A Kedrai Vola Na Dauveilewai 13 - AI VOLA TABU（FIJ1864）

Sa valavala ca ko ira na Isireli, ka qali vei ira na kai Filisitia, 1. Sa dua na agilose sa tukuna na sucu i Samisoni, 2-7. Sa rairai tale mai na agilose vei Manoa, 8-23. Sa sucu ko Samisoni, 24.

1A RA sa daucaka ca tale e na mata i Jiova, ko ira na luve i Isireli; a sa soli ira ko Jiova ki na ligadra na kai Filisitia ka yabaki vasagavulu.

2A sa dua na tamata mai Sora, e na mataqali i Tani, na yacana ko Manoa; a sa yava ko watina, ka sega ni vakaluvea.

3A sa rairai vua na alewa na Agilose i Jiova, ka kaya vua, Raica mada; ko sa yava, ka sega ni vakaluvea: ia ko na kunekune ga, ka vakasucuma na goneatagane:

4ia o qo, mo qarauni iko mada, mo kakua ni gunu waini se na yaqona, kakua talega ni kania o dua na ka tawa savasava:

5ia raica, ko na kunekune, ka vakasucuma na goneatagane; ia ena sega ni tara na uluna e dua nai toroi: ni na tawase me nona na Kalou ko koya na gone ni sa qai sucu: ia ena vakatekivu me vakabulai ira na Isireli mai na ligadra na kai Filisitia.

6A sa lako na alewa ka tukuna vua na watina, ka kaya, Sa lako mai vei au e dua na tamata ni Kalou, ia sa rerevaki sara na nonai rairai, sa vaka nai rairai ni agilose ni Kalou: ia kaʼu a sega ni tarogi koya se sa lako maivei, ka sa sega ni tukuna ko koya na yacana vei au:

7a sa kaya vei au ko koya, Raica, ko na kunekune, ka vakasucuma na goneatagane; ia o qo, mo kakua ni gunu waini se na yaqona, kakua talega ni kania e dua na ka tawa savasava: ni na tawase me nona na Kalou ko koya na gone ni sa qai sucu, ka yacova na siga ena mate kina.

8A sa vakamasuti Jiova ko Manoa, ka kaya, Au masuti iko, noqu turaga, me lako tale mai mada vei ke irau ko koya na tamata ni Kalou ko a tala eliu, me mai vakavulici keirau e na ka me caka vua na gone ena sucu mai.

9A sa vakarogoca na domo i Manoa ko na Kalou; a sa lako tale mai na agilose ni Kalou vua na alewa ni sa tiko e na were: a sa sega ni tiko kaya ko Manoa na watina.

10A sa kusarawa na alewa, ka cici, ka tukuna vei watina, ka kaya vua, Raica, sa rairai mai vei au ko koya na tamata ka lako mai vei au e na siga ko ya.

11A sa tu cake ko Manoa, ka muri watina, ka lako mai ki na tamata, ka kaya vua, O iko beka na tamata ka vosa vua na alewa? A sa kaya ko koya, Oi au ga.

12A sa kaya ko Manoa, Me yaco ga na nomu vosa: ena qai vakaevei nai valavala ni gone, kei na ka me caka vua?

13A sa kaya na Agilose i Jiova vei Manoa, E na ka kecega kaʼu a kaya vua na alewa, me qarauni koya ga ko koya:

14a ka kecega sa tubu mai na vaini, me kakua ni kana kina ko koya, me kakua talega ni gunu waini se na yaqona, se kania e dua na ka sa tawa savasava: me vakabauta ko koya na ka kecega kaʼu a vunautaka vua.

15A sa kaya ko Manoa vua na Agilose i Jiova, Me keirau tarovi iko mada me keirau cakava vei iko e dua na luve ni koti.

16A sa kaya na Agilose i Jiova vei Manoa, Kevaka ko sa tarovi au, kaʼu na sega ni kania na nomu kakana, ia kevaka ko sa cakava e dua nai soro kama, mo cabora vei Jiova ga. Ni sa sega ni kila ko Manoa ni sai koya na Agilose i Jiova.

17A sa kaya ko Manoa vua na Agilose i Jiova, Ko cei na yacamu, me keirau vakarokoroko vei iko ni na yaco na nomu vosa?

18A sa kaya na Agilose i Jiova vei koya, A cava ko sa taroga kina na yacaqu, ni sa vuni?

19A sa kauta ko Manoa na luve ni koti kei nai madrali laukana, ka vakacabora vei Jiova e na dela ni vatu. A sa cakacaka vakidacala ko koya, ni sa raica tiko ko Manoa kei na watina:

20a sa yaco, ni sa lako cake tiko na yameyame ni buka mai nai cabocabo-ni-soro vaka ki lomalagi, sa qai lako cake ko koya na Agilose i Jiova e na yameyame ni buka mai nai cabocabo-ni-soro. A sa raica ko Manoa kei na watina, ka rau sa bale vakatobocu ki na qele.

21A sa sega ni rairai tale mai na Agilose i Jiova vei Manoa kei na watina.

Sa qai kila ko Manoa ni sai koya na Agilose i Jiova.

22A sa kaya ko Manoa vua na watina, Edaru na mate vakaidina, ni daru a raici koya na Kalou.

23A sa kaya vua ko na watina, Kevaka sa via vakamatei kedaru ko Jiova, ke sa sega ni vakabauta na nodarui soro kama, kei nai madrali laukana, ka sa sega ni vakatakila vei kedaru na ka kecega o qo, ka sega ni tukuna mai vei kedaru edaidai na ka vakaoqo.

24A sa vakasucuma na goneatagane na alewa, ka vakatoka na yacana ko Samisoni: a sa tubu cake na gone, ka sa vakalougatataki koya ko Jiova.

25A sa vakatekivu me vakauqeti koya na Yalo i Jiova mai Meene-tani e na macawa i Sora kei Esitaoli.