iko ko Jiova me nodra turaga na nonai votavota?

2Ni ko sa lako tani vei au edaidai, ko na sota kaya e rua na tamata sa voleka ki nai bulubulu i Rejeli e na nodrai yalayala na Penijamini mai Selisa; a rau na kaya vei iko, Sa kunei na veiasa ko a laʼki qara: ka raica, sa cegu ni nanuma na veiasa ko tamamu, a sa nuiqawaqawa e na vukumudrau, ka kaya, A cava meʼu cakava e na vuku ni luvequ?

3Ia ni ko sa lako tani maikea, ka ko sa yaco ki na kau mai Tapori, dou na sota kaya maikea e tolu na tamata eratou sa lako cake vua na Kalou ki Peceli, e dua sa colata e tolu na luve ni koti, ka dua tale sa colata e tolu nai buli madrai, ka dua tale sa colata e dua na saqa waini:

4a ratou na vakacegui iko, ka solia vei iko e rua nai buli madrai; ia mo taura ga mai na ligadratou.

5Ni sa oti ko na lako ki na vanua-cecere ni Kalou, sa tiko kina e dua na nodrai valu na kai Filisitia: ia ni ko sa lako mai kikea ki na koro, ko na tavaka e dua nai vavakoso parofita eratou sa lako sobu mai na tikina cecere, ka so na qiriqiri, kei na lali, kei na bituvaka-tagi, kei na api, sa liutaki ira; a ra na parofisai lako:

6ia ena lutu vei iko na Yalo i Jiova, ka ko na bau parofisai vata kei ira; ia ko na vuki me tamata tani.

7Ia ni na yacovi iko na veivakatakilakila o qo, mo kitaka na ka sa tu me caka; ni sa tiko kei iko ko na Kalou.

8Ia ko na liutaki au sobu ki Kilikali; ka, raica, au na lako sobu vei iko, me cabora e so nai soro kama, ka me vakamatea e so nai soro e na veivinakati; e vitu na siga ko na wawa kina meʼu lako madani vei iko, ka vakatakila vei iko na ka mo cakava.

9A sa yaco ni sa gole ki dakuna ko koya me lako tani vei Samueli, sa saumaka na yalona ko na Kalou me dua tani: a sa yaco nai vakatakilakila kecega o qo e na siga ko ya.

10Ia ni rau sa lako mai kikea ki na vanua-cecere, raica, sa tavaki koya e dua nai vavakoso parofita; a sa lutu vei koya na Yalo ni Kalou, a sa parofisai ko koya e na kedra maliwa.

11Ia ni ra sa kunea ko ira kecega era a kilai koya eliu, ni sa parofisai vata ko koya kei ira na parofita, era sa qai kaya na tamata, e dua ki na dua, A cava o qo sa yaco ki na luve i Kisi? sa tiko li ko Saula talega vei ira na parofita?

12A sa vosa mai e dua na tamata sa tiko maikea, ka kaya, Ia ko cei ko tamadratou? O koya o qo sa daukainaki kina, Sa tiko li ko Saula talega vei ira na parofita?

13Ia ni sa oti na nona ia na parofisai, sa lako mai ko koya ki na tikina cecere.

14Ia sa kaya na tamana lailai ko Saula vei koya kei na nona cauravou, Drau a lako kivei? A sa kaya ko koya, Me qara na veiasa; ia ni keirau a raica ni sa yali, keirau a lako vei Samueli.

15A sa kaya ko koya na tamana lailai ko Saula, A lo tukuna mada vei au, se cava sa kaya vei kemudrau ko Samueli.

16A sa kaya ko Saula vua na tamana lailai, Sa tukuna vakaidina vei keirau ni sa kunei na veiasa. Ia na ka ni matanitu ka vosa kina vua ko Samueli, sa sega ni tukuna vua.

17A SA kacivi ira vata na tamata ko Samueli vei Jiova ki Misipe;

18asa kaya vei ira na luve i Isireli, Sa vosa vakaoqo ko Jiova na Kalou nei Isireli, Au a kauti ira na Isireli cake mai Ijipita, ka vakabulai kemudou mai na ligadra na kai Ijipita, kei na liga ni veimatanitu kecega era sa vakasaurarataki kemudou:

19ia dou sa beca edaidai na nomudou Kalou, o koya ka vakabulai kemudou mai na nomudou ca kecega kei na nomudou ka rarawa; ia dou sa kaya oti vua, Mo lesia ga vei keda e dua na tui. Ia dou mai tu mada edaidai e na mata i Jiova e na nomudou veimataqali kei na nomudou veiudolu.

20Ia ni sa vakauti ira voleka mai na nodra veiyavusa kecega na Isireli ko Samueli, sa tauri na yavusa i Penijamini.

21Ia ni sa kauta voleka mai na yavusa i Penijamini, me vaka na nodra veimataqali, sa tauri na mataqali i Matiri, a sa tauri ko Saula na luve i Kisi: ia ni ra sa qarai koya, sa sega ni kune.

22A ra sa tarogi Jiova tale, se na lako mai kikea na tamata, se segai. A sa kaya ko Jiova, Raica, sa vuni ko koya e nai yaya.

23A ra sa cici ka kauti koya maikea: ia ni sa tu ko koya e na kedra maliwa na tamata, sa balavu cake vei ira na tamata kecega mai na tabana ka kauta kicake.

24A sa kaya ko Samueli vei ira na tamata kecega, Dou sa raici koya sa digitaka ko Jiova, ni sa sega e tautauvata kaya vei ira na tamata kecega, se segai? A ra sa kaila na tamata kecega, ka kaya, Me bula na tui.

25A sa tukuna ko Samueli vei ira na tamata nai valavala ni matanitu, ka vola e na dua nai vola, ka viri toka e na mata i Jiova.

A sa talai ira yani na tamata kecega ko Samueli, na tamata yadua ki na nona vale.

26A sa lako yani ko Saula talega ki na nona vale ki Kipia; a ra sa lako kaya e so na tamatai valu o ira sa tara na yalodra ko na Kalou.

27Ia sa so na luve ni vu-ni-ca era sa kaya, Ena vakabulai keda vakaevei na tamata o qo? A ra sa beci koya, ka sega ni kauta vua na ka-ni-loloma. A sa vaka tu sa didivara ko koya.