1SA qai lako yani ko ira kecega na luve i Isireli, a ra sa soqoni vata vei Jiova ki Misipe nai vavakoso, me vaka na tamata e lewe dua, mai Tani ka yaco ki Pieri-sepa, kei na vanua ko Kiliati.
2Ia sa tu yani e na nodrai vavakoso na tamata ni Kalou ko ira na nodra turaga na tamata kecega, io na yavusa kecega nei Isireli, era oba vakavasagavulu na tamata sa lako e na yavadra sa dautaura nai seleiwau. (
3Ia sa rogoca ko ira na luve i Penijamini ni sa lako cake ki Misipe ko ira na luve i Isireli.)
Era sa qai kaya ko ira na luve i Isireli, Dou tukuna mai, se sa yaco vakaevei nai valavala ca o qo.
4A sa vosa na tamata na luve i Levi, na wati ni alewa ka vakamatei, ka kaya, Au a lako mai ki Kipia sa nei Penijamini, ko keirau kei na watiqu lailai, me moce kina.
5A sa tu cake me vakacacani au ko ira na kai Kipia, ka volita na vale e na vukuqu e na bogi; era sa nanuma me vakamatei au: ia era a veikilaki kei na watiqu lailai, a sa mate kina ko koya.
6Ia kaʼu a taura na watiqu lailai ka tatava, ka vakauta ki na vanua taucoko sa taukena ko ira na Isireli; e na vuku ni ra a kitaka na ka vakasisila, kei na ka vakalialia e Isireli.
7Raica, sa luve i Isireli koi kemudou kecega; dou tauca mai eke na nomudou vosa kei na nomudou lewa.
8A sa tu cake na tamata kecega me vaka na tamata e lewe dua, ka kaya, Eda na sega ni lako na tamata e dua ki na nona vale gatu, eda na sega talega ni lesu na tamata e dua ki nona vale:
9ia o qo ga na ka eda na qai kitaka ki Kipia; eda na veidigidigi e nai vola, ka lako cake kina:
10ia eda na kauta na tamata e lewe tini mai na dua na drau mai na yavusa yadua nei Isireli, kei na dua na drau mai na dua na udolu, kei na dua na udolu mai na oba, me ra kauta mai na magiti vei ira na tamata, me ra cakacaka ni ra yaco ki Kipia nei Penijamini, me vaka na ka vakalialia era a kitaka e Isireli.
11A ra sa soqoni vata ki na koro ko ira kecega na tamata Isireli; era sa yalovata me vaka na tamata e lewe dua.
12A ra sa tala e so na tamata ko ira na veiyavusa e Isireli ki na yavusa taucoko i Penijamini, ka kaya, A cava nai valavala ca o qo sa caka e na nomudou maliwa?
13ia dou qai soli ira na tamata, na luve ni ca era tiko e Kipia, me keitou vakamatei ira, ka biuta tani nai valavala ca maivei ira na Isireli. Ia ko ira na luve i Penijamini, era sa bese ni rogoca na domo ni wekadra, na luve i Isireli:
14a ra sa soqoni vata ki Kipia ko ira na luve i Penijamini mai na veikoro, me ra laʼki veivala kei ira na luve i Isireli.
15A ra sa wiliki na luve i Penijamini mai na Veikoro e na siga ko ya, ka ra sa ruasagavulu ka ono na udolu na tamata era dautaura nai seleiwau, kei ira tale na kai Kipia era sa wiliki, era sa vitu na drau na tamata digitaki.
16E na tamata kecega o qo era sa vitu na drau na tamata digitaki sa malumalumu na ligadra i matau; era sa daurabo-taka yadua na vatu me sega ni cala kina na ka sa vaka na drau ni ulu.
17Ia ko ira na tamata ni Isireli, ni sa sega ni wili vata ko ira na Penijamini, sa vasagavulu na oba na tamata na kedrai wili era sa dautaura nai seleiwau: era sa tamatai valu ko ira kecega o qo.
18A ra sa ia na luve i Isireli, ka lako cake ki na vale ni Kalou, ka taroga na Kalou, ka kaya, O cei vei keimami me lako cake eliu, me veivala kei ira na luve i Penijamini? A sa kaya ko Jiova, Me liu ko ira na Juta.
19A ra sa tu cake e na mataka ko ira na luve i Isireli, ka laʼki tiko vakaivalu ki Kipia.
20A sa lako yani ko ira na tamata nei Isireli me veivala kei ira na Penijamini; ka ra vakayatuyatutaki ira vakaivalu ko ira na tamata ni Isireli me veivala kei ira mai Kipia.
21A ra sa lako kitautuba mai Kipia ko ira na luve i Penijamini, a ra sa vakabalea ki na qele e lewe rua na oba ka rua na udolu na tamata vei ira na Isireli, e na siga ko ya.
22Ia ko ira na tamata, na tamata Isireli, era sa vaqaqataki ira, ka vakayatuyatutaki ira vakaivalu tale e na tikina era a tu vakaivalu kina e nai matai ni siga. (
23A ra sa lako cake ko ira na luve i Isireli, ka tagi e na mata i Jiova ka yakavi mai, a ra sa tarogi Jiova, ka kaya, Meʼu lako tale, meʼu vala kei ira na luve i Penijamini na taciqu, se segai? A sa kaya ko Jiova, Dou lako cake vei ira.)
24A ra sa toro voleka yani vei ira na luve i Penijamini ko ira na luve i Isireli e nai karua ni siga.
25A sa curu yani e Kipia ko ira na Penijamini me tavaki ira e nai karua ni siga, ka vaka-balei ira tale ki na qele na luve i Isireli era dua na oba ka walu na udolu na tamata; era sa dautaura nai seleiwau ko ira kecega o qo.
26Era sa qai lako cake ko ira kecega na luve i Isireli, kei ira kecega na tamata, ka lako ki na vale ni Kalou, ka tagi, ka tiko maikina e na mata i Jiova, ka lolo e na siga ko ya ka yacova na yakavi, a ra sa vakacabora e so nai soro kama, ka so nai madrali e na veivinakati, e na mata i Jiova.
27A ra sa tarogi Jiova ko ira na luve i Isireli, (ena vuku ni sa tiko maikea na kato ni veiyalayalati ni Kalou e na veisiga ko ya,
28a sa dautu e matana ko Piniasi, na luve i Eliasari, na luve i Eroni, e na gauna ko ya,) ka kaya, Meʼu lako tale yani me veivala kei ira na luve i Penijamini, na taciqu, se meʼu kakua? A sa kaya ko Jiova, Dou lako cake; niʼu na soli ira ki na ligamu e na sabogibogi.
29A sa lesia e so na tamata ko ira na Isireli me koto voliti Kipia, me kena lawa.
30A ra sa lako cake ko ira na luve i Isireli vei ira na luve i Penijamini e nai katolu ni siga, a ra sa tu vakayatuyatu vakaivalu ki Kipia, me vaka eliu.
31A ra sa curu yani ko ira na luve i Penijamini me tavaki ira na tamata, era sa vecei mai na koro; a ra sa vakatekivu me ra yaviti ira na tamata, ka mokuti ira mate, me vaka eliu, e na veisalatu, sa lako cake e dua kivaka ki na vale ni Kalou, ia na kenai karua sa lako e na were ki Kipia: era sa tolusagavulu beka na tamata Isireli.
32A ra sa kaya ko ira na luve i Penijamini, Era sa moku e matada, me vaka eliu. A ra sa kaya ko ira na luve i Isireli, Tou dro, ka vecei ira mai na koro ki na veisalatu.
33A ra sa tu cake ko ira kecega na tamata Isireli mai na nodra tikina, ka tu vakayatuyatu vakaivalu mai Peali-tamari: ia ko ira na Isireli ka lawa koto, era sa lako mai na nodra tikina, mai na veico ni Kipia.
34A ra sa lako mai kivaka ki Kipia e dua na oba na tamata digitaki maivei ira kecega na Isireli, a sa ka levu nai valu: a ra sa sega ni kila ni sa voleka vei ira na ca.
35A sa yaviti ira na Penijamini e na matadra na Isireli ko Jiova: ia sa vakamatea ko ira na luve i Isireli e na siga ko ya e rua na oba ka lima na udolu ka dua na drau na tamata vei ira na Penijamini: era sa dautaura nai seleiwau ko ira kecega o qo.
36A ra sa kunea ko ira na luve i Penijamini ni ra sa moku: ni ra sa dro e matadra na Penijamini ko ira na Isireli, e na vuku ni ra sa vakararavi vei ira era sa lesi me lawa koto mai Kipia.
37A sa kusarawa ko ira ka lawa koto, ka lutuki Kipia; ia ko ira sa lawa koto, era sa lako tu ka yavita na koro taucoko e na bati ni seleiwau.
38Ia ka sa lesi e dua nai vakatakilakila vei ira na Isireli kei ira na lawa, me ra cakava me lako cake e dua na kubou levu mai na koro.
39Ia ni sa saumaki ko ira na Isireli mai nai valu, sa vakatekivu ko ira na Penijamini me mokuta-mate maivei ira na Isireli e tolusagavulu beka na tamata; ni ra sa kaya, Era sa moku vakaidina e matada, me vaka e nai valu eliu.
40Ia ni sa vakatekivu ni lako cake na duru kubou mai na koro, era sa rai kimuri na Penijamini, ka, raica, sa lako cake ki lomalagi na vakamai taucoko ni koro.
41Ia ni sa saumaki ko ira na Isireli, sa kubu ko ira na Penijamini: ni ra sa raica sa yacovi ira na ca.
42Ia era sa vuki kina e na matadra na Isireli, e na sala ki na veikau; a sa vauci ira nai valu: ia ko ira mai na veikoro era sa vakarusai e na kedra maliwa.
43Sa buku na kedra lawa na Penijamini, era sa vakasavi ira, era sa buturaki ira vakarawarawa e na mata i Kipia, vaka ki nai cadracadra ni siga.
44A sa bale vei ira na Penijamini e dua na oba ka walu na udolu na tamata; era sa tamata qaqa ko ira kecega o qo.
45Ia maivei ira era sa lesu ka dro ki na veikau ki na uluvatu ko Rimoni, era sa vakamatea na se e na veisalatu e lima na udolu na tamata; ka ra sa vakasavi ira matua ka yacovi Kitomi, ka yavita e rua na udolu na tamata vei ira.
46Ia ko ira kecega sa bale vei ira na Penijamini e na siga ko ya, era sa lewe ruasagavulu ka lima na udolu na tamata era dautaura nai seleiwau; era sa tamata qaqa ko ira kecega o qo.
47Ia ka sa lesu e ono na drau na tamata, ka dro ki na veikau, ki na uluvatu ko Rimoni; a ra sa tiko mai na uluvatu ko Rimoni ka vula va.
48A ra sa lesu tale mai ko ira na Isireli vei ira na luve i Penijamini, ka yaviti ira e na bati ni seleiwau, na tamata e na veikoro, kei na manumanu e yavai va, kei na ka kecega era sa kunea: a ra sa vakama e na buka na koro kecega era sa kunea.
Who We AreWhat We EelieveWhat We Do
2025 by iamachristian.org,Inc All rights reserved.
