Ai I Vola I Simueli 2 - AI VOLA TABU（FIJ1864）

A meke i Ana, 1-10. A nodraui valavala ca na luve i Levi, 12-17. O Samueli, 18, 19. Sa vakaluvea tiko ko Ana, 20, 21. Sa vunauci rau na luvena ko Eli, 22-25. E dua na tamata ni Kalou sa tukuna na ca sa kolai yacova na vale i Eli, 27-36.

1A SA soro ko Ana, ka kaya,

Sa reki na yaloqu e na vuku i Jiova, sa cecere mai na noqu kaukauwa e na vuku i Jiova: sa dalaga na gusuqu vei ira na noqu meca; e na vuku niʼu sa marautaka na bula sa maivei iko.

2Sa sega e yalosavasava me vakai Jiova; ni sai iko ga, ka sega e dua tani; a sa sega tale na Uluvatu me vaka na noda Kalou.

3Dou kakua ni vakalevutaka na vosa viaviaturaga; me kakua ni lako mai na gusumudou na vosalevu: ni sa Kalou vuku ko Jiova, a sa vakaraica se sa vakaevei na cakacaka.

4Sa ramusu na nodra dakai na kaukauwa, ia na kaukauwa sa vau-ni-tolodra era sa kolai bale.

5O ira ka mamau era sa volitaka na nodra cakacaka me rawa kina na kedra; ia ko ira ka dauviakana, era sa vakacegu: sa vakasucu vakavitu ko koya ka yava; a sa malumalumu mai ko koya ka vuqa na luvena.

6Sa ia na veivakamatei ko Jiova, a sa ia na veivakabula: sa qisia ko koya na lako sobu ki nai bulubulu, ka qisia na lako cake.

7Sa ia na veivakadra-vudravuataki ko Jiova, ka ia na veivaka-vutuniyautaki: sa ia na veivakamaluma-lumutaki, ka ia na veilaveti cake.

8Sa laveta cake ko koya na kaisi mai na kuvu ni qele; sa laveta cake na dravudravua ko koya mai nai binibini de ni manumanu, me vakatikora vata kei ira na turaga, me qisi ira talega me ra taukena nai tikotiko vakaturaga sa vakaiukuuku: ni sa nei Jiova na veiduru kei vuravura, a sa viritaka na vura-vura ki deladra.

9Ena maroroya ko koya na yavadra na nona tamata yalosavasava, ia era na tiko lo e na butobuto ko ira nai valavala ca; ni na sega ni kaukauwa ena gumatua kina na tamata.

10Ena raramusumusu na meca i Jiova: ena kurukuru mai lomalagi ko koya vei ira: ena lewa na veiyasana vakayawa kei vuravura ko Jiova; ia ena solia na kaukauwa ki na nona tui, ka laveta cake na ka vakaturaga i koya sa lumuta.

11A SA lako ki Rama ko Elikana ki na nona vale: a sa qaravi Jiova tikoga ko koya na gone e na mata i Eli na bete.

12IA sa luve ni vu-ni-ca koi rau na luve i Eli; erau sa sega ni kilai Jiova.

13Ia sa dauvakaoqo na nodraui valavala na bete vei ira na tamata: ni sa cabora nai soro e dua na tamata, sa lako mai na nona tamata na bete ni sa saqa toka na lewe ni manumanu, a sa taura nai qila sa tolu na matana;

14a sa viritaka ki nai tavuteke, se na kuro levu, se na kuro walega, se na bilo ni wai; na ka kecega sa kauta cake mai ko na qila sa kauta ko na bete me nona. Erau sa kitaka vakakina mai Silo vei ira kecega na Isireli era sa lako mai kina.

15Ia ni ra sa sega ni vakama oti na uro, sa lako mai na nona tamata na bete, ka kaya vua na tamata sa ia tiko nai soro, Mo solia mai na lewe ni manumanu me tavuni me nona na bete, ni sa sega ni vinakata na nomu lewe ni manumanu sa saqa, a ya sa droka ga.

16Ia ke sa kaya e dua na tamata vei koya, Me ra vakama edaidai na uro, ia mo qai kauta na ka ko sa domona; ena qai kaya, E segai; mo solia sara mai: ia kevaka ko sa bese, kaʼu na kauta vakaukauwa.

17Ia sa levu sara kina na nodraui valavala ca na cauravou e na mata i Jiova: ni sa vosavakacacataka ko ira na tamata nai madrali i Jiova.

18A sa cakacaka tiko e na mata i Jiova ko Samueli ni sa gone ga, a sa vauci e na dua na efoti malo.

19A sa cakava vua ko tinana e dua na kote lailai, ka kauta vua e na veiyabaki kecega, ni rau sa lako cake kei na watina me cabora nai soro vakayabaki.

20A sa vosavakalougatataki Elikana kei na watina ko Eli, ka kaya, Me solia vei iko ko Jiova na kawa mai vua na alewa o qo, mei sosomi ni solisoli sa solia ko koya vei Jiova. A rau sa lako ki na nodrau yasana.

21Ni sa talevi Ana ko Jiova, sa kunekune ko koya, ka vakasucuma e tolu na goneatagane ka rua na gonealewa. Ia sa tubu me levu na gone ko Samueli e na mata i Jiova.

22A sa qase sara mai ko Eli, a sa rogoca na ka kecega sa cakava koi rau na luvena vei ira kecega na Isireli; ka ni rau sa koto kei ira na alewa era sa dausoqo vata mai ki na katuba ni vale gatu ni veitata.

23A sa kaya vei rau ko koya, Drau sa kitaka vakacava na ka vakaoqo? niʼu sa rogoca na kemudraui tukutuku ca maivei ira na tamata kecega o qo.

24Me kakua, oi kemudrau na luvequ; ni sa sega ni vinaka nai rogorogo kaʼu sa daurogoca: drau sa vakacalai ira na tamata i Jiova.

25Kevaka sa valavala ca e dua na tamata vua e dua tani, ena lewai koya na dauveilewai; ia kevaka sa valavala ca vei Jiova e dua na tamata, ko cei me na masulaki koya? Ia erau sa sega ga ni vakarogorogo ki na domona na tamadrau; ni sa nanuma ko Jiova me vakamatei rau.

26A sa tubu lako na gone ko Samueli, a sa vinakati koya ko Jiova, kei ira talega na tamata.

27A sa lako mai vei Eli e dua na tamata ni Kalou, a sa kaya vua, Sa vosa vakaoqo ko Jiova, Kaʼu a rairai vakaidina ki na lewe-ni-vale i tamamu, ni ra sa tiko mai Ijipita e na vale i Fero, se segai?

28ia kaʼu a digitaki koya, maivei ira na veiyavusa kecega ni Isireli, me noqu bete, me cabocabo tiko e na dela ni noqui cabocabo-ni-soro, me vakama na boivinaka, me vakaisulutaki e mataqu e na efoti, se segai? ia kaʼu a solia ki na lewe-ni-vale i tamamu na nodrai madrali kama kecega na luve i Isireli, se segai?

29dou sa caqeta mei cavai na noqui soro kei na noqui madrali laukana kaʼu a vakarota me ia e na noqui tikotiko; ia ko sa dokai rau na luvemu, ka sega ni dokai au, mo dou levulevu kina e nai sigana ni nodrai solisoli kecega na noqu tamata na Isireli?

30O koya o qo sa kaya kina ko Jiova na nodra Kalou na Isireli, Au a kaya vakai-dina ni na cakacaka e na mataqu na nomu lewe-ni-vale, kei na lewe-ni-vale i tamamu, ka tawa mudu: ia ka sa qai kaya ko Jiova, Me yawa sara vei au; ni sa ko ira era sa vakarokorokotaki au, au na vakarokorokotaka, ia ko ira era sa beci au, ena cakavi vakaisi.

31Raica, sa lako mai na veisiga kaʼu na muduka laivi kina na nomu kaukauwa kei na nodra kaukauwa na lewe-ni-vale i tamamu, me kakua na qase e na nomu vale.

32Ia ko na kunea na meca e na noqui tikotiko, e na ka vinaka kecega sa caka vei ira na Isireli; ia ena sega na qase e na nomu vale ka tawa mudu.

33Ia na nomu tamata kaʼu sa sega ni muduka tani mai na noqui cabocabo-ni-soro, ena vakarusa na matamu ka vakararawataka na yalomu: ia ena mate na kawa kece ni nomu vale ni ra sa tamata-bula tiko.

34Ia o qo na kenai vakatakilakila vei iko, a ya ena yacovi rau ruarua na luvemu, ko Ofini kei Piniasi; erau na mate ruarua e na siga e dua.

35Ia kaʼu na lesia vei au e dua na bete yalodina, o koya ena cakacaka me vaka na ka kecega sa tu e na lomaqu kei na yaloqu: ia kaʼu na vakatubura vua na lewe-ni-vale yalodina; ia ena cakacaka e na mata i koya kaʼu na lumuta, ka tawa mudu.

36Ia ko koya yadua sa vo vei ira na nomu mataqali, ena lako mai ka cuva sobu vua me nona e dua na tiki ni siliva kei na tiki ni madrai, ka na kaya, Mo lesi au mada ki na dua na cakacaka vakabete, meʼu kania kina e dua na tiki ni madrai.