Ai I Vola I Simueli 1 - AI VOLA TABU（FIJ1864）

A WASE I. —Ai tukutuku kei Elikana, kei na watina e rua ko Ana kei Pinina, 1-8. Sa kerea e dua na luvena ko Ana, a sa sucu vua ko Samueli, 9-20. Sa soli koya ki na Kalou ko tinana, 22-28.

1ASA dua na tamata mai Ramaceimi-so-fimi, mai na ulu-ni-vanua ko Ifireimi, a sa yacana ko Elikana, na luve i Yiroami, na luve i Eliu, na luve i Tou, na luve i Sufi, na kai Efiraca:

2a sa rua na watina; a yacana e dua ko Ana, ia na yaca ni kenai karua ko Pinina: a sa vakaluvea ko Pinina, a sa sega na luve i Ana.

3A sa lako cake na tamata o qo mai na nona koro e na veiyabaki, me soro ka cabora nai madrali vei Jiova ni lewe vuqa mai Silo. A rau sa tiko maikea na luve i Eli, ko Ofini kei Finiasi, erau bete vei Jiova.

4Ni sa yaco na siga me ia nai soro ko Elikana, sa solia ko koya nai votavota e so vei Pinina na watina, vei ira kece talega na luvena tagane kei na luvena alewa:

5a sa solia ko koya vei Ana e rua nai votavota; e na vuku ni sa lomani Ana: a sa sogota na ketena ko Jiova.

6A sa vakayaloca-taki koya vakalevu na nona meca, me vakararawataka na lomana, e na vuku ni sa sogota na ketena ko Jiova.

7Ia ni sa kitaka vakakina ko Elikana e na veiyabaki, ni sa lako cake ki na vale i Jiova ko Ana, sa vakararawataki koya tikoga ko Pinina: a sa tagi kina ko koya, ka sega ni kana.

8Sa qai kaya vua ko Elikana na watina, I Ana, a cava ko sa tagi kina? ka cava ko sa sega kina ni kana? ka cava sa rarawa kina na lomamu? au sa sega beka ni vinaka vei iko, ka ca ke sa tini na luvemu tagane?

9A sa tu cake ko Ana, ni sa kana ka gunu oti mai Silo: (a sa tiko ko Eli na bete e nai tikotiko sa voleka ki na duru ni vale i Jiova:)

10a sa rarawa na yalona, a sa masu vei Jiova ko koya, ka tagi vakalevu:

11a sa cavuta na vosa vavakini, ka kaya, I Jiova ni lewe vuqa, kevaka ko na raica vakaidina na rarawa ni nomu vada, ka nanumi au, ka sega ni guilecava na nomu vada, ka solia ki na nomu vada na goneatagane, kaʼu na qai soli koya vei Jiova e na veisiga kecega sa bula kina, ia ena sega nai toroi me tara na uluna.

12Ia ni sa masu vakalevu tiko ko koya e na mata i Jiova, sa vakaraica na gusuna ko Eli.

13A sa vosa e lomana walega ko Ana; sa yavala ga na tebe-ni-gusuna, a sa sega ni rogo na domona: a sa nanuma kina ko Eli ni sa mateni ko koya.

14A sa kaya vua ko Eli, Me bogi vica mada na nomu mateni? mo biuta tani vei iko na nomu waini.

15Asa vosa mai ko Ana, ka kaya, Sa segai, noqu turaga, sa alewa yalorarawa koi au: ia kaʼu sa sega ni gunuva na waini se na yaqona kaukauwa, ia kaʼu sa sovara na yaloqu e na mata i Jiova.

16Kakua ni nanuma na nomu vada me luve ni vu-ni-ca: niʼu sa vosa e na vuku ni kena levu ni noqu rarawa kei na noqu yalobitaki, ka yacova na gauna o qo.

17A sa vosa ko Eli, ka kaya, Mo lako e na vakacegu: ia me solia vei iko na Kalou nei Isireli na ka ko sa kerea vua.

18A sa kaya ko koya, Me kune loloma mada e matamu na nomu vada. A sa lako yani na alewa e nonai lakolako, a sa kana, a sa sega tale ni vakaveveku na matana.

19A ratou sa sou e na sabogibogi, ka soro e na mata i Jiova, ka lesu, ka lako mai ki na nodratou vale ki Rama: a sa veikilaki ko Elikana kei Ana na watina; a sa nanumi koya ko Jiova.

20Ia ni sa sega ni oti na yabaki, sa kunekune ko Ana, ka vakasucuma na goneatagane, a sa vakatoka na yacana ko Samueli: E na vuku niʼu sa kerei koya vei Jiova.

21Ia sa lako cake na tamata ko ya, ko Elikana, kei ira kecega na nona lewe-ni-vale, me cabora vei Jiova nai soro vakayabaki, kei na nona vosa vavakini.

22A sa sega ni lako cake ko Ana; ni sa kaya vei watina, Me kali mada eliu na gone, au na qai kauti koya, me rairai e na mata i Jiova, ka me tiko maikina ka tawa oti.

23A sa kaya vua ko Elikana na watina, Mo cakava ga na ka e vinaka e matamu; mo tiko me kali mada ko koya; ia me vakataudeitaka na nona vosa ko Jiova. A sa tiko na alewa, ka vakasucuma na luvena, ka me vakalia oti mada.

24Ia ni sa vakalia ko koya, sa kauti koya cake vata kaya, kei na karavau e tolu, kei na efa madrai droka e dua, kei na tavaya waini e dua, ka kauti koya ki na vale i Jiova ki Silo: a sa gone lailai ga ko koya.

25A ra sa vakamatea na karavau, ka kauta na gone vei Eli.

26A sa kaya ko koya, Noqu turaga, me vaka na kena dina na nomu bula, na noqu turaga, koi au na alewa ka tu voleka vei iko eke meʼu masu vei Jiova:

27au a kerea na gone o qo; a sa solia mai vei au ko Jiova na ka kaʼu a kerea vua:

28ia kaʼu sa soli koya kina vei Jiova; ena soli tiko vei Jiova e na veisiga kecega sa bula kina ko koya. A sa soro maikea na gone vei Jiova.