A Kedrai Vola Na Dauveilewai 19 - AI VOLA TABU（FIJ1864）

Sa laʼki Pecileema e dua na luve i Levi me kauta mai na watina, 1-15. Ni sa lesu tiko, sa moce mai Kipia, 16-21. A nodrai valavala ca na lewe ni koro, 22-28. Sa tatava na watina sa mate na tamata ko ya, ka vakauta ki na veiyavusa ni Isireli, 29, 30.

1IA e na gauna ko ya, ni sa sega na tui vei ira na Isireli, sa dua na luve i Levi sa tiko vulagi e na dua na yasa ni ulu-ni-vanua ko Ifiireimi, a sa kauta e dua na alewa mai Pecileema nei Juta me watina lailai.

2A sa cala vua ko na watina lailai ni sa dauyatagane, a sa lako tani vua ki na vale i tamana mai Pecileema nei Juta, a sa tiko maikina ka vula va.

3A sa ia na watina, ka muri koya me vosavakavinaka vua, me kauti koya tale mai; a sa lako kaya e dua na nona cauravou, kei na asa e rua: a sa kauti koya ko koya na alewa ki na vale i tamana: ia ni sa raici koya ko na tamana na alewa, sa reki ni sa tavaki koya.

4Ia na vugona, na tama ni alewa, sa cikevi koya me tiko; a sa tiko kaya ka bogi tolu: a ratou sa kana ka gunu, ka moce maikina.

5A sa yaco e nai kaya ni siga ni sa sou ko iratou e na mataka, a sa ia ko koya me lako: a sa kaya na tama ni alewa vei koya na vugona, Me vakacegu na lomamu e na dua na tiki ni madrai, ia emuri dou lako yani ga.

6A rau sa tiko sobu, ka kana ka gunu vata; a sa kaya oti na tama ni alewa vei koya na tamata, Mo lasa mada, ka tiko e na bogi o qo, a me marau na yalomu.

7Ia ni sa tu cake na tamata me lako, sa cikevi koya ko na vugona; a sa tiko ka moce tale maikina.

8A sa sou ko koya e na mataka e nai kalima ni siga, me lako; a sa kaya na tama ni alewa, Me vakacegu mada na lomamu. A rau sa vakaberabera, ka yakavi mai, a rau sa kana.

9Ia ni sa ia me lako na tamata, kei na watina lailai, kei na nona cauravou, sa kaya vua ko na vugona, na tama ni alewa, Raica, sa qai laʼki yakavi mai na siga; mo dou tiko mada ka moce: raica, sa laʼki oti na siga, mo moce eke, a me marau na yalomu; ia mo dou qai sou e na mataka me lako ki na nomu vale.

10A sa sega ni vinakata na tamata me tiko, a sa ia ka lako yani, ka yaco me donui Jepusa, a ya ko Jerusalemi; a sa vata kaya e rua na asa sa vauci vei rau na vodovodo, sa vata kaya talega na watina lailai.

11Ni ratou sa voleka ki Jepusa, sa laʼki dromu na siga; a sa kaya na tamata vua na nona turaga, Tou mai gole mada ki na nodra koro o qo na kai Jepusa, ka moce kina.

12A sa kaya na nona turaga vei koya, Edatou na sega ni gole ki na nodra koro na kai tani, era sega ni luve i Isireli; edatou na lako ga ki Kipia.

13A sa kaya ko koya vua na nonai talatala, Daru laʼki toro voleka ki na dua na koro o qo, me moce kina, ki Kipia, se ki Rama.

14A ratou sa lako tiko; ka dromu vei iratou na siga voleka ki Kipia, a ya sa nei Penijamini.

15A ratou sa gole kina, me laʼki moce e Kipia: ia ni Sa lako mai kina ko koya, sa tiko sobu e na sala ni koro: ni sa sega e dua na tamata sa kauti iratou ki vale me moce.

16Ka, raica, sa dua na tamata qase sa lako mai e na yakavi, mai na nona cakacaka e na were, a tamata mai na ulu-ni-vanua ko Ifireimi; a sa tiko vulagi mai Kipia: ia era sa luve i Penijamini na lewe ni koro ko ya.

17Ia ni sa ta cake na matana, sa kunea ko koya na tamata vulagi sa tiko e na sala ni koro: a sa kaya ko na qase, O sa lako kivei? ka ko sa lako maivei?

18A sa kaya vua ko koya, Keitou sa lako mai Pecileema nei Juta, me lako ki na yasa ni ulu-ni-vanua ko Ifireimi; o qori kaʼu sa lako maikina: ia kaʼu a lako ki Pecileema nei Juta, ia kaʼu sa mai lako ki na vale i Jiova; a sa sega na tamata sa kauti au ki vale:

19ia ka sa tu ga na co kei na co mamaca me kedrau na neirau asa; kei na madrai kei na waini vei au, kei na nomu vada, kei na cauravou, o koya sa tiko kei keirau na nomu tamata: sa sega ni yali e dua na ka.

20A sa kaya na tamata qase, Mo vakacegu; ena noqui tavi ga na nomu ka; ia mo kakua ga ni moce e na sala ni koro.

21A sa kauti koya ki na nona vale, ka solia na kakana vei rau na asa: a ratou sa derea na yavadratou, ka kana ka gunu.

22Ia ni ratou sa vakamarautaka na ya-lodratou, raica, ko ira na lewe ni koro, e so era luve ni ca, era sa volita na vale, ka tukia nai sogo ni katuba, ka vosa vua nai taukei ni vale, na tamata qase, ka kaya, Mo kauta mai kitautuba na tamata ka lako mai ki na nomu vale, me keitou veikilaki kaya.

23A sa curu yani vei ira ko na tamata sai taukei ni vale, a sa kaya vei ira, Na wekaqu, mo dou kakua mada ni valavala ca; e na vuku ni sa lako mai ki na noqu vale na tamata o qo, dou kakua ni cakava na ka vakalialia o qo:

24raica, na luvequ, sa gonealewa, kei na watina lailai na tamata; koi rau au na qai kauta kitautuba, ia dou veikilaki kei rau, ka cakava vei rau na ka e vinaka e na matamudou: ia dou kakua ni kitaka ki na tamata o qo na ka vakalialia vakaoqo.

25Ia sa bese ni vakarorogo vua ko ira na tamata: a sa taura na watina lailai ko na tamata, ka kauta kitautuba vei ira; a ra sa veikilaki kaya, ka kitaki koya vakaca e na bogi ka siga mai: ia ni sa kida na mataka, era sa laivi koya.

26A sa lako mai na alewa e na mataka, ka bale sobu ki nai sogo ni katuba ni nona vale na tamata sa tiko maikina na nona turaga, me siga mai.

27A sa tu cake e na mataka na nona turaga, ka dolava na veisogo ni vale, ka curu kitautuba me lako e nonai lakolako: ka, raica, sa bale tu na alewa, na watina lailai, e na katuba ni vale, a sa koto e nai lago na ligana.

28A sa kaya vua ko koya, Mo tu cake, me datou lako. A sa sega e dua sa vosa mai. Sa qai laveti koya ko koya ki na asa, a sa ia na tamata, ka lako yani ki na nona yasana.

29Ia ni sa yaco ki na nona vale, sa taura nai sele, ka taura na watina lailai, ka tatava vata kei na suina, me tinikarua na tikina, ka vakauti koya ki na nodrai yalayala kecega na Isireli.

30Ia sa kaya ko ira kecega era kunea, Sa sega e dua na ka vakaoqo sa caka se kune mai na siga era sa lako cake mai kina na luve i Isireli mai na vanua ko Ijipita, ka yacova na siga o qo: dou vakasama, dou bose, ka vosa mai.