1A SA dua na tamata maivei ira na Penijamini, a yacana ko Kisi, na luve i Epieli, na luve i Sirori, na luve i Pikoraci, na luve i Efia, na Penijamini, a tamata kaukauwa ka vutuniyau.
2A sa dua na luvena, na yacana ko Saula, a tamata talei ka vinaka: a sa sega vei ira na luve i Isireli e dua e vinaka cake vei koya: mai na tabana ka kauta kicake, sa balavu cake kina ko koya vei ira kecega na tamata.
3A sa yali na veiasa nei Kisi na tama i Saula. A sa kaya ko Kisi vei Saula na luvena, Mo kauta kei iko e dua vei ira na cauravou, ka ia, mo laʼki qara na veiasa.
4A sa lako yani ko koya ki na ulu-ni-vanua ko Ifireimi, ka lako yani ki na vanua ko Salisa, ia erau a sega ni kunea: erau sa qai lako e loma ni vanua ko Salimi, a sa sega ga maikina: a sa qai lako ga e loma ni nodra vanua na Penijamini, ia erau a sega ni kunea.
5Ni rau sa lako mai ki na vanua ko Sufi, sa kaya ko Saula vua na nona cauravou erau sa vata kaya, Daru laʼki lesu; de sa cegu e na vuku ni veiasa ko tamaqu, ka sa nuiqawaqawa e na vukudaru.
6A sa kaya vua ko koya, Raica, sa dua na tamata ni Kalou e na koro o qo, a sa vakarokorokotaki na tamata ko ya: a ka kecega sa kaya ko koya sa dauyaco vakaidina: o qo, me daru lako kina: de na vakatakila vei kedaru ko koya na nedaru sala me dara lako kina.
7A sa kaya ko Saula vua na nona cauravou, Ka, raica, kevaka edaru lako, a cava me daru kauta vua na tamata? ni sa oti na madrai e na nedaru bilo, a sa sega e dua na ka-ni-loloma me daru kauta vua na tamata ni Kalou: a cava sa tu vei kedaru?
8A sa vosa tale vei Saula ko koya na cauravou, ka kaya, Raica, sa tu vei au eke e dua na wase ni sikeli siliva ni sa wase va; ko ya kaʼu na solia vua na tamata ni Kalou, me vakatakila vei kedaru na nedaru sala. (
9E na gauna eliu, ni sa lako e dua vei ira na Isireli me taroga na Kalou, sa kaya vakaoqo, Tou mai lako ki na rairai: ni sa vakatokai eliu me rairai ko koya sa parofita e na gauna o qo.)
10A sa kaya ko Saula vua na nona cauravou, Sa vinaka na nomu vosa; daru lako. A rau sa lako ki na koro sa tiko kina na tamata ni Kalou.
11Ni rau sa lako cake tiko e nai cabecabe ki na koro, erau sa kunea na gonealewa e so era lakani me taki wai, a rau sa kaya vei ira, Sa tiko eke ko koya na rairai, se segai?
12A ra sa vosa mai vei rau, ka kaya, Sa tiko ga eke; raica, sa tiko kiliu: tei kusarawa mada, ni sa lako mai edaidai ko koya ki na koro: ni sa dua na solevu edaidai vei ira na tamata e na tikina cecere:
13ni drau na yaco ki na koro, drau na kunei koya sara eliu ni sa sega ni lako cake ki na tikina cecere me kana; ni na sega ni kana na tamata ka me lako mada mai eliu ko koya ka vatonaka nai soro; era sa qai kana emuri ko ira era sa kacivi: ia o qo, drau lako kicake; ni drau na kunei koya e na veimama ni siga vakaoqo.
14A rau sa lako cake ki na koro; ni rau sa lako mai ki loma ni koro, raica, sa mai tavaki rau ko Samueli, ni sa lako cake ki na tikina cecere.
15Ia ka sa tukuna oti ko Jiova e na daliga i Samueli e na siga ka tarava na lako mai i Saula, ka kaya,
16E na sobogi-bogi ni sa vakaoqo na mata-ni-siga kaʼu na tala vei iko e dua na tamata, mai na vanua nei Penijamini, ia mo lumuti koya me turaga vei ira na noqu tamata na Isireli, me vakabulai ira na noqu tamata mai na ligadra na kai Filisitia; niʼu sa raici ira na noqu tamata, e na vuku ni sa yaco vei au na nodra tagi.
17Ia ni sa raici Saula ko Samueli, sa kaya vua ko Jiova, Raica na tamata kaʼu a vosa kina vei iko! o koya o qo ena lewai ira na noqu tamata.
18A sa toro mai vei Samueli ko Saula, ni sa tiko e na matamata-ni-koro, a sa kaya, Mo tukuna mada mai vei au, se sa evei na nona vale na rairai.
19A sa vosa mai vei Saula ko Samueli, ka kaya, Oi au na rairai: mo liutaki au mada ki na tikina cecere, ni datou na kana vata edaidai, ia e na sabogibogi au na talai iko yani, ia kaʼu na tukuna vei iko na ka kecega sa tu e lomamu:
20ia na veiasa sa yali vei iko ka bogi tolu, me kakua ni nuiqawaqawa kina na lomamu; ni ra sa kune ga: ia ko cei era sa domona ko ira kecega na Isireli? sa sega beka ni ko iko, kei ira kecega na lewe-ni-vale i tamamu?
21A sa vosa ko Saula, ka kaya, Sa sega li ni koi au na Penijamini, a ya sa lailai e na nodra veiyavusa na Isireli? ia na noqu mataqali sa sega li ni lailai sobu vei ira kecega na veimataqali e na yavusa i Penijamini? ia a cava ko sa vosa kina vakaoqo vei au?
22A sa kauti Saula kei na nona cauravou ko Samueli, ka kauti rau ki na loqi, ka vakatikori rau e na tikina vakaturaga vei ira sa kacivi, era sa tolusagavulu beka na tamata.
23A sa kaya ko Samueli vua na liga ni kena, Mo kauta mai na kakana kaʼu a solia vei iko, a ya kaʼu a kaya kina vei iko, Me tu mada vei iko na ka o qo.
24A sa tara cake na taba ni manumanu na liga ni kena, kei na ka sa tu e delana, ka viritoka e na mata i Saula. A sa kaya ko koya, Raica na cauna! mo viria ki matamu, mo kana; ni sa maroroi me nomu ki na tiki-ni-siga o qo, niʼu a kaya, Au sa kacivi ira na tamata. A rau sa kana vata ko Saula kei Samueli e na siga ko ya.
25Ia eratou sa lako sobu ki na koro mai na tikina cecere; ia erau sa veivosaki kei Saula e na dela ni vale.
26A rau sa sou e na sabogibogi; ia ni sa kida na mataka, sa kacivi Saula ko Samueli ki na dela ni vale, ka kaya, Mo tu cake, meʼu talai iko yani. A sa tu cake ko Saula, a rau sa curu yani kitautuba, ko koya kei Samueli.
27Ni rau sa lako sobu tiko ki nai bili ni koro, sa kaya vei Saula ko Samueli, Mo vosa vua na cauravou me lako yani me liutaki kedaru, (a sa lako yani ko koya,) ia ko iko, mo tei tu vakalailai mada meʼu tukuna vei iko na vosa ni Kalou.
Who We AreWhat We EelieveWhat We Do
2025 by iamachristian.org,Inc All rights reserved.
