Ai I Vola I Simueli 3 - AI VOLA TABU（FIJ1864）

Sa vosa rei Samueli ko Jiova, 1-14. Sa tukuna vei Eli na vosa i Jiova ko Samueli, 15-21.

1IA na gone ko Samueli, sa qaravi Jiova e na mata i Eli. Ia sa yau levu na vosa i Jiova e na gauna ko ya; sa sega ni waso-ma na raivotu.

2Ia e na siga ko ya ni sa koto ko Eli e na nona tikina, a sa vakatekivu me bibi na matana, me sega ni rai rawa;

3ia ni sa sega ni boko na cina ni Kalou, a sa koto ko Samueli e na vale i Jiova a ya sa tu kina na kato ni Kalou;

4sa qai kacivi Samueli ko Jiova. A sa kaya ko koya, Koi au.

5Sa cici talega ko koya vei Eli, ka kaya, Koi au: ni ko a kacivi au. A sa kaya ko koya, Au a sega ni kaci; mo laʼki koto tale. A sa lako ka koto.

6A sa kaci tale ko Jiova, I Samueli. A sa tu cake ko Samueli, ka lako vei Eli, ka kaya, Koi au; ni ko a kacivi au. A sa kaya ko koya, Au a sega ni kaci, na luvequ; mo laʼki koto tale.

7Ia sa sega mada ni kilai Jiova ko Samueli, ka sa sega mada ni vakatakilai na vosa i Jiova vei koya.

8A sa kacivi Samueli vakatolu ko Jiova. A sa tu cake ko koya, ka lako vei Eli, ka kaya, Koi au; ni ko a kacivi au. A sa kunea ko Eli ni sa ko Jiova sa kaci vua na gone.

9A sa kaya kina ko Eli vei Samueli, Mo laʼki koto; ia kevaka sa na kacivi iko ko koya, mo kaya, Mo vosa mai, Jiova: ni sa vakarorogo na nomu tamata. A sa lako ko Samueli, ka koto e na nona tikina.

10A sa lako mai ko Jiova, ka tu, ka kaci me vaka eliu, I Samueli, i Samueli. A sa kaya ko Samueli, Mo vosa mai; ni sa vakarorogo na nomu tamata.

11A sa kaya ko Jiova vei Samueli, Raica, kaʼu na cakava e dua na ka e Isireli ena qasianiuniu kina ruarua na daligadra kecega era rogoca.

12E na siga ko ya, kaʼu na vakayacora vei Eli na ka kecega kaʼu sa vosataka oti e na vukudra na nona lewe-ni-vale: niʼu sa vakatekivuna kaʼu na vakaotia talega.

13Niʼu sa tukuna oti vua niʼu na lewai ira na nona lewe-ni-vale ka tawa mudu, e na vuku ni valavala ca sa kila ko koya; ni sa vakasisilataki rau koi rau na luvena, ka sega ni tarovi rau ko koya.

14O koya o qo kaʼu sa vosavavakini kina e na vukudra na lewe-ni-vale i Eli, ni na sega ni sorovaki na nodrai valavala ca na lewe-ni-vale i Eli, ka tawa mudu, sa segai e nai soro se nai madrali.

15A sa koto ko Samueli, ka mataka mai, a sa dolava nai sogo ni vale i Jiova. A sa rere ko Samueli ni vakatakila na raivotu vei Eli.

16A sa kacivi Samueli ko Eli, ka kaya, I Samueli, na luvequ. A sa kaya ko koya, Koi au.

17A sa kaya ko koya, A cava na vosa ka vosataka ko koya vei iko? mo kakua mada ni vunia vei au; me cakacaka vakakina vei iko na Kalou, ka vakaikuritaka, kevaka ko sa vunia vei au e dua na ka e na ka kecega ka vosataka ko koya vei iko.

18A sa tukuna vua ko Samueli na ka kecega, ka sega na ka o vunia vua. A sa kaya ko koya, Sai koya o qo ko Jiova: me cakava ko koya na ka e vinaka e matana.

19A sa tubu ko Samueli, a sa tiko kaya ko Jiova, ka sega ni laiva e dua na nona vosa me lutu ki na qele.

20A sa kila ko ira kecega na Isireli, mai Tani ka yacovi Pieri-sepa, ni sa vakadinadinataki tu ko Samueli me parofita nei Jiova.

21A sa rairai tale mai Silo ko Jiova: ni sa vakatakilai koya ko Jiova vei Samueli mai Silo e na vosa i Jiova.

A sa yaco na vosa i Samueli vei ira kecega na Isireli.