A Kedrai Vola Na Dauveilewai 21 - AI VOLA TABU（FIJ1864）

Sa tagicaki na yavusa i Penijamini, 1-7. Sa moku na kai Yapesi-kiliati, ka sa soli na nodra gonealewa me watidra na Penijamini, 8-15. Sa soli talega ko ira na gonealewa ka meke e na solevu mai Silo, me watidra na Penijamini, 16-25.

1IA sa vosavavakini oti mai Misipe ko ira na tamata Isireli, ka kaya, Ena sega e dua na tamata vei keda me solia na luvena alewa vei ira na Penijamini me vakawati.

2A ra sa lako mai na tamata ki na vale ni Kalou, ka tiko maikina e na mata ni Kalou, ka yakavi mai, a ra sa tabalaka na domodra, ka tagi vakalevu,

3ka kaya, I Jiova na Kalou nei Isireli, sa yaco mei cavai na ka o qo e Isireli, me yali e na siga o qo e dua na yavusa vei ira na Isireli?

4Ia sa sou e na mataka ko ira na tamata, ka cakava maikea e dua nai cabocabo-ni-soro, ka cabora e so nai soro kama ka so nai soro e na veivinakati.

5A ra sa kaya na luve i Isireli, O cei ko koya e na yavusa kecega nei Isireli sa sega ni lako cake kei ira nai vavakoso kivei Jiova? Ni ka dua na vosa vavakini levu e na vuku i koya sa sega ni lako cake kivei Jiova ki Misipe, vakane, Ena mate vakaidina ko koya.

6A sa veivutuni ko ira na luve i Isireli e na vukudra na Penijamini na wekadra, ka kaya, Sa mudu edaidai e dua na yavusa mai Isireli:

7a cava me da kitaka me ra vakawati kina ko ira sa vo, e na vuku ni da sa vosavavakini oti vei Jiova, ni da na kakua ni soli ira na noda gonealewa vei ira me watidra?

8A ra sa kaya, O cei e dua vei ira na veiyavusa nei Isireli sa sega ni lako cake vei Jiova ki Misipe?

Ka raica, sa sega ni lako mai e dua mai Yapesi-kiliati ki nai tikotiko ni sa ia nai soqosoqo.

9Ia era sa wili na tamata, ka, raica, sa sega na tamata vei ira na kai Yapesi-kiliati sa tiko kina.

10Ia ko ira nai vavakoso, era sa tala e tinikarua na udolu na tamata maivei ira na tamata qaqa, ka vakarota vei ira, ka kaya, Dou laʼki yaviti ira na kai Yapesi-kiliati e na bati ni seleiwau, vata kei ira na alewa kei ira na gone:

11ia na ka o qo mo dou cakava, Dou na vakarusa sara na tagane kecega, kei na alewa kecega sa veikilaki kei na tagane.

12A ra sa kunea vei ira na kai Yapesi-kiliati e va na drau na gonealewa era sa sega ni veikilaki kei na tamata, ni ra koto kaya e dua na tagane: a ra sa kauti ira ki nai tikotiko ki Silo, a ya sa mai na vanua ko Kenani.

13Ia sa talaki ko ira nai vavakoso taucoko me vosa vei ira na luve i Penijamini era tiko mai na uluvatu ko Rimoni, ka kacivaka vei ira na sautu.

14A sa lesu tale mai ko ira na Penijamini e na gauna ko ya; a sa soli vei ira ko ira na alewa, era a vakabulai maivei ira na alewa ni Yapesi-kiliati: a sa sega ni rauti ira vakaoqo.

15A ra sa veivutuni ko ira na tamata e na vukudra na Penijamini, ni sa basuka oti na veiyavusa nei Isireli ko Jiova.

16Sa qai kaya ko ira na nodra qase nai vavakoso, A cava me da cakava e na vukudra sa vo, me ra vakawati, e na vuku ni sa yali na alewa vei ira na Penijamini?

17A ra sa kaya, Me nodra sa vo nai votavota ka nodra na Penijamini, me kakua ni vakarusai e dua na yavusa maivei ira na Isireli:

18ia koi keda, eda sa sega ni solia rawa vei ira me watidra maivei ira na noda gonealewa; e na vuku ni ra sa vosavavakini oti ko ira na luve i Isireli, ka kaya, Me ca ko koya sa solia e dua me watina na Penijamini.

19Era sa qai kaya, Raica, sa dua na solevu vei Jiova mai Silo e na veiyabaki, mai na kena yasa i Peceli ki na tokalau, e na batina ki cake ni salatu sa lako cake mai Peceli ki Sikemi, ka vaka ki na ceva ki Lipona.

20A ra sa Totaki ira na luve i Penijamini, ka kaya, Dou laʼki lawa koto e loma ni veivainivaini;

21ka rai voli, ka raica, kevaka era sa lako ki nai bili na gonealewa ni Silo me ia na meke, dou qai lako yani mai na veivainivaini, ka taura tauyadua na watina maivei ira na gonealewa ni Silo, ka lako yani ki na nodra vanua na Penijamini.

22Ia ni ra na lako mai na tamadra, se na ganedra, me kudru-kudru kina vei keimami, keimami na qai kaya vei ira, Dou yalololoma ga vei ira, e na vukuimami: e na vuku ni keimami a sega ni taura bula e nai valu na alewa, me nodra yadua; ni sa sega ni nomudoui solisoli e na siga o qo, mo dou ca kina.

23A ra sa kitaka vakakina na luve i Penijamini, ka ra kauta e so me watidra me rauti ira, maivei ira era sa meke, o ira era a butakoca: a ra sa lako ka lesu ki na nodrai votavota, ka tara na koro e so, ka tiko kina.

24A ra sa lako yani maikea ko ira na luve i Isireli e na gauna ko ya, na tamata yadua ki na nona yavusa, kei na nona mataqali, a ra sa lako yani maikea na tamata yadua ki na nonai votavota.

25E na gauna ko ya sa sega na tui vei ira na Isireli: era sa kitaka na tamata yadua na ka sa dodonu e matana.