A Kedrai Vola Na Dauveilewai 17 - AI VOLA TABU（FIJ1864）

Ai tukutuku kei Mika, kei na nona matakau.

1A SA dua na tamata mai na ulu-ni-vanua ko Ifireimi na yacana ko Mika.

2A sa kaya ko koya vua na tinana, A tiki ni siliva e dua na udolu ka dua na drau, sa kauti tani vei iko, na ka ko a ruru kina, ka vosa talega e daligaqu, raica, sa tu vei au na siliva; sai au ga sa kauta tani. A sa kaya ko tinana, Me vakalougatataki iko na luvequ ko Jiova.

3Ia sa vakasuka ko koya vei tinana na tiki ni siliva e dua na udolu ka dua na drau, a sa kaya ko tinana, Au sa cabora oti vakaidina na siliva vei Jiova mai na ligaqu vua na luvequ, me caka kina e dua na matakau ceuceu ka dua na matakau vakawaicalataki: ia o qo, au na vakasuka tale vei iko.

4Ia ka sa vakasuka ko koya na siliva vua na tinana; a sa taura ko tinana e rua na drau na tiki ni siliva, ka solia vua na matai sa dauvakawaicalataka na koula kei na siliva, a sa cakava kina ko koya e dua na matakau ceuceu ka dua na matakau vakawaicalataki: a sa tu ga e na vale i Mika.

5A sa dua na nona vale ni kalou na tamata ko ya ko Mika, a sa cakava ko koya e dua na efoti, ka so na matakau, a sa qisia e dua na luvena, a sa yaco me nona bete ko koya.

6E na gauna ko ya sa sega na tui vei ira na Isireli; sa cakava ko na tamata yadua na ka sa dodonu e matana.

7A sa dua na cauravou mai Pecileema nei Juta, a ya sa nodra na mataqali i Juta; a sa dua na luve i Levi, a sa tiko vulagi maikea.

8A sa lako na tamata ko ya mai na koro ko Pecileema nei Juta me laʼki tiko vulagi e na yasana ena kunea: ia ni sa lako voli sa lako mai ki na ulu-ni-vanua ko Ifireimi, ki na vale i Mika.

9A sa kaya vua ko Mika, O sa lako maivei? A sa kaya vua ko koya, Na luve i Levi mai Pecileema nei Juta koi au, ia kaʼu sa lako meʼu tiko vulagi e na yasana kaʼu na kunea.

10A sa kaya vua ko Mika, Mo tiko kei au, me tamaqu kei na noqu bete, ia kaʼu na solia vei iko e tini na tiki ni siliva e na veiyabaki, kei nai sulu me ganita, kei na kemu. A sa mai curu na luve i Levi.

11A sa vinakata na luve i Levi me tiko kaya na tamata; a sa vaka e dua na luvena ko koya na cauravou.

12A sa qisia na luve i Levi ko Mika, a sa yaco na cauravou me nona bete, a sa tiko e na vale i Mika.

13Sa qai kaya ko Mika, Au sa qai kila, ni na caka vinaka vei au ko Jiova, e na vuku ni sa yaco na luve i Levi me noqu bete.