1E NA gauna ko ya sa sega na tui vei ira na Isireli.
Ia e na gauna ko ya sa qara e dua nai votavota me nodra me ra tiko kina ko ira na yavusa i Tani; ni ka sega ni lutu vei ira na nodrai votavota e na kedra maliwa na veiyavusa i Isireli, ka yacova na gauna ko ya.
2A sa tala ko ira na luve i Tani e lima na tamata e na nodra mataqali mai na nodrai yalayala, eratou sa tamata qaqa, mai Sora, kei Esitaoli, me ratou laʼki rai vanua, ka kila vakavinaka; a ra sa kaya vei iratou, Dou laʼki raica vakavinaka na vanua: a ratou sa lako mai ki na ulu-ni-vanua ko Ifireimi, ki na vale i Mika, a ratou sa moce maikina.
3Ni ratou sa voleka ki na vale i Mika, eratou sa kila na domo ni cauravou, o koya sa luve i Levi: a ratou sa curu kina, ka kaya vua, O cei sa kauti iko mai kike? ka cava ko sa kitaka eke? ka cava sa tu vei iko eke?
4A sa kaya ko koya vei iratou, Sa kitaka vakaoqo ga vei au ko Mika, a sa vakaivolitaka na noqu cakacaka, ia kaʼu sa nona bete.
5A ratou sa kaya vua, Mo taroga mada vei koya na Kalou, me keitou kila kina se na vinaka na neitoui lakolako keitou sa lako kina, se segai.
6A sa kaya vei iratou ko koya na bete, Dou lako vakacegu ga: sa e na mata i Jiova nai lakolako dou sa lako kina.
7Eratou sa qai lako na tamata e lewe lima, a ratou sa lako mai ki Leisi; a ratou sa kunea na tamata era sa tiko kina, ni ra sa tiko welega, me vaka na nodra tiko na kai Saitoni, era tiko cegu ka welega; a sa sega e dua sa vakacaoa e na dua na ka, ni ra sa tiko e na vanua era sa kenai taukei; a ra sa tiko vakayawa vei ira na kai Saitoni, ka ra sa sega ni veilakovi kei ira na tamata tani.
8A ratou sa lako mai ki na wekadratou ki Sora kei Esitaoli: a ra sa kaya na wekadratou vei iratou, Sa vakaevei koi kemudou?
9A ratou sa kaya, Tou ia, me da lako cake vei ira: ni keitou sa raica na vanua, ka, raica, sa vinaka sara: ia dou sa wele tiko! mo dou kakua ni vucesa me laʼki curu mo dou taukena na vanua.
10Ni dou sa yaco kina, dou na lako mai vei ira na tamata era tiko welega, ia sa rabailevu na vanua: ni sa solia ki na ligamudou ko na Kalou; a yasana sa sega ni dravudravua e na dua na ka sa tiko e vuravura.
11A sa lako yani maikea e ono na drau na tamata e na mataqali i Tani, mai Sora, kei Esitaoli, era sa vakarautaki tu e nai yaragi ni valu.
12A ra sa lako cake, ka tiko mai Kiriaci-yiarimi mai Juta; o koya era sa vakatoka kina na yasana ko ya ko Meene-tani, ka yacova na siga o qo: raica, sa koto mai na daku i Kiriaci-yiarimi.
13A ra sa lako yani maikea ki na ulu-ni-vanua ko Ifireimi, ka yaco ki na vale i Mika.
14A ratou sa vosa na tamata e lewe lima, eratou a laʼki raica vakavinaka na vanua ko Leisi, ka kaya vei ira na wekadratou, Dou sa kila beka ni sa tiko e na veivale o qo e dua na efoti, ka so na matakau, ka dua na matakau ceuceu, ka dua na matakau vakawaicalataki? ia o qo, dou nanuma na ka mo dou cakava.
15A ra sa gole kina, ka lako mai ki na nona vale na cauravou, na luve i Levi, io ki na vale i Mika, a ra sa veikidavaki kaya.
16Ia sa tu mai na matamata-ni-koro ko ira na tamata e lewe ono na drau vei ira na luve i Tani, o ira sa vakarautaki tu e nai yaragi ni valu.
17Ia eratou sa lako cake na tamata e lewe lima, eratou a laʼki raica vakavinaka na vanua; eratou sa curu kina; eratou sa kauta na matakau ceuceu, kei na efoti, kei na veimatakau tani; ia sa tu mai na matamata-ni-koro na bete, kei ira na tamata e lewe ono na drau era sa vakarautaki tu e nai yaragi ni valu.
18Ia ko iratou o qo, eratou sa curu ki na vale i Mika, ka kauta maikina na matakau ceuceu, na efoti, kei na matakau vakawaicalataki, kei na veimatakau tani. Sa qai kaya vei iratou ko koya na bete, A cava dou sa cakava?
19A ratou sa kaya vua, Mo tiko lo, mo tabonaka na gusumu e na ligamu, ka lako kei keimami, mo yaco me neitou qase, kei na neitou bete: sa vinaka li vei iko mo bete ki na vale ni tamata e lewe dua, se mo bete ki na dua na yavusa, ka dua na mataqali, vei ira na Isireli?
20A sa marau na yalona na bete, a sa kauta ko koya na efoti, kei na matakau ceuceu, kei na veimatakau tani, ka lako e na kedra maliwa na tamata.
21A ra sa lesu ka lako yani, ka lesi ira na gone lalai kei na manumanu e yavai va kei na kamunaga me liutaki ira.
22Ia ni ra sa vakayawa ki na vale i Mika, era sa soqoni vata na tamata era sa mai na veivale sa voleka ki na vale i Mika, a ra sa laʼki yacovi ira na luve i Tani.
23A ra sa kaci yani vei ira na luve i Tani. A ra sa vagoletaka na matadra, ka kaya vei Mika, Ko sa vakaevei ni ko sa soqoni vata mai?
24A sa kaya ko koya, Dou sa 262 kauta tani na noqu veikalou kaʼu a cakava, kei na bete, ka dou sa lako tani; ka cava tale sa tu vei au? ia ka cava o qo dou sa kaya vei au, Ko sa vakaevei?
25A ra sa kaya vua ko ira na luve i Tani, Kakua ni vakarogotaka na domomu vei keimami, de so na tamata yaloqaqa sa cicivi kemudou, ka mate kina ko iko kei ira na nomu lewe-ni--vale.
26A ra sa lako yani ga e na nodrai lakolako ko ira na luve i Tani: ia ni sa raica ko Mika era sa kaukauwa ka malumalumu ko koya, sa saumaki ko koya ka lesu mai ki na nona vale.
27A ra sa kauta na ka ka cakava ko Mika, na nona bete talega; a ra sa lako ki Leisi, ki na lewe ni vanua era sa vakacegu ka welega: a ra sa yaviti ira e na bati ni seleiwau, ka vakama na koro e na buka.
28A sa sega nai Vakabula, ni sa koto vakayawa o qori ki Saitoni, a ra sa sega ni veilakovi kei ira na tamata tani; a sa koto o qori e na buca mai Peci-riopi.
A ra sa tara na koro, ka tiko kina.
29A ra sa vakatoka na yaca ni koro ko Tani, me vaka na yaca i Tani na nodra qase o koya ka sucu vei Isireli: ia na yaca ni koro eliu ko Leisi.
30A ra sa vakatura cake na matakau ceuceu ko ira na luve i Tani, me nodra: ia ko Jonacani, na luve i Kerisomi, na luve i Manase, o koya kei ira na luvena, era sa bete ki na yavusa i Tani ka yaco ki na siga sa vakabobulataki kina na vanua.
31A ra sa vakatura cake na matakau ceuceu i Mika, a ya ka cakava ko koya, me nodra e na gauna kecega sa tiko kina mai Silo na vale ni Kalou.
Who We AreWhat We EelieveWhat We Do
2025 by iamachristian.org,Inc All rights reserved.
