Ai I Vola I Simueli 4 - AI VOLA TABU（FIJ1864）

Sa mokuti ira na Isireli ko ira na kai Filisitia, 1, 2. Sa kauta mai na kato ni veiyalayalati ko ira na Isireli, a sa rere kina ko ira na kai Filisitia, 3-9. A ra sa moku tale, a sa rakavua na kato ko ira na kai Filisitia, 10, 11. Sa laʼki tukutuku e dua, a sa mate ko Eli ni sa rogoca, 12-18. Sa vakasucu ka mate ko na wati i Piniasi, 19-22.

1A RA sa lako yani ko ira na Isireli me tavaki ira na kai Filisitia me ra veivala, a ra sa laʼki tiko mai Epeni-eseri, a ra sa laʼki tiko mai Efeki na kai Filisitia.

2A ra sa tuvai ira ko ira na kai Filisitia me tavaki ira na Isireli: ia ni sa veiyacovi nai valu, sa moku ko ira na Isireli e na matadra na kai Filisitia: a ra sa mokuta vei ira nai valu mai na veiwere na tamata e va beka na udolu.

3A ra sa lako mai ko ira na tamata ki nai tikotiko, a sa kaya ko ira na nodra qase na Isireli, E na vuku ni cava sa mokuti keda kina edaidai ko Jiova e na matadra na kai Filisitia? me da kauta mai vei keda mai Silo na kato ni veiyalayalati i Jiova, me yaco mai ki na noda maliwa, ka vakabulai keda mai na ligadra na noda meca.

4Ia sa talaki ki Silo ko ira na tamata, me ra vakauta maikea na kato ni veiyalayalati i Jiova ni lewe vuqa, o koya sa tiko e na tadrua ni Jerupi: a rau sa tiko maikea kei na kato ni veiyalayalati ni Kalou koi rau na luve i Eli, ko Ofini kei Piniasi.

5Ia ni sa yaco mai ki nai tikotiko na kato ni veiyalayalati i Jiova, sa kaila ko ira kecega na Isireli e na kaila levu, a sa yavala kina na vanua.

6Ia ni ra sa rogoca ko ira na kai Filisitia na domo ni kaila, era sa kaya, A cava na domo ni kaila levu o qo e na nodrai tikotiko na Iperiu? A ra sa qai kila ni sa lako mai na kato i Jiova ki nai tikotiko.

7A ra sa rere na kai Filisitia, ni ra sa kaya, Sa lako mai na Kalou ki nai tikotiko: a ra sa kaya, Ule, koi keda! ni sa sega ni vakaoqo eliu:

8ule, koi keda! o cei ena vakabulai keda mai na ligadra na kalou qaqa o qo? o ira o qo na kalou era a mokuti ira na kai Ijipita e na moku levu mai na veikau.

9Dou qaqa ka vakatagane, na kai Filisitia, mo dou kakua ni qaravi ira na Iperiu, me vaka era a qaravi kemudou: ka dou vakatagane, ka kitaka nai valu.

10A sa ia nai valu ko ira na kai Filisitia, a sa moku ko ira na Isireli, a ra sa dro ko ira yadua ki na nona vale: a sa levu sara na moku; a sa bale vei ira na Isireli e oba vakatolu era lako e na yavadra.

11A sa vakavuai na kato ni Kalou; a rau sa vakamatei na luve i Eli, ko Ofini kei Piniasi.

12A sa dua na tamata na Penijamini sa cici mai nai valu, a sa lako mai ki Silo e na siga ko ya, a sa kedresu na nonai sulu, a sa tauva tu na uluna na qele.

13Ia ni sa lako mai, raica, sa tiko vakatawa ko Eli e na dua nai tikotiko e na bati ni sala, ni sa sautaninini na yalona e na vuku ni kato ni Kalou. Ia ni sa lako mai na tamata ka tukuna e na koro, sa qoqolou na koro taucoko.

14A sa rogoca na domo ni qoqolou ko Eli a sa kaya, A cava nai balebale ni ue o qo? A sa lako mai vakasauri na tamata, ka tukuna vei Eli.

15A sa ciwasagavulu ka walu na yabaki i Eli; a sa bibi na matana me sega ni rai rawa.

16A sa kaya na tamata vei Eli, Sai koya ka lako mai nai valu koi au, kaʼu a dro edaidai mai nai valu. A sa kaya ko koya, A cava na ka sa yaco, na luvequ.

17A sa vosa mai ko koya sa mai tukutuku, ka kaya, Sa dro ko ira na Isireli e matadra na kai Filisitia, a sa dua talega na samu levu vei ira na tamata, a sa mate talega koi rau na luvemu, ko Ofini kei Piniasi; a sa vakavuai na kato i Jiova.

18Ia ni sa cavuta tiko ko koya na kato ni Kalou, sa qai lutu vakatadrai cake sobu ko koya mai nai tikotiko sa voleka ki na matamata-ni-koro, a sa ramusu na domona, ka mate ko koya; ni sa qase ko koya, ka tamata bibi. A sa lewai ira oti na Isireli ko koya ka yabaki vasagavulu.

19Ia sa bukete ko na vugona, na wati i Piniasi, ka voleka ni vakasucu: ia ni sa rogoca ko koya nai rogorogo ni sa vakavuai tani na kato ni Kalou, ka sa mate na vugona kei na watina, sa cuva ko koya ka vakasucu; ni sa yaco vua na rarawa ni sa taratara.

20Ia ni sa laʼki ciba ko koya, sa kaya ko ira na alewa era tu vata kaya, Mo kakua ni rere; ni ko sa vakasucuma na goneatagane. A sa sega ni vosa mai ko koya, ka sega ni vakarorogo.

21A sa vakatoka ko koya na gone ko I-kapoti, ni sa kaya, Sa takali nai ukuuku maivei ira na Isireli; e na vuku ni sa vakavuai na kato ni Kalou, e na vuku talega ni vugona kei na watina.

22Sa kaya talega ko koya, Sa takali nai ukuuku maivei ira na Isireli; ni sa vakavuai na kato ni Kalou.