A Kedrai Vola Na Dauveilewai 15 - AI VOLA TABU（FIJ1864）

Sa vakacaudreva na nodra sila na kai Filisitia ko Samisoni, 1-5. Sa ra mai vala kaya, ka mokuti ira vakarua ko Samisoni, 6-17. Sa malumalumu e na viagunu, ka caka-mana na Kalou me gunu kina ko koya, 18, 19.

1IA ni sa oti na siga e so, e na vula ni tamusuka na witi, sa laʼki raici watina ko Samisoni, ka kauta e dua na luve ni koti; a sa kaya, Au na lako ki na watiqu ki loqi. A sa sega ni laivi koya ko na tamana na alewa me curu kina.

2A sa kaya na tamana na alewa, Au a kaya sa dina ga ni ko sa cati koya; kaʼu a soli koya kina vua na nomui tau: sa sega li ni vinaka cake vei koya ko tacina? me nomu mada ga ko koya, me kenai sosomi.

3A sa kaya e na vukudra ko Samisoni, Au na qai dodonu ga ka ra ca na kai Filisitia, kevaka kaʼu sa vakacacani ira.

4A sa lako ko Samisoni, ka toboka e tolu na drau na fokise, ka saumaka me veiuturi na buidra, ka kauta na cina e so, ka vauca e dua na cina e loma ni rua na buidra.

5A sa vakacaudreva na veicina e na buka, ka vakatalai ira ki na nodra sila na kai Filisitia sa sega ni tamusuki, ka sa vakacaudreva na veibinibini sila, kei na sila sa sega ni tamusuki, kei na veivainivaini kei na veiolive.

6A ra sa taro na kai Filisitia, O cei sa cakava na ka o qo? A ra sa kaya, O Samisoni, na vugo i koya na kai Timinaca, e na vuku ni sa kauta ko koya na wati i koya, ka solia ki na nonai tau. A ra sa lako cake na kai Filisitia, ka vakamai koya na alewa kei na tamana e na buka.

7A sa kaya ko Samisoni vei ira, Dou sa cakava na ka o qo, ia kaʼu na cudruvaki au ga vei kemudou, ka sa oti au na qai cegu.

8A sa mokuti ira e na moku levu, ni sa caqeta ka butuka: a sa lako sobu ko koya, ka dautiko e na yasana na vatu ko Etami.

9A ra sa lako cake na kai Filisitia, ka tiko vakaivalu mai Juta, ka tiko raraba mai Lii.

10A ra sa kaya na tamata Juta, A cava dou sa lako cake mai kina vei keimami? A ra sa kaya, Me vesuki Samisoni keimami sa lako cake mai kina, me cakavi koya me vaka sa cakavi keimami ko koya.

11Sa qai lako sobu e lewe tolu na udolu na tamata vei ira na Juta, ki na yasana na vatu ko Etami, a ra sa kaya vei Samisoni, Ko sa sega li ni kila ni ra sa lewai keda na kai Filisitia? ia a cava na ka o qo ko sa cakava vei keimami? A sa kaya vei ira ko koya, Au sa cakavi ira me vaka na nodra cakavi au.

12A ra sa kaya vua, Keitou sa lako sobu mai me vesuki iko, me soli iko ki na ligadra na kai Filisitia. A sa kaya vei ira ko Samisoni, Dou vosavavakini vei au mo dou sega ni lutuki au koi kemudou.

13A ra sa vosa vua, ka kaya, E segai; keitou na vesuki iko matua ga, ka soli iko ki na ligadra: ia keitou na sega sara ni vakamatei iko. A ra sa vesuki koya e na dali vou e rua, ka kauti koya cake mai na vatu.

14Ni sa yaco ko koya ki Lii, era sa kaila na kai Filisitia ni ra sa laʼki tavaka: a sa curumi koya na Yalo i Jiova, a rau sa yaco na dali e ligana me vaka na laino sa yavu e na buka, a sa tasere mai na ligana na kenai vesu.

15A sa kunea ko koya e dua na galegale vou ni asa, a sa dodoka na ligana, ka taura, ka mokuta kina e dua na udolu na tamata.

16A sa kaya ko Samisoni, E na galegale ni asa, io e na galegale ni asa, kaʼu sa mokuta na tamata e lewe udolu, ka ra sa bini tu.

17Ia ni sa vosa oti ko koya, sa qai biuta na galegale mai na ligana, ka vakayacana na tikina ko ya ko Rama i Lii.

18A sa levu na nona viagunu; a sa kaci vei Jiova, ka kaya, O ni sa solia na gumatua levu o qo e na ligana na nomui talatala: ia kaʼu na qai mate beka e na viagunu, ka bale e na ligadra na tawa cilivi?

19A sa ba-sia na vatu mai Lii na Kalou, a sa vure maikina na wai, a sa gunu ko koya, ka sa lesu tale mai na yalona, a sa bula mai: o koya sa vakatoka kina na yacana ko Eni-akori, a ya mai Lii, ka yacova na siga o qo.

20A sa lewai ira na Isireli ko koya, e na nodra gauna na kai Filisitia, ka yabaki ruasagavulu.