Ai I Vola I Simueli 5 - AI VOLA TABU（FIJ1864）

Era sa kauta na kato ni Kalou ki na vale i Takoni ko ira na kai Filisitia; a sa ca kina ko Takoni, 1-5. Sa yaviti ira ko na Kalou e na mate levu; a ra sa qai bose me kauti tani na kato, 6-12.

1IA era sa taura na kato ni Kalou ko ira na kai Filisitia, ka kauta tani mai Epeni-eseri ki Esitoti.

2Ia ni ra sa kauta na kato i Jiova na kai Filisitia, era sa kauta mai ki na vale i Takoni, ka viritaka me voleka vei Takoni.

3Ia ni ra sa sou e na sabogibogi na kai Esitoti, raica, sa bale tu ki na qele e matana ko Takoni, e na mata ni kato i Jiova. A ra sa kauti Takoni, ka vakatikora tale e na nona tikina.

4Ia ni ra sa sou e na sabogibogi e nai karua ni si ga, raica, sa bale tu e matana ki na qele ko Takoni e na mata ni kato i Jiova, a sa muduki tu e nai lago na ulu i Takoni kei na qeteqete ni ligana ruarua, sa vo walega vua na yago vakaika.

5O koya o qo era sa sega ni daubutuka kina nai lago ni vale i Takoni mai Esitoti, ko ira na bete kei Takoni kei ira kecega sa curu ki na vale i Takoni, ka yacova na gauna o qo.

6A sa bibi vei ira na kai Esitoti na liga i Jiova, a sa vakacacani ira, ka yaviti ira e na somunadara, io, ko Esitoti kei na kena veiyasana.

7Ia ni ra sa raica na kai Esitoti ni sa vakaoqo, era sa kaya, Me kakua ni tiko vei keda na kato ni Kalou nei Isireli; ni sa rarawa vei keda na ligana, vei Takoni talega na noda kalou.

8A ra sa talaki kina ka vakasoqona vata na nodra turaga kecega na kai Filisitia, ka ra kaya, A cava me da kitaka ki na kato ni Kalou nei Isireli? A ra sa kaya, Me kauti voli yani ki Kaca na kato ni Kalou nei Isireli. A ra sa kauta voli yani na kato ni Kalou nei Isireli.

9Ia ni sa oti na nodra kauta voli, sa tiko e na koro ko ya na liga i Jiova, a sa levu sara na veivakacacani; a sa yaviti ira ko koya na lewe ni koro, ko ira na lelevu kei ira na lalai, a sa tubu na somunadara vei ira.

10Ia era sa vakauta yani kina na kato ni Kalou ki Ekironi. Ia ni sa yaco na kato ni, Kalou ki Ekironi, era sa qoqolou na kai Ekironi, ka kaya, Era sa kauta voli mai vei keda na kato ni Kalou nei Isireli, me vakamatei keda kei ira na kai noda.

11A ra sa talaki ka vakasoqona vata na nodra turaga kecega na kai Filisitia, ka ra kaya, Dou kauta tani na kato ni Kalou nei Isireli, ka me lesu tani ki na nona tikina, ia me kakua ni vakamatei keda kei ira na kai noda: ni sa dua na veivakacacani levu e na koro taucoko: sa bibi sara maikea na liga i Jiova.

12Ia era sa yaviti e na somunadara ko ira na tamata sa sega ni mate: a sa lako cake ki lomalagi na qoqolou ni koro.