1A SA kaya ko Samueli vei Saula, Sa talai au ko Jiova me lumuti iko mo tui vei ira na nona tamata, io, vei ira na Isireli: ia mo rogoca mada na domo ni vosa i Jiova.
2Sa kaya vakaoqo ko Jiova ni lewe vuqa, Au sa nanuma tiko na ka ka kitaka vei ira na Isireli ko ira na Amaleki, ni sa lawa koto vei ira e na sala ni ra sa lako cake mai Ijipita.
3O qo, mo laʼki yaviti ira na Amaleki, ka vakarusa na ka kecega sa tu vei ira, mo kakua ni lomani ira; mo vakamatea ga na tagane kei na alewa, na gone lailai kei koya sa sucu tiko, na karavau kei na sipi, na kameli kei na asa.
4A sa soqoni ira vata na tamata ko Saula, ka wiliki ira mai Tilaimi, e oba vakavasagavulu nai valu sa lako e yavadra, ka tini na udolu na tamata nei Juta.
5A sa lako mai ko Saula ki na dua na nodra koro na Amaleki, ka lawa koto e na buca.
6A sa kaya ko Saula vei ira na kai Kenai, Dou lako tani, dou lako sobu maivei ira na Amaleki, deʼu sa vakarusai kemudou vata kei ira; ni dou a caka vinaka vei ira kecega na luve i Isireli ni ra sa lako cake mai Ijipita. A ra sa lako tani na kai Kenai maivei ira na Amaleki.
7A sa mokuti ira na Amaleki ko Saula mai Avila ka yaco ki Suri, a ya sa donui Ijipita.
8Ia ko Ekaki na tui Amaleki sa taura bula ko koya; ka vakarusai ira laivi na tamata kecega e na bati ni seleiwau.
9Ia ko Ekaki, kei ira na sipi sa vinaka, kei na karavau, kei na manumanu uro, kei na luve ni sipi, kei na ka kecega sa vinaka, sa karona ko Saula kei ira na tamata, ka sega ni via vakarusai ira laivi: ia na ka kecega sa vakasisila ka tawa yaga era sa vakarusa sara.
10A sa lako mai na vosa ni Kalou kivei Samueli, ka kaya,
11Au sa veivutuni e na vuku ni kaʼu sa cakavi Saula me tui; ni sa saumaki tani ko koya me kakua ni muri au, ka sega ni vakayacora na noqu vosa. A sa yalorarawa ko Samueli; a sa tagi vei Jiova e na bogi taucoko.
12Ia ni sa sou e na mataka ko Samueli me laʼki tavaki Saula e na sabogibogi, sa tukuni vei Samueli, ka vaka, Sa lako mai ki Karimeli ko Saula, ka, raica, sa viria na nonai suva, ka sa lako voli, ka lako yani, ka lako sobu ki Kilikali.
13A sa lako mai kivei Saula ko Samueli, a sa kaya vua ko Saula, Me vakalougatataki iko ko Jiova; au sa vakayacora na vosa i Jiova.
14A sa kaya ko Samueli, Oi; ka cava na nodra tagi na sipi o qo e na daligaqu, kei na domo ni karavau kaʼu sa rogoca?
15A sa kaya ko Saula, Era sa kauti ira maivei ira na Amaleki; ia ko ira na tamata era sa Vakabula na ka e vinaka e na sipi kei na karavau, me ra vakacabora vei Jiova na nomu Kalou; ia na ka tani, keimami sa vakarusa laivi.
16A sa kaya vei Saula ko Samueli, Mo laiva mada meʼu tukuna vei iko na ka sa kaya ko Jiova vei au e na bogi. A sa kaya vua ko koya, Mo tukuna mada mai.
17A sa kaya ko Samueli, Ni ko a ka lailai ga e na matamu, ko a sega li ni nodra turaga na veiyavusa i Isireli, ia ka sa lumuti iko ko Jiova me turaga vei ira na Isireli?
18a sa talai iko ko Jiova e na dua na sala, ka kaya, Mo laʼki vakarusai ira laivi nai valavala ca, io ko ira na Amaleki, ka veivala kaya ka me ra oti mada.
19Ia ka cava ko sa sega ni vakarorogo kina ki na domo i Jiova, ia ko a taura nai toki ni valu, ka kitaka na ka ca e na mata i Jiova?
20A sa kaya vei Samueli ko Saula, Ia kaʼu sa vakarogoca na vosa i Jiova, kaʼu a lako e na sala ka talai au kina ko Jiova, ia kaʼu a kauti Ekaki mai na tui Amaleki, ia ko ira na Amaleki kaʼu a vakarusa sara:
21ia ko ira ga na tamata, era sa taura nai toki ni valu, na sipi kei na karavau, io, na ka talei sa dodonu me vakarusai, me ra vakacabora vei Jiova na nomu Kalou mai Kilikali.
22A sa kaya ko Samueli, Sa vinakata li ko Jiova nai soro kama kei nai madrali, me vaka na talairawarawa ki na domo i Jiova? Raica, sa vinaka na talairawarawa, ka ca nai soro; sa vinaka na vakarorogo, ka ca na uro ni sipi tagane.
23Ni sai valavala ca vaka na cakai sausau na talaidredre, ia sa ka vakatawalotu, ka vaka na veimatakau, na yalokaukauwa. E na vuku ni ko sa beca na vosa i Jiova, sa beci iko talega ko koya, mo kakua ni tui.
24A sa kaya ko Saula vei Samueli, Au a valavala ca; ni kaʼu sa vakacataka na vosa i Jiova, kei na nomu vosa: niʼu a rerevaki ira na tamata, ka vakarorogo ki na domodra:
25ia o qo, mo bokoca mada na noqui valavala ca, ia me daru lesu tale, meʼu ia nai soro vei Jiova.
26A sa kaya vei Saula ko Samueli, Au na sega ni lesu tale kei iko: e na vuku ni ko sa beca na vosa i Jiova, sa beci iko ko Jiova, mo kakua ni tui tiko vei ira na Isireli.
27Ia ni sa vuki rubu ko Samueli me lako yani, sa taura ko koya na bui ni nonai sulu, a sa kadresu.
28A sa kaya vua ko Samueli, Sa dresulaka tani vei iko edaidai ko Jiova na matanitu nei Isireli, a sa solia ki na dua na kai nomu sa vinaka cake vei iko:
29ia ena sega ni vosa lasu se veivutuni ko koya na nodra Kaukauwa na Isireli: ni sa sega ni tamata ko koya me veivutuni rawa.
30A sa kaya ko koya, Au a valavala ca: o qo, mo dokai au mada e na matadra na nodra qase na noqu tamata, kei na matadra na Isireli, me daru lesu mada kina meʼu soro vei Jiova na nomu Kalou.
31A sa lesu tale ko Samueli, ka muri Saula, a sa ia nai soro vei Jiova ko Saula.
32A sa kaya ko Samueli, Kauti Ekaki mai vei au kike, o koya na nodra tui na Amaleki. A sa yalomamada ko Ekaki ni sa lako mai vei koya. A sa kaya ko Ekaki, Sa seavu vakaidina na gaga ni mate.
33A sa kaya ko Samueli, Me vaka sa kitaki ira na alewa na nomui seleiwau me sega na luvedra, ena sega vakakina na luvena na tinamu e na kedra maliwa na alewa. A sa tamusuki Ekaki ko Samueli e na mata i Jiova mai Kilikali.
34A sa lako ki Rama ko Samueli; a sa lako cake ki nona vale ko Saula ki Kipia nei Saula.
35A sa sega ni raici Saula? tale ko Samueli, ka yacova na siga sa mate kina; a sa tagicaki Saula ko Samueli.
A sa veivutuni ko Jiova e na vuku ni ka qisi Saula me nodra tui na Isireli.
Who We AreWhat We EelieveWhat We Do
2025 by iamachristian.org,Inc All rights reserved.
