A Kedrai Vola Na Dauveilewai 14 - AI VOLA TABU（FIJ1864）

Sa via vakawati kaya e dua na kai Filisitia ko Samisoni, 1-4. Sa vakamatea e dua na laioni, 5-1. Sa kunea emuri na oni e na yago ni laioni, 8, 9. A nona vosa vakaibalebale vuni, 10-14; sa kilai mai na watina na kenai balebale, 15-18. Sa vakamatea e tolusagavulu na kai Filisitia ko koya, a sa biuti watina, 19, 20.

1A SA lako sobu ko Samisoni ki Timinaca, a sa kunea e dua na alewa mai Timinaca, e dua na luvedra na kai Filisitia.

2A sa lako cake ka tukuna vei tamana kei tinana, ka kaya, Au sa kunea e dua na alewa mai Timinaca, e dua na luvedra na kai Filisitia, ia o qo, mo drau kauta mai vei au me watiqu.

3A sa kaya vua ko tamana kei tinana, Sa sega beka e dua na alewa vei ira na nodra gonealewa na wekamu, se vei ira kecega na kai noqu, ko sa lako kina me kauta mai e dua na alewa maivei ira na kai Filisitia sa tawa cilivi? A sa kaya ko Samisoni vei tamana, Mo kauti koya mai me noqu, ni sa vinaka e mataqu.

4A sa sega ni kila ko tamana kei tinana ni sa vuna ko Jiova, ni sa vakasaqara e dua na ka me cudruvi ira kina na kai Filisitia: a sa lewai ira na luve i Isireli ko ira na kai Filisitia e na gauna ko ya.

5A sa lako sobu ko Samisoni, kei na tamana kei tinana, ki Timinaca; a sa yaco ki na veivainivaini kei Timinaca, ka, raica, sa dua na laioni sa tagi ni sa laʼki tavaki koya.

6A sa curumi koya na Yalo i Jiova, a sa dresulaka o qori ko koya me vaka sa daudresulaki e dua na luve ni koti, ka sa sega e dua na ka e ligana: ia sa sega ni tukuna vei tamana sei tinana na ka ka cakava.

7A sa lako sobu, ka veivosaki kei koya na alewa; a sa vinaka ko koya e na mata i Samisoni.

8Ia ni sa oti na siga e so, sa lako tale ko koya me kauti koya, a sa lako vakatikitiki tani mai me raica na yago ni laioni: ka, raica, sa dua na qele ni lago, kei na oni, e na yago ni laioni.

9A sa kauta e ligana, ka kana lako, ka lako mai vei tamana kei tinana, ka solia vei rau, a rau sa kania: a sa sega ni tukuna vei rau ni sa yago ni laioni ka kauta maikina na oni ko koya.

10A sa lako sobu ko na tamana vei koya na alewa: a sa cakava maikea e dua na solevu ko Samisoni; ni sa daukitaka vakaoqo ko ira na cauravou.

11Ia ni ra sa raici koya, era sa kauta e tolusagavulu na wekana me ratou tiko kaya.

12Asa kaya vei iratou ko Samisoni, Meʼu cavuta mada vei kemudou e dua na vosa vakaibalebale vuni: kevaka dou na vakamacalataka vakaidina vei au, e na bogi vitu ni sa ia tiko na solevu, ka dou sa dina, au na qai solia vei kemudou e tolusagavulu nai sulu eloma, kei nai sulu me ganita vakatolusagavulu:

13ia kevaka dou sa sega ni vakamacalataka rawa vei au, dou na qai solia mai vei au e tolusagavulu nai sulu eloma, kei nai sulu me ganita vakatolusagavulu. A ratou sa kaya vua, Cavuta mai na nomu vosa vakaibalebale vuni, me keitou rogoca.

14A sa kaya vei iratou ko koya, Sa tubu na kakana maivei koya na daukana, a sa tubu na kamikamica mai na kaukauwa. A sa oti na bogi e tolu, eratou sa sega ni vakamacalataka rawa na vosa vakaibalebale vuni.

15Ia e na kenai kavitu ni siga, eratou sa kaya vua na wati i Samisoni, Mo dauveretaka na watimu, me vakamacalataka vei keitou na vosa vakaibalebale vuni, de keitou vakamai iko kei na vale i tamamu e na buka: dou sa kacivi keitou me vakadravudravuataki keitou beka? sa sega li ni vakakina?

16A sa tagi vei Samisoni ko na watina, ka kaya, Ko sa cati au ga, ka sega ni lomani au: ko sa cavuta na vosa vakaibalebale vuni vei ira na nodra goneatagane na kai noqu, ka sa sega ni vakamacalataka vei au. A sa kaya vua ko koya, Raica, au sa sega ni vakamacalataka vei tamaqu sei tinaqu, ia meʼu vakamacalataka li vei iko?

17A sa tagi vua ko koya ka siga vitu, ni sa ia tiko na nodra solevu: ka sa yaco e na kenai kavitu ni siga, sa vakamacalataka vua ko koya, e na vuku ni nona vakasosataki koya: a sa vakamacalataka ko koya na vosa vakaibalebale vuni vei ira na nodra goneatagane na kai nona.

18A ra sa kaya vua na lewe ni koro ko ya e na kenai kavitu ni siga, ni sa sega ni dromu na mata-ni-siga, A cava sa uasivia na kena kamikamica ni oni? ia a cava sa uasivia na kena kaukauwa ni laioni? A sa kaya vei iratou ko koya, Kevaka dou a sega ni yarai sivi e na noqu karavau alewa, dou a sega ni kunea na noqu vosa vakaibalebale vuni.

19A sa curumi koya na Yalo i Jiova, a sa lako sobu ko koya ki Esikiloni, ka mokuta e tolusagavulu na tamata vei ira, ka kauta na kedrai toki, ka solia na veisulu vei iratou eratou a vakamacalataka na vosa vakaibalebale vuni.

A sa waqa na nona cudru, ka sa lako cake ki na vale i tamana.

20A sa yaco na wati i Samisoni me nona na nonai tokani, o koya ka nonai tau.