Ai I Vola I Simueli 8 - AI VOLA TABU（FIJ1864）

Erau sa tamata ca na luve i Samueli, a sa kerea kina ko ira na Isireli me ra vakatui, 1-5. Sa masu ki na Kalou ko Samueli, a sa kaya na. Kalou me rogoci ira na tamata e na ka ko ya, 6-9. Sa tukuna ko Samueli vei ira na tamata nai valavala ni tui, 10-18. A ra sa gata ga na tui ko ira na tamata, 19-22.

1IA ni sa qase ko Samueli, sa lesi rau na luvena mo rau dauveilewai vei ira na Isireli.

2Ia na yaca ni nona ulumatua ko Joeli; kei na yacana na kenai karua ko Epia: sa dauveilewai koi rau mai Pieri-sepa.

3A sa sega ni muria na nonai valavala koi rau na luvena, a rau sa vuki me muria na yau, ka taura nai solisoli me rau lewa vakatani, a rau sa vakatanitaka na lewa.

4A ra sa soqo vata ko ira kecega na qase nei Isireli, a ra sa lako mai vei Samueli ki Rama,

5a ra sa kaya vua, Raica, ko sa qase mai, ia na luvemu, erau sa sega ni muria na nomui valavala: mo lesia mada vei keda e dua na tui me lewai keda me vakai ira na veimatanitu kecega.

6A sa ca na ka o qo e na mata i Samueli, ni ra sa kaya, Solia vei keda e dua na tui me lewai keda. A sa masu vei Jiova ko Samueli.

7A sa kaya ko Jiova vei Samueli, Mo vakarorogo ki na domodra na tamata e na ka kecega era sa kaya vei iko: ni sa sega ni ko iko era sa beca, sa koi au ga era sa beca, meʼu kakua ni nodra tui.

8Me vaka na cakacaka kecega era sa cakava mai na siga kaʼu a kauti ira cake mai kina mai Ijipita ka yacova na siga o qo, ni ra sa i laivi au ka qarava na veikalou tani, era sa cakacaka vakakina vei iko talega.

9Ia o qo, mo vakarorogo ki na domodra; ia mo tukuna vakaidina ga vei ira, ka vakatakila vei ira na nonai valavala na tui ena lewai ira.

10A sa tukuna kecega na vosa i Jiova ko Samueli vei ira na tamata era masuta vua me dua na tui.

11A sa kaya ko koya, O qo na nonai valavala na tui ena lewai kemudou: Ena kauti ira na luvemudou ko koya, ka lesia vei koya, ki na nona vale-vodoki, ka me nona tamata me ra vodoka na ose; ka so me ra cici ka liutaka na nona vale-vodoki.

12Ia ena lesia e so vei koya me ra turaga ni tauyaudolu, ka turaga ni tauyalimasagavulu; ka me cukita na nona veiwere e nai sivi yara, me tamusuka talega na nona sila, ka tulia na nonai yaya ni valu, kei nai yaya ni nona vale-vodoki.

13Ia ena kauti ira ko koya na nomudou gonealewa me caka kakana kamikamica, me ra dauvakasasaqa talega, ka dauvavavi.

14Ia ena kauta talega ko koya na nomudou veiwere, kei na nomudou veivaini, kei na nomudou veiolive, io na kena e vinaka, kei na solia vei ira na nona tamata.

15Ia ena kauta na kenai katini ni nomudou sore ni kau, kei na nomudou veivaini, ka solia vei ira na nona matanivanua, kei ira na nona tamata.

16Ia ena kauti ira talega na nomudou tamata, kei ira na nomudou vada, kei ira na nomudou cauravou vinaka, kei na nomudou veiasa, me ra kitaka na nona cakacaka.

17Ena kauta ko koya nai katini ni nomudou sipi, ia koi kemudou, dou na nona tamata.

18Dou na qai qoqolou e na siga ko ya e na vuku ni nomudou tui dou sa digitaka oti me nomudou; ena qai sega ni rogoci kemudou ko Jiova e na siga ko ya.

19A ra sa bese ga na tamata ni vakarogoca na domo i Samueli; a ra sa kaya, E segai; keimami na vakatui ga:

20me vakai ira na veimatanitu kecega koi keimami talega; me lewai keda na neimami tui, ka liutaki keimami, ka laʼki kitaka na neimami valu.

21A sa rogoca kecega ko Samueli na nodra vosa na tamata, a sa laʼki cavuta e na daliga i Jiova.

22A sa kaya ko Jiova vei Samueli, Mo vakarorogo ki na domodra, ka qisia vei ira e dua na tui. A sa kaya ko Samueli vei ira na Isireli, Dou lako na tamata yadua ki na nona koro.