A Kedrai Vola Na Dauveilewai 12 - AI VOLA TABU（FIJ1864）

Sa ra veileti ka veivala ko Yifita kei ira na mataqali i Ifireimi, 1-6. Sa ciba ko Yifita, 7. A kedrai tukutuku na dauveilewai e so, 8-15.

1A RA sa kacivi vata na kai Ifireimi, ka lako yani vaka ki na tokalau, a ra sa kaya vei Yifita, A cava ko a lakani kina mo veivala kei ira na luve i Amoni, ka sega ni kacivi keimami me lako kei iko? keimami na vakama e na buka na nomu vale, kei iko talega.

2A sa kaya vei ira ko Yifita, Koi au kei ira na noqu tamata, keimami sa veidre sara kei ira na luve i Amoni; ia kaʼu a kacivi kemudou, ia dou a sega ni vakabulai au mai na ligadra.

3Ia niʼu a raica ni dou a sega ni ia na veivakabulai, kaʼu a viria na noqu bula ki ligaqu, ia kaʼu a lako yani vei ira na luve i Amoni, a sa soli ira ko Jiova ki na ligaqu: ia o na vuku ni cava dou sa lako mai kina vei au edaidai, mo veivala kei au?

4A sa vakasoqoni ira vata kecega na kai Kiliati ko Yifita, ka vala kei ira na Ifireimi: a ra sa mokuti ira na Ifireimi ko ira na kai Kiliati, e na vuku ni ra sa kaya, Na Ifireimi sa dro koi kemudou: sa o na kedra maliwa na Ifireimi, kei na Manase, ko ira na Kiliati.

5A sa rawata na veiyasana sa lako-kosovi kina na Joritani, ko ira na kai Kiliati maivei ira na Ifireimi: ia ni ra sa kaya ko ira na kai Ifireimi era a dro, Meʼu lako madani ki tai kadua, era sa qai kaya vua ko ira na kai Kiliati, Na Ifireimi ko iko, se segai? ia kevaka sa kaya, E segai;

6era sa qai kaya vua, Mo cavuti Shiboleta: a sa cavuti Siboleta ko koya: ni sa sega ni rawata mo cavuta vakadodonu: era sa qai tauri koya, ka vakamatea mai na veiyasana sa lako-kosovi kina na Joritani: a sa bale maivei ira na Ifireimi e na gauna ko ya e lewe vasagavulu ka rua na udolu.

7A sa lewai ira na Isireli ko Yifita ka yabaki ono. Sa qai mate ko Yifita na kai Kiliati, a sa bulu e na na koro mai Kiliati.

8A SA taravi koya ko Ipisani mai Pecileema, a sa lewai ira na Isireli.

9A sa tolusagavulu na luvena tagane; ia sa tolusagavulu na luvena alewa, o ira sa tala yani ko koya; a sa kauta mai e tolusagavulu na gonealewa me nodra na luvena tagane. A sa lewai ira na Isireli ko koya ka yabaki vitu.

10Sa qai ciba ko Ipisani, a sa bulu mai Pecileema.

11A sa taravi koya ko Eloni, na Sepuloni, me lewai ira na Isireli: a sa lewai ira na Isireli ko koya ka yabaki tini.

12A sa ciba ko Eloni, na Sepuloni, a sa bulu mai Eiyaloni e na vanua ko Sepuloni.

13A sa taravi koya me lewai ira na Isireli ko Apitoni na luve i Ileli, na kai Piraconi.

14A sa vasagavulu na luvena tagane, a sa tolusagavulu na mokobuna tagane, a ra sa dauvodo lako e na luve ni asa e vitusagavulu: a sa lewai ira na Isireli ko koya ka yabaki walu.

15A sa ciba ko Apitoni na luve i Ileli, na kai Piraconi, a sa bulu mai Piraconi e na vanua ko Ifireimi, mai na nodra ulu-ni-vanua na luve i Amaleki.